Caturdashi p45

p45

śrāddhīyā'he daśamyāṃ ca dvādaśyāṃ vratavāsare | ekādaśyāṃ vyatīpāte tailaṃ māṃsaṃ ca varjayet | gobhilepiśrvaḥkartā'smīti niścitya dānto vipraṃ nivedayet | nirāmiṣaṃ sakṛt bhuktvā sarvabhuktajane gṛhe | smṛtyarthasārepidantadhāvanatāmbūlaṃ snigdhasnānamabhojanam | ratyauṣadhaparānnaṃ ca śrāddhakṛtsapta varjayet || punarbhojanamadhvānaṃ bhāramadhyayanaṃ ratim | dānaṃ pratigrahaṃ homaṃ śrāddhabhuk cā'ṣṭa varjayet || arghyārthaṃ svāgataṃ cā'rghyaṃ vinā'tra pariveṣaṇam | visarjanaṃ saumanasyamāśiṣāṃ prārthanaṃ tathā || viprapradakṣiṇaṃ caiva svastivācanakaṃ vinā | pitryamanyat prakarttavyaṃ prācīnāvītinā sadā || dve dve pavitre ṛjunī daive karmāṇi yojayet | vibhajya dviguṇīkṛtya trīṇi trīṇi tu paitṛke || daivyarcādakṣiṇāta(?)syātpādajānvaṃsamūrdhasu | śiroṃsajānupādeṣu aṃgādiṣu ca paitṛke || pitṛbhyo nikhilaṃ dadyāt svadhākāreṇa sarvadā | akṣayyamāsanaṃ caiva varjayitvā 'rghyameva ca || yatkiñciddīyate śrāddhe devatīrthena daivike | paitṛke pitṛtīrthena sarvatraiṣa vidhiḥ smṛtaḥ || pitṛṇāmāsanaṃ dadyāt vāmapārśve tathā sudhīḥ | dakṣiṇe caiva devānāṃ sarvadā śrāddhakarmaṇi || svāhā devahavirdāne svadhā tu paitṛke vadet | daivike havyamityuktvā paitṛke kavyamityapi || śrāddhārambhe samāptau ca pādaśaucārcanaṃ tayoḥ | vikire piṇḍadāne ca kuryādācamanaṃ smṛtam || teṣu prathamameva dviḥ śeṣāṇi tu sakṛtsakṛt | ācāntaḥ prāk kuśāṃstyaktvā pāṇāvanyāṃsta dhārayet|| śrāddhārambheṣu ye darbhāḥ pādaśauce vivarjayet | arcanādau tu ye darbhā ucchiṣṭānte vivarjayet || pārvaṇādau tu ye darbhā āghrāṇānte visarjayet | mārjanādau tu ye darbhā namaskāre visarjayet || vikire piṇḍadāne ca tarpaṇe snānakarmaṇi | ācāntaśca prakurvīta darbhasantyajanaṃ budhaḥ || akṣayyāsanayoḥ ṣaṣṭhī dvitīyā ''vāhane tathā | annadāne caturthī syāccheṣāḥ sambuddhayaḥ smṛtāḥ || sambandhaṃ prathamaṃ brūyānnāmagotraṃ tathaiva ca | paścādrūpaṃ vijānīyāt kramaeṣaḥ sanātanaḥ || kṣaṇa''vāhanasaṅkalpe piṇḍadānā'nnadānayoḥ | piṇḍābhyañjanakāle ca tathaivāñjanakarmaṇi || akṣayyāsanapādyeṣu gandhādyācchādaneṣu ca | śrāddhakarmaṇi caiteṣu gotraṃ nāma prakāśayet || gotrasya tvaparijñāne kāśyapaṃ gotramucyate | nāmāni cenna jānīyāttātetyādi vadet kramāt || nohenmātrarghyapātre tu tilāvāpe pitṝn padam | arghyapradānamantreṣu mātrādipadamāvapet || śundhantāmiti pitrādau mātrādipadamāvapet | strīdvitve vā bahutve vā teśabdasyoha iṣyate || nirdeśennāmanī dvitve nāmānyapi bahūni cet | nāma dvivacanāntaṃ syādekaṃ tacced dvayorapi || nohedyā iti yeśabdaṃ vṛttikāravaco yathā | jayantasvāminaḥ śiṣyā ūhaṃ kurvanti yā iti || dvitve yuvāṃ bahutve tu yuṣmāniti padaṃ vadet | anūhenaiva piṇḍānāṃ sakṛt syādanumantraṇam || abhyañjāthāṃ padaṃ dvitve bahutve 'bhyaṅdhvamityapi | dvitve'ñjathāṃ padaṃ brūyādbahutve'ṅdhvaṃ padaṃ vadet || dadyāddaśāmanūhena mantrasyā''vṛttiriṣyate | anūhenaiva ṣaṭ piṇḍān sakṛdevopatiṣṭhate || anūhenobhayeṣāṃ syāt yugapacca pravāhaṇam | piṇḍadvayamanūhena patnīṃ vai prāśayedatha || nā'prokṣitaṃ spṛśetkiñcinna vadenmānuṣīṃ giram | na codvīkṣeta bhuñjānaṃ na caivā'śrūṇi pātayet || tyajet krodhaṃ pramādaṃ ca śrāddhe na tvarito bhavet | daive pitrye ca sarvatra japahomādikarmasu || maunaṃ kuryāt prayatnena samyak phalamavāpnuyāt | yadi vākyapralopaḥ syājjapahomā'rcanādiṣu || vyāharedvaiṣṇavaṃ mantraṃ smaredvā viṣṇumavyayam| iti | tatra kṣayāhaśrāddhamekoddiṣṭaṃ pārvaṇaṃ vā yathāsvakulācāraṃ kuryāt || ubhayavidhavākyabalāt | vākyāni ca, yadāha-