Kalasara 14.p6

14.p6

"pretānāmiha sarveṣāṃ" iti pūrvoktaśātātapoktyā pitṛtvaprāptyanantarameva sapiṇḍanasya niṣiddhatvāt | atha dvādaśamāsasyādhimāsatve sapiṇḍanavicāraḥ| tatra, - asaṃkrānte hi karttavyamābdikaṃ prathamaṃ dvijaiḥ| iti hārītoktabahuvacanaiḥ pūrvoktamalamāsallikhitavyavasthāyāṃ (1) dvādaśamāsasyādhimāsatve'pi tadadhimāsikadvādaśamāsavihitaśrāddhasapiṇḍanāni kāryāṇyeva | īdṛśe viṣaye śuddhe trayodaśe māsi vārṣikaśrāddhaṃ punaḥ kāryyam | ābdikaṃ prathamaṃ yasya prakurvīta malonmuce | trayodaśe tu samprāpte kurvīta punarābdikam || iti vyāsokteḥ| evaṃ apakṛṣyābdamadhye sapiṇḍane kṛte'pi pūrṇe'bde punarābdikaśrāddhakaraṇam | atra yattu gauḍaiḥ tithitattvākāraiḥ,pūrṇe samvatsare śrāddhaṃ ṣoḍaśaṃ parikīrttitam | tenaiva ca sapiṇḍatvaṃ tenaivābdikamiṣyate || iti hemādridhṛtavākyāt pūrṇe'bde kriyamāṇāt śrāddhāt yathobhayaṃ nirvvahati, tathā apakṛṣṭasapiṇḍanādapi ubhayornirvvāhaḥ, na pūrṇe vatsare śrābdikāntaraṃ | gobhilena pūrṇe'bde sapiṇḍīkaraṇamabhidhāya ataūrddhaṃ samvatsare samvatsare pretāyānnaṃ dadyāt yasminnahani pretaḥ syāt iti sūtre ādyābdādūrddhaṃ sāmbatsarikavidhānācca, iti, tanna yuktisahaṃ