Rasasudhakara 4.79

4.79

manorathasya lābhena yathā —
'nivātapadmastimitena cakṣuṣā
nṛpasya kāntaṃ pibantaḥ sutānanam
mahodadheḥ pūra ivendudarśanād
guruḥ praharṣaḥ prababhūva nātmani ||'
yogyavastusiddhyā yathā —
'sa rāgavānaruṇatalena pāṇinā
pulomajāpadatalayāvakairiva
hariṃ hariḥ stanitagabhīrahreṣitaṃ
mukhe nirāmiśakaṭhine mamārja tam ||'
atroccaiḥśravaso lābhena devendrasya harṣaḥ
mitrasaṅgamād yathā—
'ibhakumbhatuṅgakaṭhinetaretarastanabhāradūravinivāritodarāḥ
pariphullagaṇḍayugalāḥ parasparaṃ parirebhire kurukarakauravastriyaḥ ||'
mitrasaṅgamaḥ pūjyādisaṅgamādīnāmupalakṣaṇam | pūjyasaṅgamena yathā—
'yugāntakālapratisaṃhṛtātmano jaganti yasyāṃ savikāsamāsata
tanau mamustatra na kaiṭabhadviṣastapodhanābhyāgamasambhavā mudaḥ||'
devaprasādād yathā—
'tasyāḥ prasannendumukhaḥ prasādaṃ
gururnṛpāṇāṃ gurave nivedya
praharṣacihnānumitaṃ priyāyai
śaśaṃsa vācā punaruktayeva ||'
ādiśabdād gururājaprasādādayaḥ | guruprasādād yathā—
'asmadgotramahattaraḥ ṛtubhujāmadyāgramādyo raviryajvāno vayamadya te bhagavatī bhūradya rājanvatī
adya svaṃ bahumanyate sahacarairasmābhirākhaṇḍalo
yenaitāvadarundhatīpatirapi svenānugṛhṇāti naḥ ||'
rājaprasādād yathā—
'prītirasya dadato'bhavat tathā
yena tatpriyacikīrṣavo nṛpāḥ
sparśi tairadhikamāgamanmudaṃ
nādhiveśmanihitairupāyanaiḥ ||'
kālākṣamatvamautsukyamiṣṭavastuviyogataḥ
taddarśanād ramyavastudidṛkṣādeśca tatkriyāḥ