Dhammapada 10.7.p3
Dhammapadaṭṭhakathā 10.7.p3
- Language
- Pāli
10.7.p3
Thero ‘‘satthāraṃ passitvāva parinibbāyissāmī’’ti attabhāvaṃ jhānaveṭhanena veṭhetvā thiraṃ katvā ākāsena satthu santikaṃ gantvā satthāraṃ vanditvā, ‘‘bhante, parinibbāyissāmī’’ti āha. ‘‘Parinibbāyissasi, moggallānā’’ti? ‘‘Āma, bhante’’ti. ‘‘Kattha gantvā’’ti? ‘‘Kāḷasilāpadesaṃ, bhante’’ti. Tena hi, moggallāna, mayhaṃ dhammaṃ kathetvā yāhi. Tādisassa hi me sāvakassa idāni dassanaṃ natthīti. So ‘‘evaṃ karissāmi, bhante’’ti satthāraṃ vanditvā ākāsaṃ uppatitvā parinibbānadivase sāriputtatthero viya nānappakārā iddhiyo katvā dhammaṃ kathetvā satthāraṃ vanditvā kāḷasilāṭaviṃ gantvā parinibbāyi. ‘‘Theraṃ kira corā māresu’’nti ayampi kathā sakalajambudīpe patthari. Rājā ajātasattu core pariyesanatthāya carapurise payojesi. Tesupi coresu surāpāne suraṃ pivantesu eko ekassa piṭṭhiṃ paharitvā pātesi. So taṃ santejjetvā ‘‘ambho dubbinīta, tvaṃ kasmā me piṭṭhiṃ pātesī’’ti āha. Kiṃ pana hare duṭṭhacora, tayā mahāmoggallānatthero paṭhamaṃ pahaṭoti? Kiṃ pana mayā pahaṭabhāvaṃ tvaṃ na jānāsīti? Iti nesaṃ ‘‘mayā pahaṭo, mayā pahaṭo’’ti vadantānaṃ vacanaṃ sutvā te carapurisā te sabbe core gahetvā rañño ārocesuṃ. Rājā core pakkosāpetvā pucchi – ‘‘tumhehi thero mārito’’ti? ‘‘Āma, devā’’ti. ‘‘Kena tumhe uyyojitā’’ti? ‘‘Naggasamaṇakehi, devā’’ti. Rājā pañcasate naggasamaṇake gāhāpetvā pañcasatehi corehi saddhiṃ rājaṅgaṇe nābhippamāṇesu āvāṭesu nikhaṇāpetvā palālehi paṭicchādāpetvā aggiṃ dāpesi. Atha nesaṃ jhāmabhāvaṃ ñatvā ayanaṅgalehi kasāpetvā sabbe khaṇḍākhaṇḍikaṃ kārāpesi.
Immediately the report spread all over the Land of the Rose-apple, “Thieves have killed the Elder.” Immediately King Ajātasattu sent out spies to search for the thieves. Now as those very thieves were drinking strong drink in a tavern, one of them struck the other on the back and felled him to the ground. Immediately the second thief reviled the first, saying, “You scoundrel, why did you strike me on the back and fell me to the ground?” “Why, you vagabond of a thief, you were the first to strike Moggallāna the Great.” “You don’t know whether I struck him or not.” There was a babel of voices crying out, “’Twas I struck him, ’Twas I struck him.”
Those spies heard what the thieves said, captured all the thieves, and made their report to the king. The king caused the thieves to be brought into his presence and asked them, “Was it you that killed the Elder?” “Yes, your majesty.” “Who, pray, put you up to it?” “The Naked Ascetics, your majesty.” The king had the five hundred Naked Ascetics caught, placed them, together with the five hundred thieves, waist-deep in pits which he had dug in the palace-court, caused their bodies to be covered over with bundles of straw, and then caused the bundles of straw to be lighted. When he knew that they had been burned to a crisp, he caused their bodies to be plowed with iron plows and thus caused them all to be ground to bits.
Translations (1)
- Buddhist Legends (Harvard Oriental Series 28–30) — Eugene Watson Burlingame 1921, English
Linked texts (1)
- Dhammapada — Pāli