Vedantakaumudi 3.p82

3.p82

atha pratyayo liṅādiḥ ,sa ca pravṛttyādiviṣayaṃ vakturabhiprāyātmakaṃ vidhimabhidhatta iti vedavaktīśvarasiddhiḥ | yadāha — “ vidhirvakturabhiprāyaḥ pravṛttyādau liṅādibhiḥ | abhidheyo'numeyā tu karturiṣṭābhyupāyatā 1 || ” iti | etaccārthavādagatikathane vyākhyātam | iṣṭasādhanopadeśa eva ca vidhiḥ iti vakṣyāmaḥ | vedānāṃ sarvajñapraṇītatvamapyasādhu sarvajñānirukteḥ nityajñānaguṇasya vyudāsāt | janyajñānaṃ ca jīvasyāpi pramāṇaṣaṭkavyāpārāt tulyam | evaṃ sārvajñyabījaṃ cet pramāṇam pratyakṣānumeyādiprameyavibhāgo na syāt | tadāhurbhaṭṭapādāḥ :— “ ekena tu pramāṇena sarvajño yena kalpyate | nūnaṃ sa cakṣuṣā sarvān rasādīnpratipadyate 2 || ” iti | na ca āgamena sarvajñāvadhṛtau vikalpo'navasaraḥ , tatpraṇītatvena tasya prāmāṇye parasparāśrayāt | narāntarapraṇītatve cātīndriyārthatvādūḍhdhyādivacovadaprāmāṇyam | nityāgamabalena cet sarvajñasiddhiḥ , tarhi tatpraṇayanārthatvāt sarvajñakalpanā vyarthā syāt | tadāhuḥ :— 3 “ āgamasya ca nityatve siddhe tatkalpanā vṛthā ” | iti | kiñca— “ kalpanīyāśca sarvajñā bhaveyurbahavastava | ya eva syādasavaijñaḥ sa sarvajñaṃ na budhyate 4 || ”