<!-- Pramāṇa, a library of Indian primary sources · https://indike.org/pramana/ins.polity.kane-1930.v5.c75.16 -->

[Pramāṇa](https://indike.org/pramana/) › [Studies](https://indike.org/pramana/ins) › [Polity, law and society](https://indike.org/pramana/ins.polity) › [History of Dharmashastra (Ancient and Mediaeval Religious and Civil Law in India)](https://indike.org/pramana/ins.polity.kane-1930) › v5.c75.16

# History of Dharmashastra (Ancient and Mediaeval Religious and Civil Law in India) v5.c75.16

History of Dharmaśāstra (Ancient and Mediaeval Religious and Civil Law in India) v5.c75.16

- **Language:** English

### [v5.c75.16](https://indike.org/pramana/ins.polity.kane-1930.v5.c75.16)

ऋ. १० १६. मैनमग्ने वि दहो माभि शोचो मास्य त्वचं चिक्षिपो मा शरीरम्। यदा शृतं कृणवो जातवेदोऽथेमेनं प्रहिणुतात्पितृभ्यः॥ १ शृतं यदा करसि जातवेदोऽथेमेनं परि दत्तात्पितृभ्यः। यदा गच्छात्यसुनीतिमेतामथा देवानां वशनीर्भवाति॥ २ सूर्य चक्षुर्गच्छतु वातमात्मा द्यां च गच्छ पृथिवीं च धर्मणा। अपो वा गच्छ यदि तत्र ते हितमोषधीषु प्रति तिष्ठा शरीरैः॥ ३ अजो भागस्तपसा तं तपस्व तं ते शोचिस्तपतु तं ते अर्चिः। यास्ते शिवास्तन्वो जातवेदस्ताभिर्वहैनं सुकृतामु लोकम्॥ ४ अव सृज पुनरग्ने पितृभ्यो यस्त आहुतश्चरति स्वधाभिः। आयुर्वसान उप वेतु शेषः सं गच्छतां तन्वा जातवेदः॥ ५ यत्ते कृष्णः शकुन आततोद पिपीलः सर्प उत वा श्वापदः। अग्निष्टद्विश्वादगदं कृणोतु सोमश्च यो ब्राह्मणाँ आविवेश॥ ६ अग्नेर्वर्म परि गोभिर्व्ययस्व सं प्रोर्णुष्व पीवसा मेदसा च। नेत्ता धृष्णुर्हरसा जर्हृषाणो दधग्विधक्ष्यन्पर्यङ्खयाते॥ ७ इममग्ने चमसं मा वि जिह्वरः प्रियो देवानामुत सोम्यानाम्। एष यश्चमसो देवपानस्तस्मिन्देवा अमृता मादयन्ते॥ ८ क्रव्यादमग्निं प्र हिणोमि दूरं यमराज्यो गच्छतु रिप्रवाहः। इहैवायमितरो जातवेदा देवेभ्यो हव्यं वहतु प्रजानन्॥ ९ यो अग्निः क्रव्यात्प्रविवेश वो गृहमिमं पश्यन्नितरं जातवेदसम्। तं हरामि पितृयज्ञाय देवं स घर्ममिन्वात्परमे सधस्थे॥ १० यो अग्निः क्रव्यवाहनः पितॄन्यक्षदृतावृधः। प्रेदु हव्यान वोचति देवेभ्यश्च पितृभ्य आ॥ ११ उशन्तस्त्वा नि धीमह्युशन्तः समिधीमहि। उशन्नुशत आ वह पितॄन्हविषे अत्तवे॥ १२ यं त्वमग्ने समदहस्तमु निर्वापया पुनः। कियाम्ब्वत्र रोहतु पाकदूर्वा व्यल्कशा॥ १३ शीतिके शीतिकावति ह्लादिके ह्लादिकावति। मण्डूक्य१ सं सु सं गम इमं स्व१ग्निं हर्षय १४

- [Previous: v5.c75.15](https://indike.org/pramana/ins.polity.kane-1930.v5.c75.15)
- [Next: v5.c75.17](https://indike.org/pramana/ins.polity.kane-1930.v5.c75.17)
- [Up: v5.c75](https://indike.org/pramana/ins.polity.kane-1930.v5.c75)

## Cites (1)

- [Ṛgvedasaṃhitā](https://indike.org/pramana/in.veda.samhita.rg.10.16) — Sanskrit

---
Source: [https://indike.org/pramana/ins.polity.kane-1930.v5.c75.16](https://indike.org/pramana/ins.polity.kane-1930.v5.c75.16) · Pramāṇa
