Sarvatathagatoshnishasitatapatra Aparajita Mahapratyangira Vidyarajni 17.2
Sarvatathāgatoṣṇīṣasitātapatrā Aparājitā Mahāpratyaṅgirā Vidyārājñī 17.2
- Language
- Sanskrit
17.2
ya imāṃ sarvatathāgatoṣṇīṣasitātapatrānāmāparājitāpratyaṅgirāmahāvidyārājñīṃ likhitvā bhūrjapatre vastre vā valkale vā kāyagataṃ vā kaṇṭhagataṃ vā kṛtvā dhārayiṣyati vāciṣyati aśuddhakaṃ na kṣamiṣyati / sarvakṛtyakarma na kramiṣyati / nagaraṃ kramiṣyati, yogaṃ kramiṣyati, nākālamṛtyunā kālaṃ kariṣyati / sarvagrahāṇāṃ sarvavighnavināyakānāṃ ca priyo bhaviṣyati / manaāpaścaturaśītikalpakoṭīsahasrāṇi jātau jātau jātismaro bhaviṣyati caturaśītivajrakulakoṭiniyutaśatasahasrāṇi vidyādevatā nityaṃ satatasamitaṃ tasya rakṣāvaraṇaguptiṃ kariṣyanti / caturaśītivajradūtī kiṃkarā nityaṃ paripālayiṣyanti teṣāmapi priyo bhaviṣyati / manaāpaśca na kadācidyakṣatvaṃ na rākṣasatvaṃ na bhūtatvaṃ na piśācatvaṃ na pūtanatvaṃ na kaṭapūtanatvaṃ na manuṣyadāridryaṃ pratyanubhaviṣyati / gaṅgānadībālukāsaṃkhyeyāprameyāṇāṃ buddhānāṃ bhagavatāṃ puṇyaskandhena samanvāgato bhaviṣyati / imāṃ ca sarvatathāgatoṣṇīṣasitātapatrānāmāparājitāṃ pratyaṅgirāṃ mahavidyārājñīṃ dhārayamāṇa abrahmacārī brahmacārī bhaviṣyati / amaunī maunī bhaviṣyati / aśuciḥ śucirbhaviṣyati / anupavāsī upavāsī bhaviṣyati / yo 'pi pañcānantaryakārī syāt so 'pi (Sitā 154) nirdhūtapāpo bhaviṣyati / pūrvakarmāvaraṇaṃ niravaśeṣaṃ parikṣayaṃ gacchati / yaḥ kaścit mātṛgrāme tathāgatoṣṇīṣasitātapatrānāmāparājitā mahāpratyaṅgirā mahāvidyārājñīṃ dhārayamāṇaḥ putrārthī putraṃ pratilabhate / āyuḥpuṇyabalaṃ pratilabhate / itaścyutvā sukhavatyāṃ lokadhātāvupapadyate / sa ca rāgadveṣamohamānadarpavigato bhaviṣyati /