Prashnajnana (Brahmarka) 29

29

“vilagne ṣaṣṭhapaḥ pāpo janmarāśiṃ nirīkṣate
rogiṇastasya maraṇaṃ niścayena vadedbudhaḥ
caturthāṣṭamage candre pāpamadhyagate'pi vā
mṛtiḥ syādbalasaṃyukte saumyadṛṣṭyā cirātsukham
vidhau lagne smare bhānau rogī yāti yamālayam
praśne krūragrahe lagne rogavṛddhiścikitsakāt
tathā lagnagate saumye vaidyoktamamṛtaṃ vacaḥ
lagnaṃ vaidyo dyunaṃ vyādhiḥ khaṃ rogī turyamauṣadham
rogiṇo bhiṣajo maitrī maitrī bheṣajarogayoḥ
vyādherupaśamo vācyaḥ prakopaḥ śātrave tayoḥ
lagnanāthe ca sabale kendrasaṃsthe śubhagrahe
uccage vā trikoṇe vā rogī jīvati niścayam
ekaḥ śubho balī lagne trāyate rogapīḍitam
saumyā dharmārilābhasthāstṛtīyasthā gadāpahāḥ ||”
“vahyaṅkadvādaśe ṣaṣṭhe lagnātpāpagraho yadi
hato gadairjalaiḥ śastraistasya doṣaḥ kulodbhavaḥ
devasya meṣe gavi pitṛpakṣe ākāśadevyā mithune'tha karke
syācchākinī kṣetrapatistu siṃhe striyāṃ kulārhā ca tule tu mātuḥ
nāgastvalau yakṣapatirdhanuṣye nakre'mbudevyāstu ghaṭe tu yakṣī
jhaṣe kulopāsitadaivatasya doṣo bhaveddharmabahiṣkṛtāya
pretāśca rāhau pitaraḥ surejye candre'mbudevyastapane'pi devyaḥ
svagotradevyaśca śanau budhe ca bhavanti bhūtā vyayarandhrasaṃsthe
śākinya āre bhṛguje'mbudevyo gṛhṇanti martyaṃ vimukhaṃ mukundāt
svarkṣoccage vīryayute ca sādhyāścandre ca nīce vibale na sādhyāḥ
kendrasthairbalibhiḥ pāpairasādhyā devatāgaṇāḥ
saumyagrahaiśca kendrasthaiḥ sādhyā mantrastavārcanaiḥ
“kaṇṭakāṣṭatrikoṇasthāḥ śubhā upacaye śaśī
lagne ca śubhasandṛṣṭe rogī rogādvimucyate ||”
‘rogasthānādbhavèdastè pāpakheṭayute'pi vā
tatṣaṣṭhe candrasaṃyukte maraṇaṃ rogiṇāṃ dhruvam
ārūḍhānmaraṇasthānaṃ tasmādaṣṭamataḥ śaśī
pāpāḥ paśyanti cenmṛtyuṃ rogiṇāṃ kathayetsudhīḥ
tṛtīye bhānusaṃyukte daśame pāpasaṃyute
daśāhānmaraṇaṃ brūyācchukrajīvau tṛtīyagau
saptāhānmaraṇaṃ brūyādrogiṇāmiti buddhimān
udaye caturaśre vā pāpe tvaṣṭadinānmṛtiḥ
lagnadvitīyagāḥ pāpāścaturdaśadinānmṛtiḥ
jāmitropacayagataḥ śītāṃśurjīvavīkṣitaḥ kurute
strīlābhaṃ pāpayuto'valokito vā'pi tannāśam