Rasasudhakara 3.234

3.234

bandho mṛduḥ sphuṭo miśra iti tredhā sa bhidyate
tatra mṛduvarṇabandhasya samatā yathā—
‘caraṇakamalakāntyā dehalīmarcayantī
kanakamayakavāṭaṃ pāṇinā kampayantī
kuvalayamayamakṣṇā toraṇaṃ pūrayantī
varatanuriyamāste mandirasyeva lakṣmīḥ ||’
atra mṛduvarṇaprāyabandhasya nirvyūḍhatvānmṛdubandhasamatā
sphuṭabandhasamatā yathā—
‘madhurayā madhubodhitamādhavīmadhusamṛddhisamedhitamedhayā
madhukarāṅganayā muhurunmadadhvanibhṛtā nibhṛtākṣaramujjage ||’
atra sphuṭavarṇaprāyabandhasya nirvyūḍhatvāt samatā | miśrabandhasamatā yathā ‘utphullagaṇḍayugamudgatamandahāsam’ ityatra
miśrībhūtamṛdusphuṭavarṇabandhasya nirvyūḍhatvānmiśrabandhasamatā
atha mādhurya—
tanmādhuryaṃ bhaved yatra śabde'rthe ca sphuṭo rasaḥ