Matsya 165
Matsya 165
- Language
- Sanskrit
Contents
- 165.28 — 1 part
165.1
cha || || ṛṣaya ūcuḥ || || kathitaṃ narasiṃhasya
māhātmyaṃ vistareṇa ca || punastasyaiva māhātmyamanyādvistarato vada
165.2
padmarūpamabhūdetat kathaṃ hemamayaṃ jagat || kathañca vaiṣṇavī sṛṣṭiḥ
padmamadhye'bhavatpurā
165.3
sūta uvāca || || śrutvā ca narasiṃhasya māhātmyaṃ ravinandanaḥ || vismayotphullanayanaḥ punaḥ papraccha keśavam
165.4
manuruvāca || || kathaṃ pādme mahākalpe tava padmamayaṃ jagat || jalārṇavagatasyeha nābhau jātaṃ janārddana
165.5
prabhāvātpadmanābhasya svapataḥ sāga
rāmbhasi || puṣkare ca kathaṃ bhūtā devāḥ sarṣigaṇāḥ purā
165.6
etamākhyāhi nikhilaṃ yogaṃ yogavidāṃ pate || śṛṇvatastasya me kīrttiṃ na tṛptirupajāyate
165.7
kiyatā caiva kālena śete vai puruṣottamaḥ || kiyantaṃ vā svapiti ca ko'sya kālasya sambhavaḥ
165.8
kiyatā vātha kālena hyuttiṣṭhati mahā
yaśāḥ || kathañcotthāya bhagavānsṛjate nikhilaṃ jagat
165.9
ke prajāpatayastāvadāsanpūrvvaṃ mahāmune || kathaṃ nirmmitavāṃścaiva citraṃ lokaṃ sanātanam
165.10
kathamekārṇave śūnye naṣṭasthāvarajaṅgame || dagdhadevāsuranare pranaṣṭoragarākṣase
165.11
naṣṭānilānale loke naṣṭākāśamahītale || kevalaṃ gahanībhūte mahābhūta
viparyyaye
165.12
virbhurmahābhūtapatirmahātejā mahākṛtiḥ || āste suravaraśreṣṭho vidhimāsthāya yogavit
165.13
śṛṇuyāṃ parayā bhaktyā brahmanne
tadaśeṣataḥ || vaktumarhasi dharmiṣṭha yaśo nārāyaṇātmakam
165.14
śraddhayā copaviṣṭānāṃ bhagavanvaktumarhasi
165.15
matsya uvāca || || nārāyaṇasya
yaśasaḥ śravaṇe yā tava spṛhā || tadddvayānanyabhūtasya nyāyyaṃ ravikularṣabha
165.16
śṛṇuṣvādipurāṇeṣu vedebhyaśca yathā śrutam || brāhmaṇānāñca vadatāṃ śrutvā
vai sumahātmanām
165.17
yathā ca tapasā dṛṣṭvā bṛhaspatisamadyutiḥ || parāśarasutaḥ śrīmāngurudvaipāyano'bravīt
165.18
tatte'haṃ kathayiṣyāmi yathāśakti
yathāśruti || yadvijñātuṃ mayā śakyamṛṣimātreṇa sattamāḥ
165.19
kaḥ samutsahate jñātuṃ paraṃ nārāyaṇatmakam || viśvāyanaśca yadgaṅgā na vedayati tattvataḥ
165.20
tatkarmma viśvavedānāṃ tadrahasyaṃ maharṣiṇām || tamijyaṃ sarvvayajñānāṃ tattattvaṃ sarvvadarśinām || tadadhyātmavidāṃ cintyaṃ narakañca vikarmmiṇām
165.21
adhidaivañca yaddaivamadhiyajñaṃ susaṃjñitam || tadbhūtamadhibhūtañca tatparaṃ paramarṣiṇām
165.22
sa yajño vedanirdiṣṭastattapaḥ kavayo viduḥ || yaḥ karttā
kārako buddhimarnaḥ kṣetrajña eva ca
165.23
praṇavaḥ puruṣaḥ śāstā ekaśceti vibhāvyate || prāṇaḥ pañcavidhaścaiva dhruva akṣara eva ca
165.24
kālaḥ pākaśca
paktā ca draṣṭā svādhyāya eva ca || ucyate vividhairdevaiḥ sa evāyaṃ na tatparam
165.25
sa eva bhagavānsarvvaṃ karoti vikaroti ca || so'smānkārayate
sarvvānso'tyeti vyākulīkṛtān
165.26
yajāmahe tamevādyaṃ tamevecchāma nirvṛtāḥ || yo vaktā yacca vaktavyaṃ yaccāhaṃ tadravīmi vaḥ
165.27
śrūyate yacca vai śrāvyaṃ yaccānyatparijalpyate || yāḥ kathāścaiva varttante śrutayo vātha tatparāḥ || viśvaṃ viśvapatiryaśca sa tu nārāyaṇaḥ smṛtaḥ
165.28
yatsatyaṃ yadamṛtamakṣaraṃ paraṃ yadyadbhūtaṃ paramamidañca yadbhaviṣyat || yat kiñciccaramacaraṃ yadasti cānyat tat sarvvaṃ puruṣavaraḥ prabhuḥ purāṇaḥ
165.28.p1
iti śrīmātsye mahāpurāṇe padmodbhavaprādurbhāve catuḥṣaṣṭyadhikaśatatamo'dhyāyaḥ
Linked texts (1)
- Matsyapurāṇa — Vyāsa, Sanskrit