Rasasudhakara 5.156

5.156

sūtriṇo vākyamarthaṃ vā svetivṛttasamaṃ yathā
svīkṛtya praviśet pātraṃ kathoddhāto dvidhā mataḥ
tatra vākyena kathoddhāto yathā ratnāvalyāṃ‘dvīpādanyasmādapi madhyādapi jalanidherdiśo'pyantāt
ānīya jhaṭiti ghaṭayati vidhirabhimatamābhimukhībhūtaḥ||’
atra ca vākyena kathoddhātaḥ
arthena yathā veṇīsaṃhāre‘nirvāṇavairadahanāḥ praśamādarīṇāṃ
nandantu pāṇḍutanayāḥ saha mādhavena
raktaprasādhitabhuvaḥ kṣatavigrahāśca
svasthā bhavantu dhṛtarāṣṭrasutāḥ sabhṛtyāḥ ||’
atrottarārdhe sūtradhāreṇa dhārtarāṣṭrāṇāṃ svargasthitiānirupadravalakṣaṇayorarthayorvivakṣitayoḥ satorbhīmena ‘svasthā bhavantu
mayi jīvati dhārtarāṣṭrāḥ’ iti nirupadravalakṣaṇasyaivārthaviśeṣasya grahaṇena praveśaḥ kṛta ityayamarthena kathoddhātaḥ
atha pravarttakaḥ —
ākṣiptaḥ kālasāmyena praveśaḥ syāt pravarttakaḥ
yathā priyadarśikāyāṃ —
'ghanabandhananirmuktaḥ kanyāgrahaṇāt tulāṃ prāpya
raviradhigatasvadhāmā pratapati kila vatsarāja iva ||'
atra śaratkālasāmānyena vatsarājasyākṣepapraveśāt
pravarttakaḥ
atha prayogātiśayaḥ —
eṣo'yamityupakṣepāt sūtradhāraprayogataḥ