Rasasudhakara 5.89

5.89

yathā ratnāvalyāṃ—'rājā - (āsanādavatīrya) vayasya !
eṣa brahmā saroje rajanikarakalāśekharaḥ śaṅkaro'yaṃ
dorbhirdaityāntako'yaṃ sadhanurasigadācakracihnaiścaturbhiḥ
eṣo'pyairāvatasthastridaśapatiramī devi ! devāstathaite
nṛtyanti vyomni caitāḥ skhalacaraṇaraṇannūpurā divyanāryaḥ ||'
ityatra aindrajālikaṃ māyā
atha saṃvṛtiḥsaṃvṛtiḥ svayamuktasya svayaṃ pracchādanaṃ bhavet
yathā śākuntale - 'rājā- (svagatam) aticapalo'yaṃ
vaṭuḥ kadācidimāṃ kathāmantaḥpurebhyaḥ kathayet | bhavatvevaṃ tāvat
kva vayaṃ kva parokṣamanmatho mṛgaśāvaiḥ samamedhito janaḥ
parihāsavijalpitaṃ sakhe ! paramārthena na gṛhyatāṃ vacaḥ ||'
atra duṣṣantena svayamuktasya śakuntalāprasaṅgasya svayaṃ
pracchādanaṃ saṃvṛtiḥ
atha bhrāntiḥ -
bhrāntirviparyayajñānaṃ prasaṅgasyāviniścayāt