Kathakagrihyasutra 88.3.1

88.3.1

etaistribhiḥ pitṛpitāmahaprapitāmahānāṃ trīnpiṇḍān nipṛṇāti mantraliṅgāt| agnivāyusūryāścātra lokatrayasthāḥ pitrāditvena bhāvyante, piṇḍeṣu ca pṛthivyādibuddhiḥ kriyate| iyaṃ pṛthivī darvirivānnasādhanatvasāmānyāt dārayati vā doṣān karmādyanuṣṭhānadvāreṇa viduṣāmiti darviḥ pṛthivī akṣitā avināśinī itaradardivilakṣaṇā, tṛptiḥ prītihetutvāt, svadhā prathamapiṇḍarūpā pṛthivī, anupa dastā ‘dasu-upakṣaye’ anupahiṃsitā, tāṃ pṛthivīṃ darvimakṣitāṃ tṛptiṃ svadhāmanupadastāṃ pṛthivīṃ prathamapiṇḍarūpāṃ upajīva bhuṅkṣva he pitaḥ| ka iva| agniriva, yathā agniḥ pṛthivīmupajīvati bhaumastadadhipatitvāt, tadvat| ye cātra tvānu, ye cātra paraloke tvāmanu sthitāḥ tava anucarabhūtāḥ, te'pyupa- jīvantu piṇḍametat sānucara upajīvetyarthaḥ| eṣā svadhā bhavatviti śeṣaḥ|| anenaivetarau gatārthau| antarikṣaṃ darvistamaso vidāraṇādannasādhanatvādvā| dyaurdarvirduḥkhanivāraṇāt svargasya niratiśayasukhātmakatvāt|