Bhagavadgita 3.18

3.18

ta0 ṭī0-nanvātmanāṃ vināśānarhatvena nityatvamuktaṃ tarhi sarveṣāṃ mātṛpitrādayo naṣṭā ityabādhitapratīteḥ ke viṣayā ityāśaṅkyāha-antavanta iti | nityasya śarīriṇa ime karmaphalabhogāyatanabhūtāḥ pañcamahābhūtāvayavopacitā dehā antavanto vināśina uktā vyāsādibhiḥ | tathāhi-' mātāpitṛsahasrāṇi putradāraśatāni ca | saṃsāreṣvanubhūtāni yātā yāsyanti yānti ca || harṣasthānasahasrāṇi śokasthānaśatāni ca | divase divase mūḍhamāviśanti na paṇḍitam || dharmo nityaḥ sukhaduḥkhe tvanitye jīvo nityo heturasyāpyanityaḥ' iti | hetuḥ sthūlasūkṣmaśarīram | śarīriṇo nityatve hetugarbhitaviśeṣaṇamāha-anāśina iti | nāśābhāvavataḥ ata eva nityasya anāśī paramārthaśca prājñairabhyupagamyate | 'tattu nāśi na sandeho nāśidravyopapāditam'iti vaiṣṇave jaḍabharatavākyāt | nanu nityo'vināśī cedātmā tarhi dehe naṣṭe'pi tadupalabdhiḥ kinna syādityāśaṅkānirāsāya hetugarbhitaviśeṣaṇamāha-aprameyasyeti | bhagavatkṛpāṃ śāstramantareṇa pratyakṣādipramāṇairidamitthamiti pramātumaśakyatvāt | ' enaṃ vidurve bhagavatprasādāt ' ityādyācāryapādokteśca | yaddehādi idamitthamityupalabhyate tannāśitvenāpyupalabhyate, ātmā na tathā | kintvahaṃ jānāmyanubhavāmīti pratītyā pramātṛtayaivopalabhyate, yasmādanāśitvādātmāno na śocyāḥ, nāśitvādantavanto dehā api na śocyāḥ| tasmānmohaṃ vihāya he bhārata ! tvaṃ yuddhayasva |