Rasasudhakara 5.108

5.108

yathā mālavikāgnimitre—‘vidūṣakaḥ — (dṛṣṭvā) hī
hī sīhupāṇuvvejidassa macchaṇḍiā uvaṇadā| rājā — aye
kimetat | vidūṣakaḥ — esā ṇādiparikliṭṭhavesā ūsuavaaṇā adūre vaṭṭai| rājā — kiṃ mālavikā | vidūṣakaḥ —
ahaiṃ | rājā — śakyamidānīṃ jīvitamavalambitum’ ityatrerāvatīsaṅketaṃ gacchato rājño mālavikādarśanasiddhiracintitā siddhiḥ
atha prasiddhiḥ —
prasiddhirlokavikhyātairvākyairarthaprasādhanam
yathā śākuntale
‘sarasijamanuviddhaṃ śaivalenāpi ramyaṃ
malinamapi himāṃśorlakṣma lakṣmīṃ tanoti
iyamadhikamanojñā valkalenāpi tanvī
kimiva hi madhurāṇāṃ maṇḍanaṃ nākṛtīnām||’
atra śaivalādyanurodhe'pi ramaṇīyatayā prasiddhānāṃ kathanena śakuntalāmanojñatāsādhanaṃ prasiddhiḥ
atha dākṣiṇyaṃ —
cintānuvartanaṃ yatra tad dākṣiṇyamitīritam