Prapancahridaya 2.p6

2.p6

caturāśramiṇāṃ tadadhikāro nirṇīyate | saptame sāmānyātideśaḥ | prakṛtivad vikṛtiḥ kartavyeti vidhānamatideśaḥ | tatra prakṛtau yānyaṅgasādhanāni vihitāni, tāni sarvāṇyaviśeṣeṇa tadvikṛtāvātidiśyante | aṣṭame viśeṣātideśaḥ | tatra homānāṃ prakṛtiragnihotrahomaḥ | iṣṭīnāṃ prakṛtirdarśapūrṇamāseṣṭiḥ | yāgānāṃ prakṛtiragniṣṭomayāgaḥ | tatra vihitānyaṅgasādhanāni tattadvikṛtāvatidiśyante | tadatidiśyamānārthaviśeṣepūho navame | sa tu dvārāntarasaṃcaraṇalakṣaṇo mantrasāmasaṃskāraviṣayaḥ | tatra mantrasāmasaṃskārāṇāṃ prakṛtau śrūyamāṇānāṃ vikṛtau kathaṃ prayoga ityūho vistarataḥ | tatraiva mantrasāmastutiprasaṅgād devatāryo vigrahādipa - kanirākaraṇamapi kriyate | daśame bādhaḥ | so'pi kriyoparamalakṣaṇaḥ prāptapratiṣedhaiḥ pūrvaviṣayāṇāṃ mantrasāmasaṃskārāṇām | ekādaśe tantram | tatra kālakartṛkaraṇādyaikye bahūnāmagṛhyamāṇaviśeṣatayā sādhāraṇaprayogastantram | dvādaśe prasaṅgaḥ | pūrvaviṣayāṇāmeva prayujyamānānāṃ pṛthak prayogasya prayojanābhāvāt prayujyamānopayogaḥ prasaṅgaḥ | evaṃ dvādaśasvadhyāyeṣvarthaviśeṣaḥ pūrvamīmāṃsāśāstrasya pradarśitaḥ