Rasacandrika p30

p30

iha mugdhā tāvadekaiva | madhyā-pragalbhedhīrādibhedena ṣaṭ, jyeṣṭhā-kaniṣṭhābhedena dvādaśeti trayodaśa svīyābhedāḥ | paroḍhā kanyakā ceti parakīyādvaividhyam | sāmānyā ekaiveti ṣoḍaśa bhedāḥ | tāsāṃ ca vakṣyamāṇairaṣṭabhirbhedairaṣṭāviṃśatyadhikaśataṃ bhedāḥ | pratyekamuttamādibhedatrayeṇa śatatrayaṃ caturaśītiśca bhedā bhavanti | taduktaṃ prācīnaiḥ"trayodaśavidhā svīyā dvividhā ca parāṅganā | ekā veśyā punaścāṣṭāvavasthābhedato matāḥ || punastā trividhāḥ sarvā uttamādhamamadhyamāḥ | itthaṃ śatatrayaṃ tāsāmaśītiścaturuttarā || jātikāḷavayovasthābhāvakandarpanāyakaiḥ | itarā apyasaṅkhyātā noktā vistarabhītitaḥ ||”