Shrutirahasya 3.2-2.2

3.2-2.2

kathaṃ pratipādyate, pūrvaṃ kenāpi na pratipāditamiticenna | 'yadyaddhiyā ta urugāya vibhāvayanti tattadvapuḥ praṇayase sadanugrahāye'ti vākyena yathā bhagavato bhaktānāṃ bhāvanānurūpasvarūpadhārakatvaṃ tathā vedasyāpi śabdabrahmātmakabhagavadrūpatvādbhaktānāṃ bhāvanānusāreṇa svārthapradarśakatvam | anyathā niruktau 'catvāriśṛṅge'ti śrutiryajñaparatvena vyākhyātā| saiva mahābhāṣyakārairvyākaraṇaśāstraparatvena vyākhyātā | ubhāvapi prāmāṇikāvevau | (e) katarasyāpyarthasyāprāmāṇyaṃ vaktuṃ na śakyate | tasmāt yasmin śāstre śrutyartho yena rūpeṇa pratipāditastasmiñchāstre sa evārtha ityarthaḥ | ata eva vidyāraṇyena 'catvāriśṛṅge'ti śrutiḥ sākṣādṛṣiparoktaṃ
vedāṅgārthamapi dūrīkṛtya praṇavaparatvena vyākhyātā| tathā hi | 'catvāri śṛṅgāḥ trayo asya
pādā dve śīrṣe sapta hastāso asya | tridhā baddho vṛṣabho roravīti maho devo martyām̐2āviveśa' | niruktakārāstvevamarthamāhuḥ-catvāriśṛṅgā iti | vedā vā ye ta uktāstrayo'sya
pādā iti savanāni trīṇi | dve śīrṣe prāyaṇīyodayanīye | sapta hastāsaḥ sapta chandāṃsi
tridhā baddhastredhā baddho mantrabrāhmaṇakalpaiḥ | vṛṣabho roravīti | roravaṇamasya savanakrameṇa
ṛgbhiryajurbhiḥ sāmabhiḥ | ' yadenamṛgbhiḥ śaṃsanti yajurbhiryajanti sāmabhiḥ stuvanti
maho deva ityeṣa hi mahāndevo yadyajño martyā āviveśetyeṣa hi manuṣyānāviśati yajanāya
tasyottarā bhūyase nirvacanāya'