Bhagavadgita 3.36

3.36

nihatyeti | dhārtarāṣṭrān duryodhanādīnasmadbhrātṛn sabāndhavān hatvā taddhananenāsmākaṃ kā prītiḥ syāt | aparādhinaḥ putrasya śiśorhananena pituḥ prītiścedasmākameteṣāṃ vadhena prītiḥ saṃbhavet | yathā putrahananena pituḥ śiśuhatyā tathāsmākamapi bhrātṛhatyā syāt | nanu 'agnido garadaścaiva śastrapāṇirdhanāpahaḥ | kṣetradārāpaharttā ca ṣaḍete hyātatāyinaḥ || ātatāyinamāyāntaṃ hanyādevāvicārayan | nātatāyivadhe doṣo hanturbhavati kaścana ||' iti vacanāduktasarvadoṣaviśiṣṭānāmeteṣāṃ vadhe na kaściddoṣa ityata āha— pāpameveti | ātatāyā uktāḥ ṣaḍvidhā doṣā yeṣāṃ santi te ātatāyinastānūktadoṣavato'pyetān hatvā taddhananena karmaṇāsmān pāpamevāśrayet | atrāyogavyavaccheda evakārārthaḥ | yadyapyasyātatāyivadho na doṣāya tathāpi 'sa eva pāpiṣṭhatamo yaḥ kuryātkulanāśanam' iti | 'arthaśāstrāttu balavaddharmaśāstramiti sthitiḥ'iti nyāyena arthaśāstrādbalavattvāddharmaśāstrasya | ata ātatāyitvadoṣādapi kulanāśakatvadoṣo'narhaḥ so'yamasmākaṃ syāditi bhāvaḥ |
tarhi tvayā kiṃ niścitamityata āha—