Bhagavadgita 5.10.1

5.10.1

yadvaśe vartante sa paramātmā hṛṣīkeśaḥ | yasya vā sūryarūpasya candrarūpasya ca jagatprītikarā hṛṣṭāḥ keśā raśmayaḥ sa hṛṣīkeśaḥ | 'sūryaraśmirharikeśaḥ purastāt' itiśruteḥ pṛṣodarāditvāt sādhutvam | yathoktaṃ mokṣadharme - 'sūryyācandramaso śaśvadaṃśubhiḥ keśasañjitaiḥ| bodhayan svāpayaṃścaiva jagaduttiṣṭhate pṛthak || bodhanātsvāpanāccaiva jagato harṣaṇaṃ bhavet | agnīṣomakṛtairevaṃ karmabhiḥ pāṇḍunandana | hṛṣīkeśo maheśāno varado lokabhāvanaḥ ||' (mahā śānti0 342|66-67) iti viṣṇusahasranāmabhāṣye bhagavān śaṅkarācāryaḥ | tam, iti" sarvendriyapravartakatvena antaryāmiṇam | govindam 'gāṃ vedalakṣaṇāṃ vāṇīṃ vindatīti vyutpatyā sarvavedopādānatve sarvajñam' ityartho madhusūdanīye | evaṃbhūtaṃ śrīkṛṣṇam | evam 'kathaṃ bhīṣmamahaṃ saṃkhye' (2/4) ityārabhya 'rājyaṃ surāṇāmapi cādhipatyam' (2/8) iti yāvaduktena prakāreṇa uktvā (pūrva) kathayitvā (paścāt) 'na yotsye' yuddhaṃ na kariṣyāmītyuktvā kathayitvā (tataḥ paścāt) tūṣṇīṃ babhūva ha, maunaṃ niḥśabdatām avalambitavān | heti prasiddhau avyayam iti prauḍhamanoramā | iha parantapaguḍākeśaśabdābhyām arjunasya svābhāvikaśauryajitālasyatvayoḥ sūcakābhyām arjune āgantukameva śatroratāpanatvam ālasyañca vartate | ataste cirāya na sthāsyete iti sūcitam · evam hṛṣīkeśagovindapadābhyāṃ bhagavataḥ sarvaśaktimattva sarvajñatvayoḥ sūcakābhyāṃ bhagavān arjunasya śokamohau anāyāsenaiva nivārayiṣyatīti sūcitam |