Bhagavadgita 3.70

3.70

ta0 ṭī0-nanvevaṃ nigṛhītasarvendriyasya sarvaviṣayebhyo nivṛttabuddheryaugino yogaprabhāvādyadi sarvakāmasiddhayaḥ svayaṃ prāpnuyuḥ sa tān kāmān gṛhṇīyāccettarhi tasya tatrāsaktyā tattvataścyutiḥ syādityāśaṅkāvāraṇāyāha-āpūryamāṇamiti | sarvāryābhirnadībhiḥ sadā āpūryamāṇaṃ tathā'pyanullaṅghitamaryādaṃ samudraṃ punarapi vṛṣṭijāḥ sarvā āpaḥ praviśanti sa yadvanna kañcana viśeṣamāpadyate, tadvat | viṣayātmabhiḥ kāmyanta iti kāmāḥ sarve rūparasādayo viṣayāḥ prārabdhakarmavaśādyogavighnārthaṃ devaiḥ preṣitā vā yaṃ sthitaprajñaṃ muniṃ praviśanti tadindriyagrāhyatāṃ svayameva prāpnuvantyapi kiñcidvikāraṃ kartuṃ na prabhavanti sa śāntiṃ sarvavikṣepahetukarmadhvaṃsena niratiśayānandarūpāṃ muktimāpnoti | na tasya tattvaniṣṭhāyā bhraṃśaśaṅkā'pītyarthaḥ | viṣayiṇastadabhāvamāha-na kāmakāmīti | kāmānvipayānkāmayituṃ śīlaṃ yasya sa tathā śāntiṃ na prāpnoti kintu viṣayānubhavārhe saṃsāra eva vartate |