Vicaratrayi 5.3
Vicāratrayī 5.3
- Language
- Sanskrit
5.3
ataeva dhanaṃjayasyopasaṃhāro yujyate |—naṣṭo mohaḥ smṛtirlabdhā
tvatprasādānmayā'cyuta | sthito'smi gatasaṃdehaḥ kariṣye vacanaṃ
taveti | adhyātmavidyayā moho naṣṭo nīteḥ smṛtiśca labdhā | tvatprasādaphalametadvayaṃ tasmādeva gatasaṃdeho viduṣo'pi nītyavalambo'vaśyaḥ prārabdhaśeṣakṣapaṇāyeti siddhāntāt | adhyātmavidyayā mānavatvasāphalyaṃ nītyā kṣātrasāphalyaṃ ca kurviti vacanamanusarāmīti
praṇipāto bhagavatpādayoḥ | ataeva saṃjayaḥ—saṃvādamimamaśrauṣamadbhutaṃ romaharṣaṇam | vyāsaprasādācchrutavānetadguhyamahaṃ param
yogaṃ yogeśvarāt kṛṣṇāt sākṣātkathayataḥ svayam | nītibrahmavidyayorekavākyatvamapūrvamiti romaharṣaṇaṃ guhyaṃ ca | eṣa eva yogo
bhagavatsaṃmato yanmitho viruddhayoriva bhāsatārekavākyatvajñānam
īdṛśaśravaṇaṃ guruprasādalabhyamityarthaḥ | nānīśvarakathitaṃ phalāya
kalpata ityāha-tacca saṃsmṛtya saṃsmṛtya rūpamatyadbhutaṃ hareḥ
vismayo me mahān rājan hṛṣyāmi ca muhurmuhuḥ | bahulabdhaṃ bahulabdhamiti harṣaḥ | kutra mānuṣasamatā kutra sā vibhūtirbhagavata iti
vismayaḥ | -āścaryo vaktā kuśalo'sya labdhā āścaryo jñātā kuśalānuśiṣṭaḥ | na nareṇāvareṇa prokta eṣa suvijñāyate preṣṭheti śrutiḥ
samanvitā dṛṣṭā keśavārjunayoḥ prasaṅge | nanu gītā nāma nītiśāstraṃ brahmavidyāmūlamiti tadasat samuccayavādaprasaṅgāditi cenna
brahmavidyāyāḥ prārabdhakarmasamuccayo'ṅgīkṛto vyāsena tadadhigama uttarapūrvāghayoraśleṣavināśāviti sūtraṇāt | -kartuṃ necchasi yanmohāt
kariṣyasyavaśo'pi taditi bhagavadabhiprāyācca vidvatprārabdhaśeṣasya
kṛtakāryasya na bandhahetutvaṃ nāpi jñānavirodhitvaṃ jñānāgnāveva
hūyamānatvāditi dik | āha nītiśāstratvaṃ gītāyāḥ saṃjayaḥ-yatra
yogeśvaraḥ kṛṣṇo yatra pārtho dhanurdharaḥ | tatra śrīrvijayo bhūtirdhruvā
nītirmatirmameti viśiṣṭārthopasaṃhārāt | bhūtirjñānam | dhruveti caturṇāṃ
viśeṣaṇam | vaktā kṛṣṇaḥ śaṃkaro vā jagatsu śrotā pārtho maṇḍano
vā'tha miśraḥ | vaktāro'nye santi santo mahāntaḥ śrotāro'nye
santi tebhyo namo'stu | paṇḍito yatra vaktāsti śrotā yatrāsti
dhīradhīḥ | sa saṃvādo likhyate ca paṭhyate ca punaḥ punaḥ | iti
gītāpāṭhapravṛttihetuḥ || iti gītārthaparāmarśe tṛtīya ullāsaḥ
5.3.p1
iti śrīkaivalyadhāmanivāsikṛṣṇānandasarasvatīkṛtau gītārthaparāmarśaḥ samāptaḥ || svānubhūtivilāsaḥ