Pramāṇa · Search · About · API

Matsya 70

Matsya 70

Language
Sanskrit

Contents

70.1

cha || || brahmovāca || || varṇāśramāṇāṃ prabhavaḥ purāṇeṣu mayā śrutaḥ || sadācārasya bhagavandharmmaśāstraviniścayaḥ || paṇyastrīṇāṃ sadācāraṃ
śrotumicchāmi tattvataḥ

70.2

īśvara uvāca || || tasminneva yuge brahmansahasrāṇi tu ṣoḍaśa || vāsudevasya nārīṇāṃ bhaviṣyantyambujodbhava

70.3

tābhirvasantasamaye kokilālikulākule || puṣpite pavanotphullakahārasarasataṭe

70.4

nirbharapānagoṣṭhīṣu prasaktābhiralaṅkṛtaḥ || kuraṅganayanaḥ
śrīmānmālatīkṛtaśekharaḥ

70.5

gacchansamīpamārgeṇa sāmbaḥ parapurañjayaḥ || sākṣātkandarpo rūpeṇa sarvvābharaṇabhūṣitaḥ

70.6

anaṅgaśarataptābhiḥ
sābhilāṣamavekṣitaḥ || pravṛddho manmathastāsāṃ bhaviṣyati yadātmani

70.7

tadāvekṣya jagannāthaḥ sarvvato dhyānacakṣuṣā || śāpaṃ vakṣyati tāḥ sarvvā vo
hariṣyanti dasyavaḥ || matparokṣaṃ yataḥ kāmalaulyādīhagvidhaṃ kṛtam

70.8

tataḥ prasādito deva idaṃ vakṣyati śārṅgabhṛt || tābhiḥ śāpābhitaptābhirbhagavā
nbhūtabhāvanaḥ

70.9

uttārabhūtaṃ dāsatvaṃ samudrādbrāhmaṇapriyaḥ|| upadekṣyatyanantātmā bhāvikalyāṇakārakam

70.10

bhavatīnāmṛṣirdālbhyo yadvrataṃ kathayiṣyati
tadevottāraṇāyālaṃ dāsatve'pi bhaviṣyati || ityuktvā tāḥ pariṣvajya gato dvāravatīśvaraḥ

70.11

tataḥ kālena mahatā bhārāvataraṇe kṛte || nivṛtte
mausale tadvatkeśave divamāgate

70.12

śūnye yadukule sarvvaiścaurairapi jite'rjune || hṛtāsu kṛṣṇapatnīṣu dāsabhogyāsu cāmbudhau

70.13

tiṣṭhantīṣu
ca daurgatyasantaptāsu caturmukha || āgamiṣyati yogātmā dālbhyo nāma mahātapāḥ

70.14

tāstamarghyeṇa sampūjya praṇipatya punaḥ punaḥ
lālapyamānā bahuśo bāṣpaparyākulekṣaṇāḥ

70.15

smarantyo vipulānbhogāndivyamālyānulepanam || bharttāraṃ jagatāmīśamanantamaparājitam

70.16

divyabhāvāṃ tāñca purīṃ nānāratnagṛhāṇi ca || dvārakāvāsinaḥ sarvvāndevarūpānkumārakān || praśnamevaṃ kariṣyanti munerabhimukhaṃ sthitāḥ

70.17

striya ūcuḥ || || dasyubhirbhagavansarvvāḥ paribhuktā vayaṃ balāt || svadharmmāccyavate'smākamasminnaḥ śaraṇaṃ bhava

70.18

ādiṣṭo'si purā
brahmankeśavena ca dhīmatā || kasmādīdṛśena saṃyogaṃ prāpya veśyātvamāgatāḥ

70.19

veśyānāmapi yo dharmmastanno brūhi tapodhana || kathayiṣyatyata
stāsāṃ sa dālbhyaścaikitāyanaḥ

70.20

dālbhya uvāca || || jalakrīḍāvihāreṣu purā sarasi mānase || bhavatīnāñca sarvvāṃsāṃ nārado'bhyāśamā
gataḥ

70.21

hutāśanasutāḥ sarvvā bhavantyo'psarasaḥ purā || apraṇamyāvalepena paripṛṣṭaḥ sa yogavit || kathaṃ nārāyaṇo'smākaṃ bharttā syādityu
pādiśa

70.22

tasmādrūpradānaṃ vaḥ śāpaścāyamabhūtpurā || śayyādvayapradānena madhumādhavamāsayoḥ

70.23

suvarṇopaskarotsargādvādaśyāṃ śuklapakṣataḥ
bharttā nārāyaṇo nūnaṃ bhaviṣyatyanyajanmani

70.24

yadakṛtvā praṇāmaṃ me rūpasaubhāgyamatsarāt || paripṛṣṭo'smi tenāśu viyogo vo bhaviṣyati
caurairapahṛtāḥ sarvvā veśyātvaṃ samavāpsyatha

70.25

evaṃ nāradaśāpena keśavasya ca dhīmataḥ || veśyātvamāgatāḥ sarvvā bhavantyaḥ kāmamohitāḥ || idā
nīmapi yadvakṣye tacchṛṇudhvaṃ varāṅganāḥ

70.26

dālbhya uvāca || || purā devāsure yuddhe hateṣu śataśaḥ suraiḥ || dānavāsuradaityeṣu rākṣaseṣu tatastataḥ

70.27

teṣāṃ vrātasahasrāṇi śatānyapi ca yoṣitām || pariṇītāni yāni syurbalāddhṛtāni yāni vai || tāni sarvvāṇi deveśaḥ provāca
vadatāṃ varaḥ

70.28

indra uvāca || || veśyādharmmeṇa varttadhvamadhunā nṛpamandire || bhaktimatyo varārohāstathā devakuleṣu ca

70.30

rājānaḥ svāminastulyāḥ sutā vāpi ca tatsamāḥ || bhaviṣyati ca saubhāgyaṃ sarvvāsāmapi śaktitaḥ ||29||yaḥ kaścicchulkamādāya gṛhameṣyati vaḥ sadā
nidhanenopacāyyoṃ vaḥ sa tadānyatra dāmbhikāt

70.31

devatānāṃ pitṝṇāñca puṇyāhe samupasthite || gobhūhiraṇyadhānyāni pradeyāni svaśaktitaḥ
brāhmaṇānāṃ varārohāḥ kāryāṇi vacanāni ca

70.32

yaccāpyanyadrutaṃ samyagupadekṣyāmyahaṃ tataḥ || avicāreṇa sarvvābhiranuṣṭheyañca tatpunaḥ

70.33

saṃsārottāraṇāyālabhetadvedavido viduḥ || yadā sūryyadine hastaḥ puṣyo vātha punarvvasuḥ

70.34

bhavetsarvvauṣadhīsnānaṃ samyaṅnārī samācaret
tadā pañcaśarasyāpi sannidhātṛtvameṣyati || arccayetpuṇḍarīkākṣamaṅgasyānukīrttanaiḥ

70.35

kāmāya pādau sampūjya jaṅghe vai mohakāriṇe
meḍhraṃ kandarpanidhaye kaṭiṃ prītimate namaḥ

70.36

nābhiṃ saukhyasamudrāya rāmāya ca tathodaram || hṛdayaṃ hṛdayeśāya stanāvahlādakāriṇe

70.37

utkaṇṭhāyeti vaikuṇṭhamāsyamānandakāriṇe || vāmāṅgaṃ puṣpacāpāya puṣpabāṇāya dakṣiṇam

70.38

mānasāyeti vai mauliṃ vilolāyeti mūrddhajam
sarvātmane ca sarvāṅgaṃ devadevasya pūjayet

70.39

namaḥ śivāya śāntāya pāśāṅkuśadharāya ca || gadine pītavastrāya śaṅkhacakradharāya ca

70.40

namo nārāyaṇāyeti kāmadevātmane namaḥ || sarvvaśāntyai namaḥ prītyai namo ratyai namaḥ śriyai

70.41

namaḥ puṣṭyai namastuṣṭyai namaḥ sarvvārthasampade
evaṃ sampūjya deveśamanaṅgātmakamiśvaram || gandhairmālyaistathā dhūpairnaivedyena ca kāminī

70.42

tata āhūya dharmmajñaṃ brāhmaṇaṃ vedapāragam || avyaṅgāṅgavayavaṃ pūjya gandhapuṣpārccanādibhiḥ

70.43

śāleyataṇḍulaprasthaṃ ghṛtapātreṇa saṃyutam || tasmai viprāya sā dadyānmādhavaḥ prīyatāmiti

70.44

yatheṣṭāhārayuktaṃ vai tameva dvijasattamam || ratyarthaṃ kāmadevo'yamiti citte'vadhāryya tam

70.45

yadyadicchati viprendrastattatkuryyādvilāsinī
sarvvabhāvena cātmānamarpayetsmitabhāṣiṇī

70.46

evamādityavāreṇa sarvvametatsamācaret || taṇḍulaprasthadānañca yāvanmāsāstrayodaśa

70.47

tatastrayodaśe māsi samprāpte tasya bhāminī || viprasyopaskarairyuktāṃ śayyāṃ dadyādvilakṣaṇām

70.48

sopadhānakaviśrāmāṃ sāstarāvaraṇāṃ śubhām
pradīpopānahacchatrapādukāsanasaṃyutām

70.49

sapatnīkamalaṅkṛtya hemasūtrāṅgulīyakaiḥ || sūkṣmavastraiḥ sakaṭakairdhūpamālyānulepanaiḥ

70.50

kāmadevaṃ sapatnīkaṃ guḍakumbhopari sthitam || tāmrapātrāsanagataṃ hemanetrapaṭāvṛtam

70.51

sa kāṃsyabhājanopetāmikṣudaṇḍasamanvitām || dadyādetena
mantreṇa tathaikāṃ gāṃ payasvinīm

70.52

yathāntaraṃ na paśyāmi kāmakeśavayoḥ sadā || tathaiva sarvvakāmāptirastu viṣṇo sadā mama

70.53

yathā
na kamalā dehātprayāti tava keśava || tathā mamāpi deveśa śarīre sve kuru prabho

70.54

tathā ca kāñcanaṃ devaṃ pratigṛhṇandvijottamaḥ || ka idaṃ kasmā
aditi vaidikaṃ mantramīrayet

70.55

tataḥ pradakṣiṇīkṛtya visarjya dvijapuṅgavam || śayyāsanādikaṃ sarvvaṃ brāhmaṇasya gṛhaṃ nayet

70.56

tataḥ prabhṛti
yo vipro ratyarthaṃ gṛhamāgataḥ || sa mānyaḥ sūryyavāre ca sa mantavyo bhavettadā

70.57

evaṃ trayodaśaṃ yāvanmāsamevaṃ dvijottamān
tarpayeta yathākāmaṃ proṣite'nyaṃ samācaret

70.58

tadanujñayā rūpavānyo yāvadabhyāgato bhavet || ātmano'pi yathāvighnaṃ garbhabhūtikaraṃ
priyam

70.59

daivaṃ vā mānuṣaṃ vā syādanurāgeṇa vā tataḥ || sācārānaṣṭapañcāśadyathāśaktyā samācaret

70.60

etaddhi kathitaṃ samyag bhavatīnāṃ
viśeṣataḥ || adharmmo'yaṃ tato na syāddeśyānāmiha sarvvadā

70.61

purūhūtena yatproktaṃ dānavīṣu purā mayā || tadidaṃ sāmprataṃ sarvvaṃ bhavatīṣvapi yujyate

70.62

sarvvapāpapraśamanamanantaphaladāyakam || kalyāṇīnāṃ ca kathitaṃ tatkurudhvaṃ varānanāḥ

70.63

karoti yā śeṣama
khaṇḍametatkalyāṇinī mādhavalokasaṃsthā || sā pūjitā devagaṇairaśeṣairānandakṛtsthānamupaiti viṣṇoḥ

70.64

śrībhagavānuvāca
tapodhanaḥ so'pyabhidhāya caivaṃ tadā ca tāsāṃ vratamaṅganānām || svasthānameṣyanti samastamitthaṃ vrataṃ kariṣyanti ca devayoneḥ

70.64.p1

iti śrīmatsye mahāpurāṇe'naṅgadānavrataṃ nāma saptatitamo'dhyāyaḥ

Linked texts (3)