Bhagavadgita 5.67

5.67

vyākhyā—ayuktasya asamāhitāntaḥ karaṇasya vikṣiptacittasya aprasannacittasya asvasthacittasyeti yāvat | buddhiḥ ātmasvarūpaviṣayā ātmasākṣātkārarūpasamyagdarśana rūpā, nāsti, na bhavati | na ca ayuktasya asamāhitāntaḥkaraṇasya vikṣiptacittasya, bhāvanā ātmajñānā'bhiniveśaḥ | śāstrād ātmani jñāte tatsākṣātkārārthaṃ smṛtisantānakaraṇaṃ bhāvaneti kathyate | sa eva ca ātmajñānā'bhiniveśaḥ tadeva ca vijātīyapratyayā'navacchinnasajātīyapratyayapravāharūpaṃ nididhyāsanam | na ca abhāvayataḥ ātmajñānābhiniveśam akurvataḥ śāntistṛṣṇāyā upaśamaḥ | viṣayatṛṣṇāyā nivṛttiriti yāvan | bhavatīti śeṣaḥ | aśāntasya anivṛttaviṣayatṛṣṇasya saṃsāravāridhau nimagnasya paramānandasāgarād vibhaktasya | kutaḥ sukham ? sukhaṃ na bhavatītyarthaḥ | indriyāṇāṃ hi viṣayasevātṛṣṇāto yā nivṛttistatsukham | na viṣayaviṣayā tṛṣṇā sukham | duḥkhameva hi sā | nahi tṛṣṇāyāṃ satyāṃ sukhasya gandhamātramapi syāditi bhāvaḥ |
avataraṇam—'yatato hyapi kaunteya' ityādinā ślokadvayena upanyastasyārthasya anekadhopapattimuktvā 'dhyāyato viṣayān' ityādinā ślokaṣaṭkena tamarthamupapādya samprati upasaṃharati—tasmāditi |