The Sūtra of Golden Light 2.31
Suvarṇaprabhāsottamasūtra 2.31
- Language
- Sanskrit
2.31
acintyo bhagavānbuddho nityakāyastathāgataḥ /
deśeti vividhānvyūhānsattvānāṃ hitakāraṇāt //
2.31.p1
atha khalu ruciraketurbodhisattvasteṣāṃ buddhānāṃ bhagavatāṃ tayośca dvayoḥ satpuruṣayorantikādbhagavataḥ śākyamunerāyuḥpramāṇanirdeśaṃ śrutvā tuṣṭa udagra āttamanāḥ pramuditaḥ prītisaumanasyajātaścodāreṇa prītiprāmodyena sphuṭo 'bhūt / asmiṃstathāgatāyuḥpramāṇanirdeśe nirdiśyamāne 'prameyāṇāmasaṃkhyeyānāṃ sattvānāmanuttarāyāṃ samyaksaṃbodhau cittamutpāditam / te ca tathāgatā antaritā iti /
2.31.p2
iti śrīsuvarṇaprabhāsoottamasūtrendrarāje tathāgatāyuḥpramāṇa nirdeśaparivarto nāma dvitīyaḥ //
2.31.p3
// Svapnaparivartaḥ //
2.31.p4
atha khalu ruciraketurnāma bodhisattvaḥ svuptaḥ svapnāntaragataḥ suvarṇāṃ suvarṇamayīṃ bherīmadrākṣīt / samantādavabhāsamānāṃ tadyathāpi nāma sūryamaṇḍalaṃ sarvāsu dikṣvaprameyānasaṃkhyeyānbuddhānadrākṣīdratnavṛkṣamūle siṃhāsane vaiḍūryamaye pratiniṣaṇṇānanekaśatasahasrikāyāṃ pariṣadāyāṃ parivṛtāyāṃ puraskṛtāyāṃ dharmadeśayamānān / tatra ca brāhmaṇarūpeṇa puruṣamadrākṣīt tāṃ bherīṃ parāhantam / tatra bherīśabdādimāmevaṃrūpāṃ gāthāṃ niścaramāṇāmaśrauṣīt /
2.31.p5
atha khalu ruciraketurbodhisattvaḥ prativibuddhaḥ samanantaraṃ tāṃ dharmadeśanāgāthāmanusmarati sma / anusmaramāṇastasyā rātryā atyayena rājagṛhānmahānagarānniṣkramyānekaiḥ prāṇisahasraiḥ sārdhaṃ yena gṛdhrakūṭaḥ parvatarājo yena bhagavāṃstenopasaṃkrānta upasaṃkramya bhagavataḥ pādau śirasā vanditvā bhagavantaṃ tripradakṣiṇīkṛtyaikānte nyaṣīdat /
2.31.p6
atha khalu ruciraketurbodhisattvo yena bhagavāṃstenāñjaliṃ praṇamya yāścaiva tāḥ svapnāntare dundubhiśabdena deśanāgāthāḥ śrutāstā uvāca /
2.31.p7
iti śrīsuvarṇaprabhāsottamasūtrendrarāje svapnaparivarto nāma tṛtīyaḥ //
2.31.p8
// Deśanāparivartaḥ //
Linked texts (1)
- འཕགས་པ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཞེས་བྱ་བ་ཐེག་པ་ཆེན་པོའི་མདོ — Classical Tibetan