Kalasara 17.p26

17.p26

atha pradīpāmāvāsyāśrāddham | tacca nityaṃ phalāśravaṇāt | kasmiṃścidvākye phalokteḥ kāmyamapi | vākyaratnāvalyām,tulāṃ prayāgate sūryye amāvāsyātithirbhavet | upāstasamaye dīpan pitṝn dadyācchuciḥ śuciḥ || śuciḥ śuciriti divopoḍhitaḥ iti smṛsiratnamālāyām | tulāsthe bhāskare darśe śrāddhaṃ kṛtvā parāhnikam | dīpadānaṃ tataḥ kuryyādupāstasamaye ravau || upāstasamayaḥ trimuhūrttātmakaḥ pradoṣakālaḥ | tathāca jyotiṣe,tulāsaṃsthe sahasrāṃśau pradoṣe bhūtadarśayoḥ | ulkāhastā narāḥ kuryuḥ pitṝṇāṃ mārgadarśanam || iti | tacca pūrbbedyurdivā amāvāsyāyā prabhāve'pi upāstasamaye tatsamvandhe pradīpadānaṃ tatraiva | darśaśrāddhādikaṃ tu paradine | amā vasati yadrātrau tatra dīpaṃ pradāpayet | tarpaṇaṃ piṇḍadānaṃ ca śrāddhaṃ caivāpare'hani || iti smṛteḥ | yadobhayadine pradoṣavyāptiḥ, tadā paradine dīpadānam | daṇḍaike rajanīyoge darśasya syātpare'hani | tadā vihāya pūrbbedyuḥ paredyuḥ sukharātrikā || iti jyotiṣavacanāt | ubhayadine pradoṣavyāptyabhāve'pi paraca, pūrbboktapārvvaṇānurodhāt | bhūtāhe ye prakurvvanti ulkāgrahaṇamacetasaḥ | nirāśāḥ pitaro yānti śāpaṃ datvā sudāruṇam