Kalasara 13.p28

13.p28

yamaḥ,– ekādaśāhe pretasya yasya cotsṛjyate vṛṣaḥ | mucyate pretalokāt sa svargalokañca gacchati || vahnipurāṇe, - ye pretabhāvamāpannā ye cānye śrāddhavarjitāḥ| vṛṣotsargeṇa te sarve gacchanti paramāṃ gatim || tadakaraṇe pratyavāyo'nyatra,ekādaśāhe pretasya yadi notsṛjyate vṛṣaḥ| pretatvaṃ susthiraṃ tasya dattaiḥ śrāddhaśatairapi || śrutirapi,- na karoti vṛṣotsargaṃ sutīrthe vā jalāñjalim | na prayacchati yaḥ putraḥ pituruccāra eva saḥ || ekādaśāhe daivādakaraṇe, āgneye, - ekādaśāhe pretasya yadi notsṛjyate vṛṣaḥ| mucyate pretabhāvātsa ṣaṇmāse'pyābdikādiṣu || tatrāpyasāmarthye, bhaviṣyottare, - kārttikyāmathavā māghyāmayane vā yudhiṣṭhira | caitryāmatha tṛtīyāyāṃ vaiśākhyāṃ dvādaśe'hni vā || atra dvādaśāhoktiḥ| dvādaśāhe vṛṣotsargaḥ karttavyaḥ kṣatriyeṇa tu | iti vākyāt kṣatriyaviṣaya eveti cet, na | dvādaśāhe kṣatriyāśaucasya sattvāt | tarhi tadvacanasya kā gatiriti cet | tasya prāmāṇye kṣatriyasya daśāhāśaucapakṣāśrayaṇāditi samādheyam | viṣṇusmṛtau tu āśvayujyāṃ vā ityuktam | punaryamaḥ, - eṣṭavyā bahavaḥ putrāstatraiko'pi gayāṃ vrajet | yajeta vāśvamedhena nīlaṃ vā vṛṣamutsṛjet || lohito yastu varṇena śiraḥ pucchastu pāṇḍaraḥ | tāmraḥ khuraviṣāṇābhyāṃ sa nīlo vṛṣa ucyate