Pramāṇa · Search · About · API

Yogayatra 5

Yogayātrā 5

Language
Sanskrit

Contents

5.1

pūrvāditas triparivartagatair ajādyair bhaiḥ saptakair analabhāc ca gamo jayāya/
vāyuagnidiksthaparighasya samārddhagaiś ca maitrāśvihastagurubheṣu ca sarvadikṣu//

5.2

pūrveṇāindraṃ dakṣiṇena ''japādaṃ rohiṇyo 'taś ca 'ryamākhyaṃ ca śūlam/
kāmaṃ yāyāt sāmparāyeṣu kāryeṣv evaṃ dvāre projjhya śūlāni tāni//

5.3

vivarjayet tvāṣṭrayamoragāṇām ardham dvitīyaṃ gamane jayepsuḥ/
pūrvārdham āgneyamaghānilānāṃ svātīm maghāṃ co 'śanasaḥ samastām//

5.4

utpātapāpagrahapīḍite bhe ye yānti bhūrigrahasaṃyute vā/
te pūrvavittāny api nāśayanti dhātuprasaktā iva mūrttikendrāḥ//

5.5

ravisitakujarāhusauricandrā jñaguruyutāḥ purataḥ kramād digīśāḥ/
vrajati yadi lalāṭage digīśe patati tato drumavat sarittaṭātsaḥ//

5.6

yāto 'yanasya pratilomakāṣṭhāṃ yaḥ syāt svatantro 'pi jitaḥ pareṣāṃ/
sa kevalavyākaraṇābhiyuktaḥ vyākaraṇābhiyuktaḥ kāvyajñagoṣṭhyām iva hāsyam eti//

5.7

ayanena gato 'rkasomayor dyuniśaṃ vā sthitayoḥ pṛthak pṛthak/
viduṣām iva sarvaśāstravit samavāye dviṣatāṃ virājate//

5.8

tithiṃ caturthīṃ navamīṃ caturdaśīṃ vihāya viṣṭiṃ karaṇaṃ ca gacchataḥ/
bhavanti cāmīkaravājivāraṇāś caturthipūrvāś ca tadāptivāraṇāḥ//

5.9

ṛkṣe tithau vā vyatipātaduṣṭe yo yāti mohāt khalu vaidhṛte vā/
sa nāśam āyāty acireṇa yātā rāje 'va daivajñavilomaceṣṭaḥ//

5.10

ārogyam ṛkṣeṇa dhanaṃ kṣaṇena kāryasya siddhis tithinā śubhena/
rāśyudgamena 'dhvani siddhim āhuḥ prāyaḥ śubhāni kṣaṇadākareṇa//

5.11ab-K.omitted

na rājate bhūriguṇānvitā 'pi vyarhtabyayasya kṣitipasya yātrā/

5.11cd-K.omitted

śukre praṇaṣṭe dhanadarpitasya vivāhayātreva jarārdditasya//

5.12

pratiśukrabudhāśanivṛṣṭihatā dig adhaḥ kurute nṛpatiṃ gamane/
madirāmuditā madanākulitā pramade 'va kulam paraveśmaratā//

5.13

vīryānvitair yāyibhir ātmabhadraiḥ kleśaṃ vinā hanti camūm arīṇām/
trailokyalābhe 'py asamāptakāryāṃ tṛṣṇāṃ yathā cīraphalāmbutuṣṭaḥ//

5.14

sarpis tilaudanaṣaiḥ payasā ca bhuktvā pūrvādi vāraṇarathāśvanarair gatasya/
soḍhum pratāpam arayo na nrpasya śaktā gandhadvipasya kalabhā iva gandhadānam//

5.15

ekataś ca sakalāni nimittāny ekataś ca manasaḥ pariśuddhiḥ/
cetaso 'sti sahasā na raṇe bhīr māruto 'pi vijayājayahetuḥ//

5.16

bhūriśūravaravājikuñjarā jñātayuddhagatayo 'bhimāninaḥ/
kva 'pi yānti ghanatūlarāśivan mārutābhihatavakṣaso 'rayaḥ//

5.17

anulomagate pradakṣiṇe surabhau dehasukhe 'nile gataḥ/
timirāṇi gabhastimān iva prasabhaṃ hanti balāni vidviṣām//

5.18

upapattir ayatnato yadā tṛṇapānāśanaratnavāsasām//
pramadākṣitināgavājināṃ vijayadvāram apāvṛtaṃ tadā//

5.19

lagnasya ye 'ṃśā hy uditā graho yas teṣu sthito lagnaphalaṃ sa dhatte/
yas tān atītaḥ sa bhaved dvitīyaḥ sthāneṣu śeṣeṣv api cintyam etat//

5.20

gato 'nukūlair grahabhāgnimārutair mano 'bdavidyutsvanavṛṣṭikārmukaiḥ/
ripoḥ pramathnāti raṇājire camūṃ dvipaḥ samūlāṃ sarasī 'va padminīm//

5.21

daivena hīnaḥ parabhīṣaṇārthaṃ yāto 'tikṛcchreṇa nayaty ahāni/
svaśaktyatīto nṛpaveśmanī 'va kṛtvā pratijñām prativādibhītaḥ//

5.22

daivānvitaḥ sādhujanopakārī prabhāvamantrodyamaśaktiyuktaḥ/
bhuṅkte mahīṃ samyag avāpya yātrāṃ sasahyavindyācalapāriyātrām//

5.23

gocareṇa śubhadaḥ śaśī na ced aṣṭavargapariśodhito 'pi[K'tha] vā/
pūrvavāyur iva puṣpakālajo yāyinām phalavināśakṛd bhavet//

5.24

āśritya candrasya balābalāni grahāḥ prayacchanti śubhāśubhāni/
manaḥsametāni yathendriyāṇi karmārhatāṃ yānti na kevalāni//

5.25

sarvataḥ kṣutam aśobhanam uktaṃ goḥ kṣutaṃ maraṇaṃ eva karoti/
kecid āhur aphalaṃ bakād ca yad vṛddhapīnasitabālākṛtaṃ ca//

5.26

śakunatithibhalābhe chattraśayyāsanādyaṃ padam api vijigīṣuś cālayec chradadhānaḥ/
yadi śakunanimittasvapnacetoviśuddhir na bhavati tad aniṣṭaṃ sarvakāryeṣu yānam//

5.27

dinakṛddivase tathā 'ṃśake yātrā lagnagate 'thavā ravau/
saṃtāpāyati smarāturā veśye 'vā 'rthavivarjitaṃ naram//

5.28

udaye śaśino 'ṃśake 'hni vā bhavati gato na cireṇa durmanāḥ//
pramadām iva jātayauvanāṃ ratyarthaṃ samavāpya karkaśaḥ//

5.29

bhaumodaye 'ṃśe 'hani vā 'sya yātrā karoti bandhaṃ vadham arthanāśam/
saṃsevitā 'pāpaparāṅmukhena manobhavāndhena parāṅgane 'va//

5.30

budhasya lagnāṃśakavāsareṣu yātrā naraṃ prīṇayati prakāmam/
bhāvānuraktā pravarāṅgane 'va vidagdhaceṣṭā madanābhitaptam//

5.31

guror vilagnāṃśadineṣu yātrā śubhānubandhepsitakāmadā ca/(Bṝ 5.31--33)
jāye 'va bhartur manaso 'nukūlā kulābhivṛddhyai ratidā hitā ca//

5.32

yātrā bhṛgor aṃśadinodayeṣu prīṇāti kāmair vividhair yiyāsum//
vilāsinī kāmavaśopayātam bhāvair anekair madanāture 'va//

5.33

dyulagnabhāgeṣu śaneś ca yātrā prāṇacchidādīn pracinoti doṣān/
anyaprasaktā vanite 'va mohāt saṃṣevitā manmathamohitena//

5.34

lagnena hīnā 'nyaguṇānvitāpi prītiṃ na yātrā manasaḥ karoti/
svalaṅkṛtā rūpasamanvitā 'pi prabhraṣṭaśīlā vanite 'va puṃsaḥ//

5.35

lagnasya śuddhiḥ śakunair nimittair vijñāyate 'ntaḥkaraṇena samyak/
ananyabhāvāśrayasaṃpravṛttaiḥ kaulī 'va puṃsaś caritair videśe//

5.36

chāyā śubhāśubhaphalāni nivedayantī lakṣyā manuṣyapaśupakṣiṣu lakṣaṇajñaiḥ/
tejoguṇān bahir api pravikāśayantī dīpaprabhā sphaṭikaratnaghaṭasthitaiva//

5.37

snighadvijatvaṅnakharomakeśā chāyā sugandhā ca mahīsamutthā/
tuṣṭyarthalābhābhiudayān karoti dharmasya ca 'hany ahani pravṛddhim//

5.38

snigdhā sitā ca haritā nayanābhirāmā saubhāgyamārdavasukhābhyudayān karoti/
sarvārthasiddhijananī jananī 'va cāpyā chāyā phalaṃ tanubhṛtāṃ śubham ādadhāti//

5.39

caṇḍā 'dhṛṣyā padmahemāgnivarṇā yuktā tejovikramaiḥ sapratāpaiḥ/
āgneyī 'ti prāṇināṃ syāj jayāya kṣipraṃ siddhiṃ vāñchitārthasya dhatte//

5.40

malinaparuṣakṛṣṇā pāpagandhā 'nilotthā janayati vadhabandhavyādhyanarthārthanāśān/
sphaṭikasadṛśarūpā bhāgyayuktā 'tyudārā nidhir iva gaganotthā śreyasāṃ svacchavarṇā//E40

Linked texts (3)

Discussed in (2)