Atharvanaparishishta 63
Ātharvaṇapariśiṣṭa 63
- Language
- Sanskrit
63.1
bhūmikampalakṣaṇam
62.1.1. oṃ catvāro bhūmikampāstu gargaḥ provāca buddhimān
agnirvāyustathāpaśca caturthastvindra ucyate
2. teṣāṃ rūpaṃ vikārāṃśca vyākhyāsyāmo'nupūrvaśaḥ
yajjñātvā buddhimāndhīro nirdiśedvividhaṃ phalam
3. prakampitāyāṃ bhūmau cetsaptāhābhyantareṇa tu
bhaveyuratra saṃgrāmā rājñāṃ mṛtyubhayapradāḥ
4. rājñāṃ virodho bhavati maraṇāni bhavanti ca
tāmraḥ sūryaśca candraśca pītāśca mṛgapakṣiṇaḥ
5. diśaḥ sarvā bhaveyuśca sūryodayasamaprabhāḥ
yadetallakṣaṇopetaṃ vidyādagnikampitam
6. tasminbhavati nirdeśaḥ śaunakasya vaco yathā
hiraṇyaṃ ca suvarṇaṃ ca yaccānyadvidyate gṛhe
7. sarvametatparityajya kartavyo dhānyasaṃgrahaḥ
rāṣṭrāṇi saṃdahedagnirgrāmāṃśca nagarāṇi ca
62.1.8. saṃgrāmāścātra vartante māṃsaśoṇitakardamāḥ
rājānaśca virudhyante devaścātra na varṣati
9. evametatprakampānāṃ garhitamagnikampitam
63.2
2. 1. prakampitāyāṃ bhūmau cediti
2. atipracaṇḍo bahulo vāyurbhavati dāruṇaḥ
śarkarākarṣaṇaścāpi diśu caiva vidikṣu ca
3. tadetallakṣaṇopetaṃ vidyādvāyuprakampitam
śastrairācaraṇaṃ kuryātprākāraṃ parikhāṃ tathā
4. na tadā pravasedgrāmaṃ jñātvātmānaṃ tu gopayet
saṃgrāmāścātra vardhante māṃsaśoṇitakardamāḥ
5. virudhyante ca rājāno maraṇāni bhavanti hi
rājaputrasahasrāṇāṃ bhūmiḥ pibati śoṇitam
6. māsaṃ viṃśati rātraṃ vā devastatra na varṣati
dvābhyāṃ gatābhyāṃ māsābhyāṃ paraṃ syādbahulaṃ jalam
7. dṛṣṭaṃ dūpayate cātra kṣatabaddhāni cādhikam
eṣāmeva tu kampānāṃ garhitaṃ vāyukampitam
63.3
3. 1. prakampitāyāṃ bhūmau
2. varṣantastu samāyānti mahāmeghāḥ samantataḥ
nakrāśca śiśumārāśca kūrmā makarasaṃsthitāḥ
3. abhrākṛtiṣu dṛśyante prasantaścandrabhāskarau
tadetallakṣaṇopetaṃ vidyādambu prakampitam
4. parvateṣu vapedbījamūṣare jāṅgale tathā
tatroptaṃ nandate bījamanyatra bhuvi naśyati
5. udajāni tu puṣpāṇi mūlāni ca phalāni ca
gacchanti tatra vṛddhiṃ ca sarvānyudakajāni ca
62.3.6. kṣemaṃ subhikṣamārogyaṃ suvṛṣṭiṃ cātra nirdiśet
63.4
4. 1. prakampitāyāṃ bhūmau
2. gambhīraṃ garjamānastu megha āyāti pārthivaḥ
snigdho hyañjanasaṃkāśaḥ sumahatparvatopamaḥ
3. vitrāsayandiśaḥ sarvā drutaṃ cāpi pravarṣati
indrāyudhaṃ bhaveccātra vidyutstanitameva ca
4. suvṛṣṭiṃ kṣemamārogyaṃ subhikṣaṃ paramā mudaḥ
yajñodbhavaistu modante ānandairmoditāḥ prajāḥ
5. eteṣāṃ bhūmikampānāṃ praśastaṃ hīndrakampanam
jānīyāllakṣaṇairetaiḥ sarvameva śubhāśubham
6. eteṣu triṣu kampeṣu atharvā śāstrakovidaḥ
māhendrīmabhṛtāṃ vāpi kuryācchāntiṃ sadakṣiṇām
7. indrakampe tu vidhivadaindrairmantrairvidhānavit
tatphalasya pradhānārthaṃ juhuyācca japettathā
juhuyācca japettatheti
63.62
iti bhūmikampalakṣaṇaṃ samāptam
Linked texts (1)
- Atharvavedapariśiṣṭa — Sanskrit