Vidhirasayanadushana 2.p4

2.p4

yadapi yavasādhāraṇyāsaṃbhave hetvantaramapyuktamapūrvoyatvalakṣaṇā na yuktā | prokṣaṇāvaghātayoḥ prakaraṇenāpūrvārthatvāt vrīhidvārā ca tādarthyāttadapūrvīyāṇāmevārthālaukikatyāgena dvāratvāditi | tadapi na | viśvajidyāgasya svargārthatve kalpite śrutārthāpattyā dvāratvena kalpitasyāpūrvasya śābdatvasiddhyai apūrvaṃ kṛtveti śabdakalpanāvat prokṣaṇā derapi prakaraṇena pradhānāpūrvārthatve kalpite śrutārthāpatyā dvāratvena kalpitānāmapūrvīyāṇāṃ vrīhiṇāṃ śābdatvasiddhyai apūrvīyatvalakṣaṇāyā āvaśyakatvāt | kiṃ ca yadi vrīhisvarūpameva dharmavidhau vivakṣitaṃ tato vikṛtau nīvāreṣu prokṣaṇāderatideśo na syāt | soyaṃ doṣo dīkṣitairapyaṣṭāviṃśatitamaślokavivaraṇānta uktaḥ | citratvaśūrattvādiprakārasya karatharathantarādiṣvabhāvena bṛhadrathantaradharmānatideśāpatteriti granthena | prokṣaṇādiṣvatideśaśca navame dravyasaṃkhyāsamudāyaṃ vetyatra vrīhitvavivakṣayānatideśaṃ pūrvapakṣayitvā'pūrvīyatvalakṣaṇayā tannirāsena sthāpitaḥ | ato dīkṣitānāṃ citratvaśūratvadviprakāravivakṣāyāmaprākṛte tadvikārādvirodhādbhavatiṣṭheranniti nāvamikādhikaraṇaṃ vadatāṃ kathametadadhikaraṇavismaraṇamiti na vidmaḥ | evaṃ tatprapūrvādhikaraṇepi prokṣitābhyāmulūkhalamusalābhyāmavahantīti prokṣaṇasya naivāraścarurnakhāvapūtānāmityatrātideśohasiddhayai avahantervaituṣyadvārā tatsādhanatvena vāpūrvīyatvamulūkhalamusalaśabdayorlakṣyamityuktam | evaṃ mantreṣvapi dravyadevatāsvarūpaparatve dravyāntare devatāntarai vā vikṛtā vatideśohau na syātāmiti