Kalasara 18.p9

18.p9

brāhme, — gaṅgāditīrtheṣu vasanti matsyādevālaye pakṣisaṃghāśca nityam | bhāvojjhitāste na phalaṃ labhante tīrthācca devāyatanācca mukhyāt || bhāvaṃ tato hṛtkamale nidhāya tīrthāni seveta samāhitātmā | akopanaśca rājendra satyavādī jitendriyaḥ | ātmopamaśca bhūteṣu sa tīrthaphalamaśnute || punaḥ śaṅkhena, — yasya hastau ca pādau ca manaścaiva susaṃyatam | vidyā tapaśca kīrttiśca sa tīrthaphalamaśnute || iti yaduktaṃ tat tīrthasnānādyaṅgam yātrāprakaraṇamantareṇai vokteḥ| kīrttiyuktasya tīrthayātrāyāṃ tīrthasnānādau cādhikārakathanāt abhiśastasyaṃ na tīrthaphalādhikāraḥ, kevalamabhiśastatvadoṣanivṛttiḥ syādeva | tathāca vāyavīye— tīrthānyanusaran vīra śraddadhānaḥ samāhitaḥ | kṛtapāpo viśuddhyeta kiṃ punaḥ śuddhikarmakṛt || tiryagyoniṃ na gacchecca kudeśe naivaṃ jāyate | svarge bhavati vai vipro mokṣopāyaṃ ca vindati || aśraddadhānaḥ pāpātmā nāstiko'cchinnasaṃśayaḥ | hetuniṣṭhaśca pañcaite na tīrthaphalabhāginaḥ || śaṅgeo'pi,- nṛṇāṃ pāpakṛtāṃ tīrthe bhavet pāpasya saṃcayaḥ | yathoktaphaladaṃ tīrthaṃ bhavecchāntātmanāṃ nṛṇām || brahmacāriprabhṛtīnāṃ tīrthayātrāyāṃ viśeṣo'sti brāhma,yā tīrthayātrā kathitā munīndraiḥ, kṛtā prayuktāpyanumoditā ca | tāṃ brahmacārī vidhivat karoti susaṃyato guruṇā cānuyuktaḥ || sarvasvanāśe tvathavā nṛpastu, sa brāhmaṇānagrata eva kṛtvā | yajñādhikāre'pyathavā nivṛtte, viprastu tīrthāni paribhrameta || tīrthe phalaṃ yajñaphalaṃ hi yasmāt, proktaṃ munīndrairamaraprabhāvaiḥ | yadyasti yajñe'pyadhikāritāsya, varaṃ gṛhaṃ gṛhadharmāśca sarve || evaṃ gṛhasthāśramasaṃsthitasya, tīrthe gatiḥ pūrvatarairniṣiddhā | sarvāṇi tīrthānyapi cāgnihotratulyāni naiveti vayaṃ vadāmaḥ