A Cluster of Nyāya Flowers 1.2.503

1.2.503

tatra—sarvajñasiddhau . etat—ākṣepajālam . yadyapīti śeṣaḥ . na tāvadekena na hyekasmin jñāne parasparavirodhino'rthāḥ śītoṣṇavadavabhāsante .. nāpi bahubhi—tāni hi krameṇa vā bhaveyuḥ ? yugapadvā ? na yugapajjñānāni saṃbhavanti; sūkṣmāntaḥkaraṇasāpekṣatvāt . kramabhāvibhistu jñānairaśeṣatribhuvanakuharanihitanikhilapadārthasārthasākṣātkaraṇameṣāṃ manvantarakoṭibhirapi durghaṭamiti kathaṃ sarvajñā yoginaḥ ? ucyate—yugapadekayaiva buddhyā sarvatra sarvānarthān drakṣyanti yoginaḥ . yattu viruddhatvāditi, tadaprayojakam—viruddhānāmapi nīlapītādīnāmekatra citrapratyaye'vabhāsanāt . ekatra ca mecakapratyaye sannihitapadārthavyatiriktasakalavastvabhāvagrahaṇasya pūrvaṃ pu. 143 darśitatvāt . śītoṣṇayorapi kvacidavasare bhavati yugapadupalaṃbhaḥ—tadyathā— pratapati hutavahavisphuliṅganikarānukārikiraṇe taruṇoṣmaṇi grīṣme himaśakalaśiśirapayasi sarasi nimagnabhidaghnadehasya puṃsaḥ yugapadeva sarassalilasūryātapavartinau śītoṣṇasparśāvanubhavapathamavatarataḥ .. na hīti . na hi nīlo ghaṭaḥ, pītaḥ paṭa itivat nīlapīto ghaṭa iti pratītiḥ saṃbhavatītyarthaḥ ..