Kalasara 6.p3

6.p3

tathāca,—gāvo mahiṣyaḥ chāgādyāḥ pūjyāḥ śobhyāstadā dine | pūjanaṃ kecidicchanti śrāvaṇyāṃ tu gavāḍhīnām || tathā,— śrāvaṇī pūrṇimā yatra madhyāhnavyāpinī yadi | utthāne baladevasya nandāviddhāṃ tu varjayet || kharvā darpā tathā hiṃsā nandāyāṃ paurṇamīyutā | utthāpanaṃ śaurapāṇeḥ kārayet pūrvavāsare || yāmadvayaṃ caturharkṣāṃ paurṇamāsyāṃ dviyāmakam | pūrve'hani baleḥ pūjā paśuvandāpanā tathā || nandāyukapaurṇamāsyāṃ kṛta utthāpane baleḥ | tatra rogī bhavedvipro gāvo naśyantyanekadhā || paurṇamāsyāṃ sanandāyāṃ yatra cotthāpyate balaḥ | gavāṃ tatra bhavedrogo durbhikṣañca tadā bhavet || pādme,— “śrāvaṇī durganavamī” ityādi | atra madhyāhnasya karmakālatvaṃ sphuṭam | tatra dvaidhe sarveṣu pakṣeṣu pūrvadina eva | nandāyogasya niṣiddhatvāt, kevalaṃ paradina eva madhyāhnavyāptau paradine kāryyam | pūrvedyuḥ karmakāle tadvyāptyabhāvāt | tatra pūjānuṣṭhānaṃ tu raudratvādaparāhna iti kecit | tanna | sarvadevānāṃ lagnakāla eva pūjāvidhānāt | kintu madhyāhne pūjāyā asambhave raudratvādaparāhne karaṇe'pi na doṣaḥ || upākarmakālaḥ | yājñavalkyaḥ,—adhyāyānāmupākarma śrāvaṇyāṃ śravaṇena vā | hastenauṣadhabhāve vā pañcamyāṃ śravaṇasya vā || pauṣamāsasya rauhiṇyāmaṣṭakāyāmathāpi vā | jalāmte chandasāṃ kuryyādutsargaṃ vidhivadbahiḥ