Dhvajagrakeyura Dharani 2

2

evaṃ mayā śrutam ekasmin samaye bhagavān deveṣu trayastriṃśeṣu viharati sma pāṇḍukambalaśilāyām* / atha khalu śakro devānām indro 'surair jitaḥ parājitaḥ satvaraṃ tvaramāṇarūpo yena bhagavāṃs tenopasaṃkrāntaḥ / upasaṃkramya bhagavataḥ pādau śirasābhivandya bhagavantam etad avocat* / ihāhaṃ bhagavan vemacitriṇāsurendreṇa jitaḥ parājito devās trayastriṃśāś ca jitāḥ parājitāḥ / tatrāsmābhir bhagavan kathaṃ pratipattavyam* / bhagavān āha / udgṛhṇa tvaṃ devendra dhvajāgrakeyūrānāmadhāriṇīm aparājitāṃ yā mayā pūrvaṃ bodhisatvabhūtenāparājitadhvajasya tathāgatasyāntikād udgṛhītā / udgṛhya parebhyo vistareṇa saṃprakāśitā / nābhijānāmi tato 'rvāg bhayaṃ vā stambhitatvaṃ vā romaharṣanimittaṃ vāntaśaḥ kṣaṇikām api kāyapīḍām* /