Rasasudhakara 3.305

3.305

svedāpanayavātecchāvyajanagrahaṇādayaḥ
nidāghād yathā —
‘karairupāttān kamalotkarebhyo nijairvivasvān vikacodarebhyaḥ
tasyā nicikṣepa mukhāravinde svedāpadeśānmakarandavindūn ||’
harṣād yathā —
‘sakhyā kṛtānujñamupetya paścād
dhūnvan śirojān karajaiḥ priyāyāḥ
anāīyannānanavāyunāpi
svinnāntarānaiva cakāra kaścit ||’
atrobhayoranyonyasparśaharṣeṇa svedaḥ
vyāyāmād yathā —
‘gatvodrekaṃ jaghanapuline ruddhamadhyapradeśaḥ
krāmannūrudrumabhujalatāḥ pūrṇanābhihradāntaḥ
ullaṅghyoccaiḥ kucataṭabhuvaṃ plāvayan romakūpān
svedāpūro yuvatisaritāṃ prāpa gaṇḍasthalāni ||’
atra kusumāpacayaparyaṭanena vyāyāmena svedaḥ | śramo
ratyādipariśrāntiḥ | tasmād yathā —
‘mañceṣu paiñceṣusamākulānāṃ
vātāya vātāyanasaṃśritānām
svinnāni khinnāni mukhānyaśaṃsan
sambhogamambhoruhalocanānām ||’
ādiśabdād gītanṛttaśrāntyādayaḥ
‘gītāntareṣu śramavārileśaiḥ
kiñcitsamucchvāsitapatralekham
puṣpāsavāghūrṇitanetraśobhaṃ
priyāmukhaṃ kimpuruṣaścucumba ||’
‘cārunṛttavigame ca tanmukhaṃ svedabhinnatilakaṃ pariśramāt
premadattavadanānilaṃ pibannatyajīvadalakāmareśvarau ||’
‘dadhat sandhyāruṇavyomasphurattārānukāriṇīḥ
dviṣaddveṣoparaktāṅgasaṅginīḥ svedavipruṣaḥ ||’
‘kṛtāntajihvākuṭilāṃ kṛpāṇīṃ dṛṣṭvā yadīyāṃ trasatāmarīṇām
svedodayaścetasi sañcitānāṃ mānoṣmaṇāmātanute praśāntim ||’
romāñco vismayotsāhaharṣādyaistatra vikriyāḥ