Rasasudhakara 4.152

4.152

manturaparādhaḥ | tasmād yathā —
'vibhūṣaṇapratyupahārahasta̍ṃ viśāmpatistaṃ praṇataṃ nirīkṣya
sauparṇamastraṃ pratisañjahāra prahveṣvanirbandharuṣo hi santaḥ ||'
ghoradarśanād yathā —
'parājitaścolabhayena pāṇḍyaḥ
palāyamāno diśi dakṣiṇasyām
samākulo vārinidhiṃ vigāhya
setucchidaṃ dāśarathiṃ nininda ||'
atra yuddhasaṃrambhabhīmasya colasya darśanāt pāṇḍyasya
bhayaṃ palāyanādibhirvyajyate
ghoraśravaṇād yathā'śrutvā nissāṇarāṇaṃ raṇabhuvi bhavato mādhavakṣmādhavendra !
prāpya pratyarthivīrāḥ kulaśikhariguhāṃ gūḍhagāḍhāndhakārām
līnā lūnapratāpā nijakaṭakamaṇiśreṇikāntiprakarṣasraṣṭāraṃ naṣṭadhairyāḥ kamalabhuvamaho hanta nindanti mandam||'
atilaukikāt kāraṇāduttamasya yathā'aśaknuvan soḍhumadhīralocanaḥ
sahasraraśmeriva yasya darśanam
praviśya hemādriguhāgṛhantaraṃ
nināya bibhyad divasāni kauśikaḥ ||'
atra varṇanīyatayottamaṃ rāvaṇaṃ prati devendrasya madhyamatvaṃ na śaṅkanīyam | yataḥ prakṛtireva kāraṇaṃ puṃsāmuttamatve,
na varṇanā | tathāsati 'priyeṇa tasyānaparādhabādhitā' ityādinaugryādibhāvakathanamuttamasya rāvaṇasya nocitaṃ syāt | tasmāduttamaprakṛterapi devendrasya lokottaravarapradānabhīṣaṇād rāvaṇād
bhayamutpadyate | athottamasya hetujabhayānaṅgīkāre'vidrāṇe vittanāthe savitari tarale jātaśaṅke śaśāṅke
vaikuṇṭhe kuṇṭhagarbe dravati maghavati klāntakāntau kṛtānte
abrahmaṇyaṃ bruvāṇe viyati śatadhṛtāvuddhṛtaikāgrahaste
pāyādvaḥ kālakūṭaṃ jhaṭiti kavalayan līlayā nīlakaṇṭhaḥ ||'
ityatra vidrāvatāralyādibhirudghoṣitasya draviṇanāthasavitrādigatabhayasyāpalāpaḥ kathamabhidheyaḥ | tadapalāpe'pi kālakūṭabhakṣaṇasya sukaratvāt tatkāryanirvahaṇe sphītasya nīlakaṇṭhaprabhāvotkarṣasya kathaṃ mastakonnamanaṃ syāt
hetujāditare prokte bhaye soḍḍalasūnunā
akṛtrimaṃ tvattamagaṃ gurvādīn pratyaivavāstavam