Kalasara 18.p5

18.p5

iti pārvvaṇaprasaṅgāt nityanaimittikaśrāddhāni uktāni | atha goṣṭhīśrāddham| tatsvarūpamādau vyākhyātaṃ | tatra kālo amāvāsyetarapārvvaṇakālaḥ tīrthaprāptyādikālo vā | atha śuddhyarthaśrāddham | tatra amāvāsyetarapārvvaṇaśrāddhakālaḥ | karmmāṅgaṃ śrāddhaṃ tasya kālo •vidhiśca vṛddhiśrāddhavaditi pūrvvamuktameva | atha daivikaśrāddham | tatra pūrvāhnaḥ karmmakālaḥ | pūrvāhne daivikaṃ karmma aparāhne tu paitṛkam | ekoddiṣṭaṃ tu madhyāhne prātarvṛddhinimittakam || iti mātsyokteḥ, pūrvāhne daivikaṃ śrāddhaṃ kāryyamabhyudayārthinā | iti śātātapokteśca, atha yātrānuśrāddham | tasya yātrāpūrvvakālīnatvāt na kālaviśeṣāpekṣā | tīrthaprasaṅgāt tīrthayānādividhirucyate | mahābhārate,– agniṣṭomādiniyamairiṣṭvā vipuladakṣiṇaiḥ | na tatphalamavāpnoti tīrthābhigamanena yat || tathā,– yathā śarīrasyoddeśāḥ kecinmedhyatamāḥ smṛtāḥ | tathā pṛthivyāmuddeśāḥ kecitpuṇyatamāḥ smṛtāḥ || prabhāvādadbhutāt bhūmeḥ salilasya ca tejasā | parigrahānmunīnāṃ ca tīrthānāṃ puṇyatā smṛtā || tīrthapadena kṣetrasyāpyabhidheyatvāt puruṣottamakṣetrakurukṣetragayādiṣu tīrthayātrāphalaṃ tadavasthātadānaśrāddhādiphalaṃ ca sarvvaṃ sādhāraṇameva | tathāca kurukṣetraprastāve mahābhārate,– brahmakṣetraṃ mahāpuṇyamabhigacchanti bhārata | manasāpyabhikāmasya kurukṣetraṃ yudhiṣṭhira || pāpāni ca vinaśyanti sūryyalokaṃ(1) sa gacchati | mātsye,– deveśi sarvvaguhyānāṃ sthānaṃ priyatamaṃ mama | madbhaktāstatra gacchanti viṣṇubhaktāstathaiva ca || tathā,– tatra ceṣṭaṃ kṛtaṃ dattaṃ tapastaptaṃ kṛtaṃ ca yat | sarvvamakṣayamevāsminviṣṇurme na saṃśayaḥ || evamanyānyapi vistarabhayānna likhitāni | ataeva kalpatarau tīrthakāṇḍe vahūni kṣetrāṇi likhitāni | tīrthādisnānādiphalāt pṛthageva taduddeśayātrāyāmapi phalam