Alankarakaustubha (Vishveshvarabhatta) 3.p233

3.p233

'kāmo vimuñcati śarānatimātratīkṣṇānnirbhartsanāmabhidadhāti pikaḥ kalena | candro dadāti kiraṇairjvaladulmukāni mahyaṃ na sahyadayitāvirahavyathāya ||' iha sarvatra mahyamityasya saṃpradānatvam | 'śiṣyāya capeṭāṃ dadāti' ityādidarśanena bhāṣyakāramate saṃpradānatāyā anvarthatvānaṅgīkāreṇa sarvatra mukhyatvābhyupagamāt | apādānasya yathā mamaiva'niryānti tīkṣṇamakaradhvajabāṇadhārā abhyutpatanti ghanasārarajaḥpravāhāḥ | udyanti saṃtamasasaṃtatayaḥ samantātkānte nirantaramanantaritāddṛgantāt ||' atra sarvatra dṛgantasyāpādānatvam | saṃbandhino yathā'svāmyaṃ yasya nijaṃ jagatsu janiteṣvādau tataḥ pālanaṃ vyutpatteḥ karaṇaṃ hitāhitavidhivyādheḥ sasaṃbhāvanam | bhūtoktiḥ sahasā kṛpā nirupadhiryastattadarthātmakastasmai pūrvagurūttamāya jagatāmīśāya pitre namaḥ ||' yadyapi kārakapadasya vibhaktyarthadvārā kriyānvayini śaktatayā ṣaṣṭhyarthasya ca nāmārtha evānvayena kriyānvayavirahādyasyeti padasya na kārakatvam | tathāpi pālanādisamabhivyāhāre 'kartṛkarmaṇoḥ kṛti' iti ṣaṣṭhīvidhānāt tatra karmatvalakṣaṇāvaśyakatvena tasya kriyānvayādasyodāharaṇatvamaviruddham | adhikaraṇasya yathā'śabdagroupyante madhuramanilaiḥ kīcakāḥ pūryamāṇāḥ saṃraktābhistripuravijayo gīyate kiṃnarībhiḥ | nihlādī te muraja iva cetkandareṣu dhvaniḥ syātsaṃgītārtho nanu paśupatestatra bhāvī samagraḥ ||' ‘kāśmaryāḥ kṛtamālamudgatadalaṃ koyaṣṭikaṣṭīkate tīrāśmantakaśimbicumbitamukhā dhāvantyapaḥpūrṇikāḥ | dātyūhaistiniśasya koṭaravati skandhe nilīya sthitaṃ vīrunnīḍakapotakūjitamanukrandantyadhaḥ kukkuṭāḥ ||’