Rasasudhakara 3.267

3.267

mantro nayaprayogaḥ | tasya śaktyā yathā mudrārākṣase
cāṇakyena śatrusahāyānāṃ bhedanāt saṃṅghātyaḥ | arthaśaktyā
yathā mahābhārate ādiparvaṇi devaistilottamālakṣaṇenārthena sundopasundayoratisnigdhayorbhednāt saṅghātyaḥ
daivaśaktyā yathā mahāvīracarite— ‘mālyavān —
hā vatsāḥ! kharadūṣaṇaprabhṛtayo vadhyāḥ stha pāpasya me
hā hā vatsa! vibhīṣaṇa! tvamapi me kāryeṇa heyaḥ sthitaḥ
hā mahadvatsala! vatsa! rāvaṇa! mahat paśyāmi te saṅkaṭaṃ
vatse! kekasi! hā hatāsi na cirāt trīn putrakān paśyāsi ||’
atra rāghavānukūladaivamohitena mālyavatā kharadūṣaṇatriśirasāṃ bhedaḥ saṃvihita iti saṅghātyaḥ
pauruṣād yathā—
‘atha bhūtāni karṇaghnaśarebhyastatra tatrasuḥ
bheje diśaḥ parityaktamaheṣvāsā ca sā camūḥ ||’
atrārjunaparākrameṇa pramathapalāyanakathanāt saṃṅghātyaḥ
atha parivartakaḥ —
pūrvoktasya ca kāryasya parityāgena yad bhavet
kāryāntarasvīkaraṇaṃ jñeyaḥ sa parivartakaḥ