Rasasudhakara 4.86

4.86

parasaubhāgyena yathā -
'mā garvamudvaha kapolatale cakāsti
kāntasvahastalikhitā mama mañjarīti
anyāpi kiṃ na sakhi! bhājanamīdṛśānāṃ
vairī na ced bhavati vepathurantarāyaḥ ||'
parasampattyā yathā -
'lokopakāriṇī lakṣmīḥ satāṃ vimalacetasām
tathāpi tāṃ vilokyaiva dūyante duṣṭacetasaḥ ||'
paravidyayā yathā -
'pratyakṣādipramāsiddhaiviruddhārthābhidhāyinaḥ
vedāntā yadi śāstrāṇi bauddhaiḥ kimaparādhyate ||'
yathā vā—
'guṇādhāre gaure yaśasi paripūrṇe vilasati
pratāpe cāmitrān dahati tava śiṅgakṣitipate !
naivaiva dravyāṇītyakathayadaho mūḍhatamadhīścaturdhā tejo'pi vyabhajata kaṇādo munirapi ||'
paraśauryeṇa yathā —
'strīmātraṃ nanu tāṭakā bhṛgusuto rāmastu vipraḥ śucirmārīco mṛga eva bhītibhavanaṃ vālī punarvāṃnaraḥ
bhoḥ kākutstha! vikatthase kimathavā vīro jitaḥ kastvayā
dordarpastu tathāpi te yadi samaṃ kodaṇḍamāropaya
atha cāpalaṃ —
rāgadveṣādibhiścicattalāghavaṃ cāpalaṃ bhavet
ceṣṭāstatrāvicāreṇa parirambhāvalambane