Aphorisms on Brahman 33

Śrīkarabhāṣya 33

Language: Sanskrit

33.1

aṅgeṣu yathāśrayabhāvādhikaraṇam || 26 ||

33.2

brahmaprāptyaṅgabhūtānnamayādyupāsaneṣu puruṣāṇāṃ jyotiṣṭomādivat
paramparayā muktihetutvanirṇayaḥ

33.3

nanu dahara-śāṇḍilya-akṣi-puruṣopakosala-udgīthādyupāsanānāmiva
annaṃ brahma ityādyaṅgāvabaddhopāsanānāṃ sākṣānmokṣahetutvaṃ kiṃ na
syādityāśaṅkāyāṃ adhikaraṇāntareṇāha -

33.4

|| 239 || aṃgeṣu yathāśrayabhāvaḥ || 59 ||

aṅgeṣu - annaṃ brahma prāṇo brahma mano brahma nāma brahma
ityādimokṣopāsanāṅgeṣūṇasaneṣu yathāśrayabhāvaḥ | ānando brahmeti vyajānāt
ityādi sarvātiśayaparamānandātmakasya paraśivabrahmaṇaḥ
prāptisādhanopāsanasādhanatayā dahara-bhūmādyupāsanānāmiva
sākṣānmokṣahetutvamasaṅgatam - brahmavidāpnoti paraṃ so'śnute sarvān kāmān
saha brahmaṇā ityādivākyānāṃ parasparabhedāvagamāt | taittirīye śrūyate - tatra
annaṃ brahmeti vyajānāt prāṇo brahmeti vyajānāt mano brahmeti vyajānāt satyaṃ
jñānamanantaṃ brahma iti vākyānāṃ parasparabhedāvagamāt annamayādīnāmapi
jagajjanmādikāraṇatvena brahmatvavyavasthāpanāt annamayādīnāṃ vā uta
ānandamayassa vā brahmatvam daharādyupāsanānāṃ vā uta
annamayādīnāmaṅgopāsanānāṃ vā sākṣānmokṣahetutvam iti sandihyate |

33.6

ānando brahmeti vyajānāt itivat jagajjanmādikāraṇatvena annaṃ brahmeti vyajānāt
ityādīnāṃ tulyatvopadeśāt samānaprakaraṇapaṭhitatvācca na vaiṣamyasiddhiḥ |
śākhāntareṣvapi mano brahmetyupāsīta vācaṃ brahmetyupāsīta nāma brahmetyupāsīta
ityādivākyaiḥ sarveṣāṃ samānatvena brahmatvavyapadeśāt dahara-śāṇḍilya##-

33.7

na vaiśiṣṭyam | ataḥ sarveṣāmupāsanānāṃ samānatvena sākṣānmokṣahetutvaṃ
sambhavatīti prāpte vadāmaḥ -

33.8

anyontara ātmāṅandamayaḥ ityatra niratiśayaśiraskatvena ānandamayasya
brahmatvavyavasthāpanāt yo veda nihitaṃ guhāyāṃ parame vyoman ityatra
guhātmakadaharākāśe paramātmopāsanānāṃ sākṣānmokṣahetutvakathāt
hṛtpuṇḍarīkaṃ virajaṃ viśuddhaṃ ityārabhya umāsahāyaṃ parameśvaraṃ prabhuṃ
dhyātvā munirgacchati bhūtayoniṃ iti śākhāntareṣvapi daharapuṇḍarīke
parameśvaropāsanānāṃ avilambena śivasāyujyamuktyupadeśāt tathā
svaśākhāparaśākhasvapi annamayādīnāṃ ātmopāsanānāmapi sākṣānmuktyadarśanāt
brahmaprāptyaṅgabhūtānnamayādyupāsaneṣu puruṣāṇāṃ
parameśvarārpitajyotiṣṭomādivat paramparayā muktihetutvamiti niścīyate |

33.9

nanvānadamayasya sarvādhikaparabrahmatve kiṃ mānamityāśaṅkāyāmāha -

33.10

|| 240 || śiṣṭeśca || 60 ||

33.11

śiṣṭiḥ śāsanaṃ vidhānamityarthaḥ | mīṣāsmādvātaḥ pavate bhīṣodeti sūryaḥ |
bhīṣāsmādagniścendraśca mṛtyurdhāvati pañcamaḥ || ityatra sarvaśāsakatvena
sarvabhayahetutvasya sarvādhike ānandamaye śive eva vyapadeśāt
annamayāditulyatvamekaprakaraṇapaṭhitatve'pi tasya na sambhavatīti nirṇīyate | tataiva
pradeśāntare antaḥ pradeśāntare antaḥ praviṣṭaśśāstā janānāṃ sarvātmā iti śrutau
tathā śrūyate |

33.12

samāhārādhikaraṇam || 27 ||

33.13

dṛḍhacittānāṃ mumukṣūṇāmeva śivayogena śivasākṣātkārasamarthanam

33.14

nanu cittasya bahusaṅkalpayuktatvāt cittanirodhābhāve
daharādisarvavidyopāsanāsidhyasambhavāt kena mārgeṇa
śivasākṣātkārānubhavahetubhūtacittasthairyaṃ sambhavedityāśaṅkāyāṃ
adhikaraṇāntaraṃ darśayati -

33.15

|| 241 || samāhārāt ||61 ||

33.16

śvetāśvatarādivedānteṣu śivasākṣātkārānubhavasya śivayogākhyānena
jīvasukhyāṅgabhūtadṛṅmanaḥ-prāṇasandhānarūpasamāhārāt melanāt
mumukṣūṇāṃ cittacalananivṛttipūrvakaśivasākṣātkārānubhavasiddhiḥ sambhavati |
oṃ brahmavādino vadanti - kiṃ kāraṇaṃ brahma kutassma jātāḥ jīvāmaḥ kena kva
ca sampratiṣṭhā adhiṣṭhitaḥ kena sukhetareṇa vartāmahe brahma brahmavido vyavasthāṃ
ityārabhya -

33.17

te dhyānayogānugatā apaśyan devātmaśaktiṃ svaguṇairnigūḍhām |
sarvā jīve sarvasaṃsthe bṛhante tasmin haṃso bhrāmyate brahmacakre ||

33.18

pṛthagātmani preritāraṃ ca matvā juṣṭastatastenāmṛtatvameti |

33.19

iti vedāntaratna śvetāśvataropaniṣatsu śrūyate | pāśupatavidyāṅgabhūtayogena
daharādyupāsanānāṃ śivasākṣātkārānubhūtiḥ uta tadvinā sambhavati iti sandihyate |
taittirīye - daharaṃ vipāpaṃ umāsahāyaṃ

33.20

brahmavedabrahmaiva bhavati brahmavidāpnoti paraṃ ityādiṣu jñānenaiva
brahmasākṣātkāravyapadeśāt yogavidyāyāṃ na kiñcit prayojanamiti prāpte vadāmaḥ |

33.21

tasyābhidhyānāttutīyaṃ dehabhede viśvaiśvaryaṃ kevalaṃ āptakāmaḥ ityārabhya
agniryatrābhimathyate vāyuryatrābhimathyate somo yatrātiricyate tatra saṃjāyate manaḥ

33.22

trirunnataṃ prāpya samaṃ śarīraṃ hṛdīndriyāṇi manasā sanniveśya |
brahmoḍupena patareta vidvān srotāṃsi sarpāṇi bhayāvahāni ||

33.23

prāṇān prapīḍye ha sa yuktaceṣṭaḥ kṣīṇe prāṇe nāsikayocchvasīta |
duṣṭāśvayuktamiva vāhanameva vidvan mano dhārayeti pramattaḥ ||

33.24

ityārabhya

33.25

pṛthivyaptejo'nilajīve samutthite pañcātmake pañcaguṇe pravṛtte |
na tasya rogo na jarā na mṛtyuḥ prāptasya yogāgnimayaṃ śarīram ||

33.26

laghutvamārogyamalolupatvaṃ varṇaprasādaṃ sthalasauṣṭavaṃ ca |
gandhaśśubho mūtrapurīṣamalpaṃ yogapravṛttiṃ prathamāṃ vadanti ||

33.27

yathaiva bimbaṃ mṛdayopaliptaṃ tejomayaṃ bhrājate tatsudhāntam |
tathātmatattvaṃ prasamīkṣya dehī ekaḥ kṛtārtho bhavate vītaśokaḥ ||

33.28

iti śvetāśvatare yogayuktasyaiva paraśivabrahmasākṣātkārāvagamāt | anyatra -

33.29

vedāntaśravaṇaṃ kurvan yogaṃ samārabhet |
ākuñcanena kuṇḍalinyā kavāṭamudghāṭya mokṣadvāraṃ vicchedayet |
yacchedvāṅmanasī prājñaḥ tadyacchedjñānamātmani |

33.30

ātmānañcedvijānīyādayamasmīti pūruṣaḥ |
kimicchan kasya kāmāya śarīramanusaṃjvaret ||

33.31

tameva dharmaṃ vijñāya prajñāṃ kurvīta brāhmaṇaḥ |
nānudhyāyan bahūn śabdān vāco viglapanaṃ hi tat ||

33.32

yamaiśca niyamaiścaiva hyāanaiśca susaṃyutaḥ |
nāḍīśuddhiñca kṛtvādau prāṇāyāmaṃ samācaret ||

33.33

sarvacintāṃ parityajya sāvadhānena cetasā |
nirvikalpaḥ prasannātmā prāṇāyāmaṃ samabhyaset ||

33.34

marudabhyasanaṃ nityaṃ manoyuktaṃ samabhyaset |
itaratra na kartavyā manoryuktirmanīṣiṇā ||

33.35

ityādinā bāhyābhyantararūpasarvopāsaneṣu yogavidyāprādhānyakathanāñca -
taittirīye - daharaṃ vipāpaṃ ityārabhya tasminyadantastadupāsitavyaṃ ityādinā yatra
yatropāsanavidhirupadiṣṭā tatra tatra yogānuguṇyamarthātsiddham sādhanaṃ vinā
sādhyāniṣpatteriti nyāyena yogaṃ

33.36

vinā cittasthairyābhāvāt tadabhāve brahmasākṣātkārabhāvācca | tasmānmumukṣūṇāṃ
dṛṅmanaḥprāṇasandhānātmakaśivayogavidyāvaśyakatvaṃ nirdiśyate |

33.37

tathā kaivalye daharopāsanāyāmapi hṛtpuṇḍarīkaṃ ityārabhya dhyātvā munirgacchati
bhūtayoniṃ ityantena dhyānayogayuktasyaiva paraśivabrahmāvagatidarśanāt bahma veda
brahmaiva bhavati ityādiśrutiṣu vedaśabdena dhyānadhāraṇayogānuguṇyamupadiśyate
na vaidyaśāstradivadvākyārthajñānam | tasmāt sarvaśāstrasamanvaya eva yuktaḥ |

33.38

asminnarthe hetvantaramāha -

33.39

|| 242 || guṇasādhāraṇyaśruteśca || 62 ||

33.40

tataḥ paraṃ(daṃ) brahma paraṃ bṛhantaṃ yathā nikāyaṃ sarvabhūteṣu
gūḍham |
viśvasyaikaṃ veṣṭitāraṃ tamīśaṃ jñātvā amṛtā bhavanti ||

33.41

pradhāna kṣetrakṣa sarvānana śirogrīvaḥ
sarvataḥ pāṇipādaṃ tatsarvato'kṣiśiromukham |
sarvataḥ śrutimalloke sarvamāvṛtya tiṣṭhati ||

33.42

sarvendriyaguṇābhāsaṃ sarvendriyavivarjitam |
sarvasya prabhumavyaktaṃ sarvasya śaraṇaṃ suhṛt ||

33.43

na saṃdṛśe tiṣṭhati rūpamasya na cakṣuṣā paśyati kaścanainam |
hṛdā hṛdisthaṃ manasā ya enamevaṃ viduramṛtāste bhavanti ||

33.44

tatkarma kṛtvā vinivartya bhūyaḥ tattvasya tattvena sametya yogam |
ekena dvābhyāṃ tribhiraṣṭabhirvā bhāvena caivātmaguṇaiśca sūkṣmaiḥ ||

33.45

āruhya karmāṇi guṇānvitāni bhāvāṃśca sarvānviniyuñjayedyaḥ |
teṣāmabhāve kṛtakarmanāśaḥ karmakṣaye yānti sa tattvatonyaḥ ||

33.46

tamīśvarāṇāṃ paramaṃ maheśvaraṃ taṃ devatānāṃ paramañca daivatam |
patiṃ patīnāṃ prathamaṃ purastāt vidāma devaṃ bhuvaneśamīḍayam ||
na tasya kāryaṃ karaṇañca vidyate na tatsamaścāpyadhikaśca dṛśyate ||

33.47

ityādiṣu śivasya parabrahmaṇaḥ guṇāsādhāraṇyaśruteśca
ananyasādhāraṇaguṇaśravaṇāt tatsākṣātkārānubhavakāṃkṣiṇāṃ
yogayuktamevopāsanaṃ vidhīyate |

33.48

na vā tatsahabhāvādhikaraṇam || 28 ||

33.49

aṅgāvāddhopāsanānāmapi daharādipratīkopāsanānāmiva samuccayasya
anupapannatānirṇayaḥ

33.50

nanu śvetāśvatare -

33.51

udgīthametatparamaṃ tu brahma tasmiṃstrayaṃ svapratiṣṭhākṣarañca |
atrāntaraṃ vedavido viditvā līnā brahmaṇi tatparā yonimuktāḥ || iti

33.52

chāndogye - omityetadakṣaramudgīthamupāsīta ityārabhya yadeva vidyayā karoti
śraddhayopaniṣadā tadeva vīryavattaraṃ bhavati ityādinā praṇavasyaiva
paramātmatvaprasādhanādudgīthavidyāyāḥ kratvarthatayā kratuṣu niyamenopādeyatvāt
paraśivabrahmaparatvamasaṅgatam | tasmādudgīthādyaṅgāvabaddhopāsanānāṃ
daharādividyābhissaha samuccayaḥ anupapannaḥ ityāśaṅkāyāmadhikaraṇāntaramāha
-

33.53

|| 243 || na vā tatsahabhāvāśruteḥ || 63 ||

33.54

na vā udgīthādyaṅgāvabaddhopāsanānāmapi samuccayaniyamo'sti | kutaḥ ||
tatsahabhāvāśruteḥ || tāsāmaṅgāvabaddhopāsanānāṃ udgīthādīnāṃ
daharādividyābhissahabhāvasya samuccayasya aśruteḥ aśravaṇāt | yadeva vidyayā karoti
ityaṅgāvabaddhopāsanānāṃ karmāṅgatvaṃ pratipādyate -
tannirdhāraṇāniyamastaddṛṣṭeḥ pṛthādhyapratibandhaḥ phalaṃ iti sūtre
karmāṅgatvasya nirastatvāt kintvaṅgāvavaddhopāsanāpūrvakakarmānuṣṭhāne kṛte
sati svargādilokotpattibandhakapāpānāṃ nivṛtyā śīghrameva
phalotpattirbhavatītyetāvanmātrameva yadeva vidyayā karoti iti śrutyā pratipādyate | tathā
ca aṅgāvabaddhopāsanānāmapi daharādipratīkopāsanānāmiva samuccayaḥ anupapannaḥ
| omityetadakṣaramudgīthamupāsīta ityādikāḥ

33.55

vidyāḥ kimudgīthādivat kratvarthatayā ṛtuṣu niyamenopādeyāḥ uta
godohanādivatpuruṣārthatayā yathākāmamiti sandihyate | niyamenopādeyā iti uktam |

33.56

nanu cāsāṃ puruṣārthatvena aniyamaḥ pratipāditaḥ |
tannirdhāraṇaniyamastadṛṣṭeḥpṛthagdhyapratibandhaḥ phalaṃ ityatra satyaṃ tadeva
draḍhayituṃ kaiścilliṅgadarśanairyuktyā ākṣipyate | tatra hi tenobhau kuruta
ityaniyamadarśanāt pṛthakphalatvamuktam |
upāsanāśrayabhūtogdīthādivadupāsanānāmapyaṅgatayā upādānāniyame bahavo
hetavaḥ upalabhyante | udgīthamupāsīta ityudgīthādisambandhitayaivopāsanaṃ pratipādyate
yadeva vidyayā karoti śraddhayopaniṣadā tadeva vīryavattaraṃ iti
vartamānopadeśarūpavākyāntarāddhi phalasambandho jāyate | svavākyenaiva
avyabhicaritakratusaṃbandhyudgīthādisaṃbandhena nirjñātakratvaṅgabhāvasya
vākyāntarasthavartamānaphalasabandhanirdeśo'rthavādamātraṃ syāt |
apāpaślokaśravaṇāt tato yadodgīthādaya upāsanāśrayāḥ kratvaṅgatayā prayoga
vidhinā niyamenopādīyante udgīthamupāsīta ityudgīthāṅgatayā
upāsanavidhānāccopādānaniyamaḥ tadā godohanena paśukāmaḥ praṇayet ityādivat
vidhivākye adhikārāntarāśravaṇāt udgīthādyaṅgabhāva eva hi vidheya iti gamyate |
hotṛṣadanāddhaivāpi durudgīthamanusamāharetītyupāsanasya samuccayaniyamo
dṛśyate |

33.57

kiñcopāsanaguṇasyopāsanāśrayasya praṇavasyopāsanasya teneyaṃ trayī vidyā vartate |
omityāśrāvayati omiti śaṃsanti omityudgīthayati iti śruteśca upāsanāsamuccayo gamyate
| teneti prakṛtaparāmarśātsopāsana eva praṇavassarvatra sañcarati | ata upāsanasya
praṇavasahabhāvaniyamadarśanācca udgīthādyupāsanānāṃ
udgīthādivanniyamenopādānamiti prāpte brūmaḥ || na vā tatsahabhāvāśruteḥ ||

33.58

pūrvameva praṇavātmakatvaṃ praṇavātītatvaṃ śivasya parabrahmaṇa eva
spaṣṭamupadiṣṭam | na caitadasti yadudgīthādyupāsanānāṃ
ṛtuṣūdgīthādivadupāsananiyama iti | kutaḥ tatsahabhāvāśruteḥ
udgīthāṅgabhāvāśuterityarthaḥ | aṅgabāve hi sahabhāvaniyamo bhavati | yadyapi
udgīthamupāsīta ityasmin padasamudāye adhikārāntaraṃ na pratīyate | tathāpi
tadanantarameva yadeva vidyayā karoti tadeva vīryavattaraṃ bhavati iti vidyāyāḥ
ṛtuvīryavattaratvaṃ prati sādhanabhāvaḥ pratipādyate | tena ṛtuphalāt
pṛthagbhūtaphalasādhanatayā avagatasyopāsanasya ṛtvaṅgabhūtodgīthāṅgatayā
viniyogo nopapadyate | ataḥ upanyāsāśrayāpekṣāyāṃ sannihita udgītha āśrayamātraṃ
bhavati | udgīthaśca ṛtvaṅgabhūta iti ṛtuprayuktodgīthādyāśraye upāsane
ṛtvadhikāriṇa eva ṛtorvīryavattaratvecchānimittamidaṃ adhikārāntaramiti na ṛtuṣu
tadupāsananiyamaḥ |

33.59

vīryavattaratvañca ṛtuphalasya prabalakarmāntaraphalena apratibandhaḥ ityuktam |
ṛtoravilambitaphalasvamityarthaḥ | parṇatādīnāṃ tu yadeva vidyayā karoti tadeva
vīryavattaraṃ bhavati iti vidyāyāḥ phalasādhanatvavadapāpaślokaśravaṇādiphalaṃ prati
sākṣātsādhanabhāvo na śruta iti pratyaṅgabhūtajuhvādyaṅgatayā viniyogāt
tadaṅgabhūtānāṃ phalāntarasādhanabhāvakalpanānupapattestatra
phalaśrutirarthavādamātraṃ syāditi niścīyate |

33.60

asminnarthe hetvantaramāha -

33.61

|| 244 || darśanācca || 64 ||

33.62

darśayati ca śrutirupāsanopādānāniyaman | evaṃ viddha vai brahmā yajñaṃ yajamānaṃ
sarvāścatvijo'bhirakṣati iti brahmaṇe vedanena sarveṣāṃ lakṣaṇaṃ bravīti |
udgātṛprabhṛtīnāṃ vedanasyāniyame satyetadupapadyate | anena liṅgena
pūrvoktānāṃ samuccayādidharmāṇāṃ prāyikatvamavagamyate | tasmādaniyama eveti
sthitam |

33.63

kiñca - pūrvasūtre pūrvapakṣayuktirnirākṛtā | atra liṅgāni prativakṣyante |
aniyamasya pradarśanatvaṃ udgīthe dṛṣṭam | yajamānaṃ sarvāścatvijo rakṣatītyatra
yajamānasaṃrakṣaṇaṃ ṛtuphalāpratibandhakāraṇādibhiriti mantavyam |
udgātṛprabhṛtivedanaphalaṃ hi kratuphalāpratibandhādi | tasya
brahmākhyaṛtvigvedanena siddhau satyāṃ hi
udgātṛprabhṛtivedanāniyamasiddhirarthādavagamyate | na ca
aṅgāvabaddhopāsanānāṃ karmāṅgatvābhāve phalapratibandhakapāparahitānāṃ
puruṣāṇāṃ aṅgāvabaddhopāsanānuṣṭhānavaiyarthya. syāditi vācyam |
aṅgāvabaddhopāsanāsahakṛtakarmānuṣṭhānavatāṃ bahukālasvarga bhogasya
pradhānavadeva taduktamiti rāddhāntaḥ |

33.64

iti śrīmadyativrajaparivṛḍha-śrīpatipaṇḍitabhagavatpādācāryasvāmikṛta##-

33.65

śrīkarabhāṣye

33.66

sādhanādhyāyasaṃjñikasya tṛtīyādhyāyasya
sarvavedāntapratyayādhikaraṇāvacchinnasarvavedāntapratyayaṃ
codanādyaviśeṣādityādicatuṣṣaṣṭisūtrātmakaḥ

33.67

tṛtīyādhyāyasya tṛtīyaḥ pādaḥ samāptaḥ

33.68

atha śrīkarabhāṣye tṛtīyādhyāyasya caturthaḥ pādaḥ

33.69

puruṣārthādhikaraṇam || 1 ||

33.70

brahmacaryādyāśramacatuṣṭayadharmanirūpaṇam

33.71

pūrvatra kāsāñcidupāsanānāṃ paramparayā muktihetutvam kāsañcit
sākṣānmuktihetutvamuktam | iha tu kālāntarabhāvipāralaukikasvargādiphalabhogayogyasya
śarīrendriyādiviśiṣṭasya jīvasya tanniyāmakaśivajñānaṃ vinaiva
lokāntarakālāntarabhāvisvargādiphalabhogasādhaneṣu bahuvittavyayasādhyeṣu karmasu
prekṣāvatāṃ pravṛtyasambhavāt śivajñānasya
jyotiṣṭomādisarvakarmānuṣṭhānāṅgakatvaṃ vaktavyam | tathā ca
aṅgāṅginorekaphalasādhanatvāt aṅgānāṃ karmaṇāṃ yatphalaṃ svargādikaṃ
tadevāṅginaḥ cidacitprapañcavilakṣaṇaśivajñānasyeti svātantryeṇa
mokṣaikalakṣaṇaphalāntarasādhanatvāsambhavāt sarvavedāntavidyārambho vyartha iti
pūrvamīmāṃsāśaṅkāmāśaṅkya tannirākaraṇārthamidamadhikaraṇāntaramāha ##-

33.72

brahmavidyāyāḥ karmāṅgatvānupapattiḥ

33.73

|| 245 || puruṣārtho'taśśabdāditi bādarāyaṇaḥ || 1 ||

33.74

ataḥ yogānuguṇyadaharādyupāsanāpūrvakasadāśivabrahmasākṣātkārāt puruṣārthaḥ
punarāvṛttirahitanityaniratiśayasvābhāvikajīvatvanivṛttipūrvakaśivatva##-
śivaṃ śāntimatyantameti brahma veda brahmaiva bhavati brahmavidāpnoti paraṃ

33.75

ātmānamaraṇiṃ kṛtvā praṇavañcottarāraṇim |
dhyānanirmathanābhyāsāt pāśaṃ dahati paṇḍitaḥ ||

33.76

śraddhābhaktidhyānayogādavehi ityādiśrutidarśanāt mumukṣūṇāṃ
nikhilakarmavāsanāpaṅkakalaṅkaśūnyatayā nirantaraṃ paraśivabrahmānusandhānaṃ
kartavyamiti sūtrasūcitasūkṣmārthaḥ |

33.77

śikṣāṃ vyākhyāsyāmaḥ varṇaḥ svaraḥ mātrā balaṃ sāmasantānaḥ
ityuktaśśīkṣādhyāyaḥ | saha nau yaśaḥ saha nau brahmavarcasam athātassaṁhitāyā
upaniṣadaṃ vyākhyāsyāmaḥ ityādinā taittirīye śrūyate | yajñena dānena
tapasā'nāśakena ityādiśrutiṣu yajñādikarmaṇāṃ mokṣāṅgatvaśravaṇāt parikṣya
lokān karmacitān brāhmaṇo nirvedamāyāt nāstyakṛtaḥ kṛtena | tadvijñānārthaṃ sa
gurumevābhigacchet samitpāṇiḥ śrotriyaṃ brahmaniṣṭham || ityādau karmaṇo
mokṣāṅgatvaniṣedhāt taittirīye karmajñānobhayatulyaprācuryāvagamāt karmaṇaḥ
svātantryeṇa punarāvṛttirahitaparamapuruṣārthaphalasādhatvaṃ uta jñānāṅgatveneti
saṃśayaḥ |

33.78

jīvātirikteśvarasadbhāve mānābhāvāt jyotiṣṭomena svargakāmo yajeta
aharahassandhyāmupāsīta ityatra śarīrasyaiva kartṛtvāvagamāt yasya parṇamayī
juhūrbhavati vāyurvai kṣepiṣṭhā devatā yatprayājānuyājau yujyete ityādivat prajñānaṃ
brahma ahaṃ brahmāsmi tattvamasi ityādivedāntānāṃ stutiparatvam |

33.79

kiñca - yadeva vidyayā karoti tadeva vīryāvattaraṃ bhavati ityādivedānteṣvapi
vidyāyāḥ karmasu viniyogadarśanāt karmāṅgatvamanivāryam | taṃ vidyākarmaṇī
samārabhete iti vidyākarmaṇorekasmin puruṣe sāhityaṃ dṛśyate |
ācāryakulādvedamadhītya yathāvidhānaṃ guroḥ karmātiśeṣeṇā'bhisamāvṛtya
kuṭumbe śucau deśe svādhyāyamadhīyāno dhārmikān vidadhat ityādau
arthajñānaparyantādhyayanavataḥ svādhyāyo adhyetavyaḥ | karmāṇi vidadhan
arthāvabodhaparyantādhyayanavata eva vidadhāti |
arthāvabodhaparyantamadhyayanavidhireveti sthāpitam | kurvanneveha karmāṇi jijīviṣet
śatagaṁ

33.80

samāḥ ityātmavidaḥ puruṣāyuṣassarvasya karmasu niyamavidhitvena viniyogāt karaṇa eva
phalamityavagamyate | tasmāt brahmavidyāyāḥ karmāṅgatvapratihatamiti prāpte
pravakṣmahe - || puruṣārthasyeti ||

33.81

amṛtasya devadhāraṇo bhūyāsam tamevaṃ vidvān amṛta iha bhavati
ityādiśrutiśateṣu paraśivabrahmaṇaḥ dhyānadhāraṇajñānavidhānādeva
mokṣopadeśāt karmaṇaḥ yatra kutrāpi svātantryeṇa yuktyadarśanāt eṣa eva sādhu karma
kārayati ityādiśrutiṣu bhrāmayan sarvabhūtāni yantrārūḍhāni māyayā ityādismṛtiṣu
ca karmakarturjīvasyāpi śivādhīnatvaṃ śivasyaiva jīvakṛtasarvapāpamocakatvaṃ
coktam |

33.82

kiñca - na karmaṇā yāvadutpadyate jñānaṃ tāvadanuṣṭheyāni karmāṇi

33.83

tyajeddharmamadharmaṃ ca ubhe satyānṛte tyajet |
ubhe satyānṛte tyaktvā yena tyajasi tattyaja ||

33.84

ityādiśrutiṣu brahmajñānecchāvatāṃ karmaniṣedhāvagamāt brahmavidyāyāḥ
karmāṅgatvamanupapannamataścaturthyantadevatāprādhānyajaiminimatamavicārita##-

33.85

nanu vedacatuṣṭayavijñānanidānabhūtajaiminyācāryeṇāpi karmaṇaḥ prādhānyasya
jñānopasarjanatvasya ca vyavasthāpanāt kathaṃ brahmavidyāyāḥ
variṣṭhatvamityāśaṅkāyāmāha -

33.86

|| 246 || śeṣatvātpuruṣārthavādo yathā'nyeṣviti jaiminiḥ || 2 ||

33.87

yaddhi manasā manute tadvācā vadati tatkarmaṇā karoti yadeva jñānapalaṃ tadeva
karmaphalam ityādiśrutiṣu jīvasya śeṣitvasya karmaṇaḥ śeṣatvasya cāvagamāt
puruṣārthavādaḥ puruṣasya jīvasya arthasya prayojanasya vādaḥ vākyopanyāsādikaṃ
karmaśeṣatvāt jīvajanyatvena tadaṃśāt || yathā'nyeṣviti jaiminiḥ ||

33.88

yadā tamastanna divā na rātriḥ na sanna cāsacchiva eva kevalaḥ |
tadakṣaraṃ tatsaviturvareṇyaṃ prajñā ca tasmāt prasṛtā purāṇī ||

33.89

tatsaviturvareṇyaṃ bhargo devasya dhīmahi pracodayāt ityādiśrutiṣu śivasya parabrahmaṇo
buddhiprerakatvaṃ yathā darśitaṃ tathā jīvasyāpi karmaprerakatvamiti karmakāṇḍe
jaiminirmanyate | tasmāttanmate'pi jñānaprādhānyasyārthātsiddhatvāt brahmakāṇḍe
mokṣaphalaṃ prati jñānaprādhānyaṃ kiṃ vaktavyamiti vādarāyaṇācāryo manyate |

33.90

kiñca - satyaṃ vada dharmaṃ cara ityādivedāntasiddhadharmāṇāmapi
mokṣahetutvena jaiminyācāryairapi svīkṛtatvāt karmacito lokaḥ kṣīyate ityādiśrituṣu
karmaphalānāmanityatvasya brahma veda brahmaiva bhavati na sa punarāvartate ityādiṣu
brahmajñānaphalasya nityatvasya cāvagamāt aharahassandhyāmupāsīta ityādivat ātmā
vā're draṣṭavyaḥ vedāntaśravaṇaṃ kurvan yogaṃ samārabheta ākuñcanena kuṇḍalinyā
kavāṭamudghāṭya mokṣadvāraṃ vicchedayet amṛtasya devadhāraṇo bhūyāsaṃ
ityādiṣu vidhidarśanācca tattvamasyādivedāntānāṃ arthavādatvamayuktam | vasiṣṭha##-
yakṣyamāṇo ha vai bhagavannahamasmi iti śrutau kekaṣaṃ prati
karmaniṣṭhabrāhmaṇānāṃ mokṣārthaṃ vedāntavidyāprārthanāvagamāt purāṇeṣvapi
kṣatriyaṃ janakaṃ prati śukātreyādibrāhmaṇavariṣṭhānāṃ
brahmajñānaprārthanadyotanācca brahmavidyāyāḥ sarvādhikatvaṃ gamyate |

33.91

asminnarthe hetvantaramāha -

33.92

|| 248 || ācāradarśanāt || 3 ||

33.93

ākāśaśarīraṃ brahma satyātmaprāṇārāmaṃ mana ānandam |
śāntisamṛddhamamṛtaṃ iti prācīnayogyopāsva ityatra karmanirapekṣatayā
mumukṣūṇāṃ brahmavidyāyāḥ vyavasthāpanāt tasyāḥ karmāṅgatvamayuktam |

33.94

kiñca - karmasu karturjīvādanyo mumukṣubhiḥ prāpyatayā vedānteṣu vedyatayā
copadiśyata iti prāgevopapāditam | netaro'nupapatteḥ bhedavyapadeśācca anupapattestu na
śārīraḥ itaraparāmarśātsa iti cennāsambhavāt ityevamādibhissūtraiḥ tadeva brahma
tattvamasi iti mahāvākyeṣu jīvaprāpyatvena śivasya jīvātiriktatvamupadiṣṭam | adhikaṃ tu
bhedanirdeśāt ityevamādibhiḥ jīvabrahmavādo nirastaḥ | aitadātmyamidaṃ sarvaṃ sarvo
vai rudraḥ viśvarūpāya vai namo namaḥ ityādibhiḥ śivopādānatvena prapañcasya
śivātmakatvamuktam | pratijñāsiddherliṅgamāśmarathyaḥ utkramiṣyata evaṃ
bhāvādityauḍulobhiḥ iti sūtradvayena śrutyaikadeśabhedamatamabhedamataṃ ca
nirākṛtya avasthiteriti kāśakṛtsnaḥ ityādibhiḥ
sarvavedāntasiddhadvaitādvaitamatameva mumukṣubhiḥ prārthanīyamityupapāditam |
tasmāttadarthaṃ karmasu karturātmano yāthātmyopadeśaparā vedāntaśabdāḥ
sampadyanta iti vidyāyāḥ karmāṅgatvaṃ pratipādyate |

33.95

punarhetvantaramāha -

33.96

|| 248 || tacchruteḥ || 4 ||

33.97

śrutireva hi brahmaṇa upāsanameva mumukṣūṇāṃ mokṣāṅgamāha - ya
eṣo'ntarhṛdaya ākāśaḥ tasminnayaṃ puruṣo manomayaḥ | amṛto hiraṇmayaḥ |
antareṇa tāluke | ya eṣa stana ivāvalambate | sendrayoniḥ | yatrā'sau keśānto vivartate |
vyapohya śīrṣakāle | bhūrityagnau pratitiṣṭhati | bhuva iti vāyau | suvarityāditye | maha iti
brahmaṇi || iti |

33.98

kiñca - brahmopāsanayā sarvakāmāvāptiḥ śrutyopadiṣṭā - yo veda nihitaṃ
guhāyāṃ parame vyoman | so'śnute sarvān kāmān - saha brahmaṇā || iti |

33.99

pradeśāntare'pi brahmavidyāyāḥ sarvakarmāvāptiphalamupadiśyate -

33.100

śucīnāṃ śrīmatāṃ gehe yogabhraṣṭo hi jāyate |
athavā yogināmeva kule bhavati dhīmatām ||

33.101

iti smṛtau brahmopāsanarūpayogabhraṣṭānāṃ kāmavāsanayā janmāntare'pi martyaloke
sadācārāvacchinnadhanikagehe jananaṃn akāmukānāṃ
punarbrahmopāsanātmakayogināṃ gṛhe bhavanaṃ ca dṛśyate | ato brahmavidyāyāḥ
sarvādhikatvamanavadyam |

33.102

asminnarthe punarhetvantaramāha -

33.103

|| 249 || samanvārambhaṇāt || 5 ||

33.104

33.105

punarhetvantaramāha -

33.106

|| 250 || tadvato vidhānāt || 6 ||

33.107

mātṛdevo bhava | pitṛdevo bhava | ācāryadevo bhava | atithidevo bhava |
yānyanavadyāni karmāṇi tāni sevitavyāni | no itarāṇi | yānyasmākaṁ sucaritāni tāni
tvayopāsyāni | no itarāṇi ityādinā tadvataḥ brahmavidyāṅgatvena
mātāpitrādibhaktividhānāvagamāt na brahmavidyāyāḥ karmāṅgatvam ||

33.108

punarhetvantaramāha -

33.109

|| 251 || niyamāt || 7 ||

33.110

33.111

ityādinā tathā niyamavidhitvena sarveṣāṃ karmaṇāṃ brahmavidyāṅgatvapratipādanāt
nānārtho yuktaḥ |

33.112

evaṃ taittirīyaśrutyā karmaṇaḥ vidyāṅgatvaṃ prasādhya tadeva satyamiti svamataṃ
daśayati -

33.113

|| 252 || adhikopadeśāttu vādārāyaṇasyaivaṃ taddarśanāt || 8 ||

33.114

tu śabdo'tra niścayārthaḥ | vidyāta eva puruṣārthaḥ kuta || adhikopadeśāt || karmasu
karturjīvāt heyapratyanīkānavadhikātiśayāsaṃkhyeyakalyāṇaguṇākaratvena
adhikasyārthāntarabhūtasya śivasya parabrahmaṇo vedyatayopadeśāt bhagavato
vādarāyaṇasya vidyātapaḥphalamityevameva matam liṅgāni tiṣṭantu |
vedyatayopadeśastu tāvatkartuḥ pratyagātmano'dhikasyaiva | katham || taddarśanāt ||
pratyagātmanyaśuddhe śuddhe'pyasambhāvanīyānantaguṇākarasya mahanīyasya vedyasva
nirastanikhilaheyagandhasya svasaṅkalpakṛtajagadudayavibhavalayalīlasya sarvajñasya
sarvaśaktervāṅmanasāparicchedyānandasya jīvādhikasya kṛtsnasya
praśāsituśśivasya brahmaṇo vedanopadeśavākyeṣu darśanāt | apahatapāpmā vijaro
vimṛtyurviśoko vijighatso'pipāsaḥ satyakāmassatyasaṅkalpaḥ tedaikṣata bahusyāṃ
prajāyeya ānandaṃ brahmaṇo vidvān na vibheti kutaścana eṣa sarveśvaraḥ eṣa
bhūtādhipatireṣa bhūtapālaḥ eṣa seturvidharaṇaḥ sakāraṇaṃ kāraṇādhipādhiko na cāsya
kaścijjanitā na cādhipaḥ etasya vā akṣarasya praśāsane gārgi sūryācandramasau
vidhṛtau tiṣṭhataḥ etasya vā akṣarasya praśāsane gārgi bhīṣāsmāt vātaḥ pavate
ityādiṣu vedanopadeśaśabdeṣu kartuḥ pratyagātmanaḥ svadyotakalpanasya
avidyādiheyasambandhayogyasya gandho'pi nāstīti paramapuruṣaśivaviṣayāyāḥ vidyāyāḥ
tatprāptirūpamamṛtatvaṃ tatra tatra śrūyamāṇaṃ phalamiti vidyātaḥ puruṣārtha
ityayuktam |

33.115

asminnarthe punarhetvantaramāha -

33.116

|| 253 || tulyantu darśanāt || 9 ||

33.117

yaduktaṃ brahmavidāṃ karmānuṣṭhānadarśanāt vidyāyāḥ karmāṅgatvamiti tanna
vidyāyāḥ anaṅgatve'pi tulyaṃ darśanam brahmavidāṃ karmānuṣṭhānadarśanaṃ
anaikāntikamityarthaḥ ananuṣṭhānasyāpi

33.118

darśanāt | dṛśyate hi brahmavidāṃ karmatyāgaḥ - ṛṣayaḥ kāvaṣeyāḥ
karmathāṃ vayamadhyeṣyāmahe kimarthaṃ vayaṃ yakṣyāmahe kiṃ prajayā
kariṣyāmaḥ ityādau | ato brahmavidāṃ karmatyāgadarśanāt na vidyā karmāṅgam |
kathamidamupapadyate brahmavidāṃ karmānuṣṭhānamananuṣṭhānañca
phalābhisandhirahitasya yajñādikarmaṇo brahmavidyāṅgatvāt atathāvidhasya karmaṇo
mokṣaikaphalabrahmavidyāvirodhitvāt tasyānanuṣṭhānadarśanaṃ upapannataram |

33.119

vidyāyāḥ karmāṅgatve karmatyāgaḥ kathamapi nopapadyate | yadeva vidyayā karoti tadeva
vīryavattaraṃ bhavati iti śrutiḥ vidyāyāḥ karmāṅgatvamavagamayatīti āśaṅkāyāmāha
-

33.120

|| 254 || asārvatrikī || 10 ||

33.121

na dahara-śāṇḍilya-vaiśvānara-upakosala-bhūmādisarvaviṣayeyaṃ
śrutiḥ apitu udgīthavidyāviṣayaiva | yadeva vidyayā karoti iti yacchabdasya
anirdhāritaviśeṣasya udgīthamupāsīta iti prastutodgīthaviśeṣaniṣṭhatvāt | na hi yatkaroti
tadvidyayeti sambadhyate | vidyayā kriyamāṇaṃ yacchabdena nirdiśya tasya hi
vīryavattaratvamucyate |

33.122

yaccoktaṃ taṃ vidyākarmaṇī samanvārabhete pūrvaprajñā ca iti śrutau
ātmājñānakarmaṇoḥ aṅgāṅgibhāvena militayoḥ svargalokaprāptisādhanatvakathanāt
brahmajñānasya svātantryeṇa mokṣasādhanatvamayuktamityāśaṅkyāha -

33.123

|| 255 || vibhāgaḥ śatavat || 11 ||

33.124

taṃ vidyākarmaṇī samanvārabhete ityatroktena nyāyena vidyākarmaṇorbhinnaphalatvāt
vidyā svasmai phalāya samanvārabhate karma ca svasmai phalāyeti vibhāgo draṣṭhavyaḥ |

33.125

kiñca - vidyāśabdenā'mūrtaparaśivajñānaṃ mūrtaparaśivajñānaṃ vā procyate |
niravayavatattvajñānināṃ karmāṇi vijñānamayaśca ātmā pare'vyaye sarva ekībhavanti
iti ihaiva sūkṣmaśarīravilayapūrvakaṃ atraiva paraśivabrahmaikatvasya pratipāditatvāt
paralokagamanaprasaktyasambhavena vidyāśabdena mūrtaparaśivabrahmopāsanaiva gīyate |
evaṃ sthite sati taṃ vidyākarmaṇī samanvārabhete iti śrutau vibhāgo niścīyate | taṃ
devayānamārgeṇa paraśivabrahmalokaṃ gacchantaṃ mūrtabrahmopāsakaṃ
vidyāmūrtaśivopāsanā samanvārabhate - anusṛtya gacchati | taṃ
dhūmādimārgeṇa svargalokaṃ gacchanta karmiṇaṃ jyotiṣṭhomādirūpaṃ karma ca
samanvārabhate anusṛtya gacchati ityevaṃkathaṃ vibhāgo'vagamyate śatavat | yathā
kṣetraratnavikrayiṇaṃ śatadvayamanvetītyukte kṣetrārthaṃ śataṃ ratnārthaṃ śataṃ iti
vibhāgaḥ pratīyate tadvadihāpi vediyavyam |

33.126

uta - śatavadityatra dvayorbrāhmaṇayoḥ śataṃ parṇā iti vākye ekasya brāhmaṇasya
pañcāśatparṇā dātavyāḥ anyasya brāhmaṇasya pañcāśatparṇā dātavyāḥ iti vibhāgo
yathā niścīyate tadvadamūrtaparaśivabrahmopāsanākarmaṇoḥ svātantrye' pratyekaṃ
mūrtaparaśivabrahmaloka-svargalokaprāptisādhanasya-uktatvāt ubhayormilitvā
paraśivabrahmalokaprāptiṃ prati vā sādhanatvamiti saṃśaye
jyotiṣṭomādikarmopāsakānāṃ svargalokānubhavaḥ mūrtaparaśivabrahmopāsakānāṃ
niratiśayānandasvabhāvanitvanirupamādvitīyaparaśivalokakalyāṇavibhūtyātmaka##-

33.127

nanu taṃ vidyākarmaṇī samanvārabhete taṃ svargalokaṃ gacchantaṃ karmiṇaṃ
vidyākarmaṇī iti vākye vidyāśabdena
karmāṅgabhūtaśarīrendriyamanaḥprāṇādyatirikta jīvajñānaṃ paśu##-
anusṛtya gacchatītivākye karmajñānayorubhayorekatvāvagamāt na vai lakṣaṇyamiti
ceducyate - śarīrendriyādyatiriktajīvajñānasya śivopāsanāṅgabhūtatvāt jīva##-
dehendriyamanaḥprāṇajīvaikyajñānānusaraṇena jyotiṣṭomādikarmācaraṇasya svargaloka
prāptihalamucyate | tasmāt śarīrendriyādyabhimānijīvajñānasyaiva karmāṅgatvamiti
niścīyate |

33.128

yaccoktaṃ - ya evaṃ vidvān yajate iti śrutau śivajñānināmapi
karmādhikāraśravaṇāt śivajñānamapi karmānuṣṭhānāṅgameveti punaḥ
śaṅkāyāṃ pariharaṇārthamāha -

33.129

|| 256 || adhyayanamātravataḥ || 12 ||

33.130

yaduktaṃ vidyākarmavataḥ karmavidhānādvidyākarmāṅgatvamiti naitadyuktam -
vedamadhītya ityadhyayanamātravato vidhānāt | na cādhyayanaviddhirevārthabodhe
pravartayati ādhānavadadhyayanasyākṣararāśigrahaṇamātre paryavasānāt gṛhītasya ca
svādhyāyasya phalavatkarmāvabodhitvadarśanāt tannirṇayaphale tadarthavicāre puruṣaḥ
svayameva pravartate | tataḥ karmārthī karmajñāne pravartate | mokṣārthī ca brahmajñāne
iti na vidyā karmāṅgam |

33.131

yadyapyadhyayanavidhirevārthāvabodhe pravartayati - tathā'pi na vidyā karmāṅgaṃ
arthajñānādarthāntaratvādvidyāyāḥ | yathā
jyotiṣṭomādikarmasvarūpavijñānātphalasādhanabhūtaṃ
tattatkarmānuṣṭhānamarthāntaraṃ
tathārthajñānarūpādbrahmasvarūpavijñānādarthāntarameva dhyāna##-
karmasambandhagandho vidyate |

33.132

ya evaṃ vidvān yajate vidvānagnihotraṃ juhuyāt ityādiśrutiniṣṭhavidvacchabdena
karmakāṇḍaprakaraṇapaṭhitavedārthajñānipuruṣaviṣayatvam | na tu
brahmajñānipuruṣaparatvam | tasmāt vedādhyayanavataḥ pāṇineya##-
parameśvarārpitabahujanmakṛtakarmānuṣṭhānaṃ tu paramparayā mokṣaheturiti
vidhīyate |

33.133

kurvanneveha karmāṇi iti śrutau śivajñānitadajñānipuruṣāṇāṃ sarveṣāṃ
śarīrapātaparyantaṃ karmānuṣṭhānasyāvasyakatvakathanāt na paraśivabrahmajñānasya
svātantryeṇa mokṣahetutvamityāśaṅkya tatparihāramāha -

33.134

|| 257 || nāviśeṣāt || 13 ||

33.135

yaccoktaṃ kurvanneveha karmāṇi ityātmavidaṃ jñānāt vyāvartya yāvajjīvaṃ
karmānuṣṭhāne niyamayati iti tannopapadyate - aviśeṣāt na hyayaṃ niyamaḥ
phalasādhanabhūtasvatantrakarmaviṣaya

33.136

iti viśeṣaheturasti vidyāṅgabhūtakarmaviṣayatayāpyupapatteḥ | karmaṇaiva hi
saṃsiddhiṃ āsthitā janakādayaḥ ityatra karmaṇā janakādīnāṃ
mokṣaprathamāṅgabhūtāṃ cittaśuddhiṃ vindantītyavagamyate |

33.137

liṅgāṅgināṃ niṣkāmakarmāṇi vihitāniḥ

33.138

śrutismṛtyuditaṃ dharmaṃ nityanaimittikāśrayam |
kuryālliṅgāṅgasambandhī dvijanmā kāmavarjitaḥ ||

33.139

vidhyuktakarmānuṣṭhānāt cittaśuddhirbhaveddhruvam |
cittaśudhyā bhavedbhaktiḥ sāpi cāvyabhicāriṇī ||

33.140

tayā sañjāyate jñānaṃ na cā'styajñānamātmanaḥ |
tasmānmokṣastataḥ karma vidhyuktaṃ samyagācaret ||

33.141

iti śaṅkarasaṃhitāyāṃ karmaṇāṃ mokṣasya prathamāṅgatvaṃ nirūpitam |

33.142

evamarthasvabhāvena codyaṃ parihṛtya kurvanneveha karmāṇi iti vākyasya arthamāha ##-

33.143

|| 258 || stutaye'numatirvā || 14 ||

33.144

vā śabdo'vadhāraṇārthaḥ | īśāvāsyamidaṃ sarvaṃ yatkiñca jagatyāṃ jagat | tena
tyaktena bhujjīthāḥ mā gṛdhaḥ kasyaciddhanam || iti vidyāprakaraṇāt vidyāstutaye
sarvadā karmānuṣṭhānānumatiriyam | vidyāmāhātmyāt sarvadā karma kurvannapi na
lipyate karmamiriti hi vidyā stutā bhavati | vākyaśeṣaścaivameva darśayati | evaṃ tvayi
nānyaśrato'sti na karma lipyate nare iti |

33.145

śivabhāvanayā sarvaṃ nityanaimittikādikam |
kurvannapi mahāyogī guṇadoṣairna badhyate ||

33.146

iti siddhāntāgame śrūyate | ato na karmāṅgaṃ vidyā |

33.147

nanu

33.148

saktāḥ karmaṇyavidvāṃso yathā kurvanti bhārata |
kuryādvidvāṃstathā saktaḥ cikīrṣurlokasaṅgraham ||

33.149

jñāne siddhe'pi viduṣāṃ karmāpi viniyujyate |
phalābhisandhirahitaṃ tasmātkarma na santyajet ||

33.150

ityādibahusmṛtiṣu viduṣāmapi
nityanaimittikādinikhilakarmānuṣṭhānāvaśyakatvakathanāt karmānuṣṭhānasya
vidyāstutiparatvaṃ kathamityāśaṅkāyāmāha -

33.151

|| 259 || kāmacāreṇa caike || 15 ||

33.152

api caivaṃ eke śākhinaḥ kāmacāreṇa brahmavidyāniṣṭhasya gārhasthyatyāgamadhīyate |
kiṃ prajayā kariṣyāmaḥ yeṣāṃ no'yamātmāyaṃ lokaḥ iti viduṣo viraktasya kāmacāreṇa
gārhastthakarmatyāgaṃ bruvadidaṃ vacanaṃ brahmavidyāyāḥ karmāṅgatvaṃ darśayati |
na karmaṇā ityādiśrutiṣu |

33.153

anekajanmaśuddhānāṃ śrautasmārtānuvartinām |
viraktānāṃ prabuddhānāṃ prasīdati maheśvaraḥ ||

33.154

prasanne sati mukto'bhūnmuktaśśivasamo bhavet |
alpabhāvo'pi yo martyaḥ tasya janmatrayātparam ||

33.155

ityādiṣvapi yajñādikarmāṅgatve hi vidyāniṣṭhasya kāmacāreṇa gārhaṃsthyatyāgo na
sambhavati | ato na vidyāyāḥ karmāṅgatvam |

33.156

jīvabrahmabhedajñānasya karmānuṣṭhānāṅgabhāvāt caturvidhamokṣāṅgatvaṃ
sādhitam | idānīṃ jīvabahmajñānaviṣayakasākṣātkārasya sarvakarmanāśakatvādapi
jīvabrahmabhedaviṣayakaṃ parokṣajñānaṃ kathaṃ na karmāṅgamityāśaṅkāyāmāha
-

33.157

|| 260 || upamardaṃ ca || 16 ||

33.158

bahuśarīrapraveśa-nirgamana-praveśavyāpārasāṃsārikaduḥkhamūlapuṇya##-

33.159

bhidyate hṛdayagranthiḥ chidyante sarvasaṃśayāḥ |
kṣīyante cāsya karmāṇi tasmin dṛṣṭe parāvare ||

33.160

cittākāśaṃ cidākāśaṃ ākāśaṃ ca tṛtīyakam |
dvābhyāṃ śūnyataraṃ viddi cidākāśaṃ mahāmune ||

33.161

dhyāyato hṛdayākāśe citiciccakradhārayā |
mano māraya niśśaṅka tvāṃ prabadhnanti nārayaḥ ||

33.162

bhogaikavāsanāṃ tyaktvā tyaja tvaṃ bhedavāsanām |
bhāvābhāvau tatastyaktvā nirvikalpaḥ sthiro bhava ||

33.163

tyaja dharmamadharmaṃ ca ubhe satyānṛte tyaja |
ubhe satyānṛte tyaktvā yena tyajasi tattyaja ||

33.164

ātmanyatīte sarvasyātmasvarūpe'thavātate |
ko bandhaḥ kaśca vā mokṣaḥ nirmūlaṃ mananaṃ kuru ||

33.165

ādimadhyāvasāneṣu duḥkhaṃ sarvamidaṃ yataḥ |
tasmātsarvaṃ parityajya tattvaniṣṭho bhavānagha ||

33.166

nidrāyā lokavārtāyā śabdāderātmavismṛtaḥ |
kvacinnāvasaraṃ datvā cintayātmānamātmani ||

33.167

āsupterāmṛteḥ kālaṃ nayedvedāntacintayā |
dadyānnāvasaraṃ kiñcit kāmādīnāṃ manāgapi ||
andhavajjaḍavaccāpi mūkavacca mahīṃ caret |

33.168

ityādiśrutiṣi jñānāgniḥ sarvakarmāṇi bhasmasātkurute'rjuna ityādismṛtiṣu ca
vidyāyāḥ karmāṅgatvena sarvotkṛṣṭatva sarvadarmalayahetutvāvagamāt tadeva yuktam |
na ca paraśivabrahmasākṣātkārasya sakalakarmānuṣṭhānāṅgāvābhāve'pi
śravaṇottarakālīnasya jīvabrahmabhedasya parokṣajñānasya ca
karmānuṣṭhānāṅgatvaṃ bhavatīti vācyam | vedāntavijñānasuniścitārthāḥ mucyanti
sarve ityādiśrutiṣu tadjñānasyāpi kramamuktihetutvāvagamāt na karmāṅgatvaṃ
siddham |

33.169

ūrdhvaretaskādhikaraṇam || 2 ||

33.170

śaivāgamavihitaśaivacaturāśramiliṅgadhāraṇanirṇayaḥ

33.171

nanu - vīrahā vā eṣa devānāṃ yo'gnimudvāsayet ityādiśrutiṣvagnihotrādikarmaṇāṃ
akaraṇe pratyavāyāvagamāt vasiṣṭha-janakādibrahmaniṣṭhānāmapi
karmānuṣṭhānadarśanācca brahmavidyāyāḥ karmāṅgatvaṃ
kathamanupapannamityāśaṅkāyāṃ tannirākaraṇārthaṃ adhikaraṇāntaramāha -

33.172

|| 261 || ūrdhvaretassu ca śabde hi || 17 ||

33.173

nyāsa iti brahmaṇaḥ paraḥ paro hi brahmā tāni vā etānyāvarāṇi tapāgṁsi nyāsa
evātyarecayadya evaṃ vedetyupaniṣat iti taittirīye nyāsa ityāhurmanīṣiṇo brahmāṇaṃ
brahma ityādiṣu bahujanmakṛtapuṇyapuñjaparipakvaśuddhāntaḥkaraṇānāṃ
jyotiṣṭomādikarmanirākaraṇapūrvakasaṃnyāsāśramopadeśāt yāvajjīvamagnihotraṃ
juhoti vīrahā vā eṣa devānāṃ yo'gnimudvāsayate ityādāvakaraṇe pratyavāyapūrvakatvena
agnihotra-darśapūrṇamāsādīnāṃ yāvajjīvādhikāravyavasthāpanāt vāmadeva##-
nirābhāra saṃjñikayatyāśramaviśiṣṭatvadyotanācca loke sarveṣāṃ brāhmaṇānāñca
caturthāśramasaṃjñikasanyāsaḥ kartavyo'kartavyo veti sandihyate |

33.174

ūrdhvaretasāmapi sanyāsaḥ kartavya eveti | yāvajjīvamagnihotraṃ juhoti ityādinā
agnihotra-darśapūrṇamāsādīnāṃ yāvajjīvakartavyadarśanāt trayo dharmaskandhāḥ
ityādau āśramatrayasyaivopadeśāt brahmasaṃstho'mṛtatvameti nyāsa ityāhurmanīṣiṇo
brahmāṇaṃ brahma ityādituryāśramavidhāyakavākyānāṃ arthavādamātraṃ atra kriyate
| ye ceme'raṇye śraddhāṃ tapa ityupāsate iti ca devayānavidhiparatvāt tatrāpi
nāśramāntaravidhiḥ sambhavati |

33.175

kiñca -

33.176

aśvālambaṃ gavālambaṃ sanyāsaṃ palapaitṛkam |
devarācca sutotpattiḥ kalau pañca vivarjayet ||

33.177

iti pārāśarasmṛtau sanyāsaniṣedhāvagamāt

33.178

kṛte tu mānavo dharmaḥ tretāyāṃ gautamasmṛtiḥ |
dvāpare śaṃkhalikhitaṃ kalau pārāśarasmṛtiḥ ||

33.179

iti tatraiva sarvasmṛtyapekṣayā pārāśarasmṛteḥ balīyastvopadeśāt

33.180

śaivaḥ pañcavivarjayet

33.181

prāyaścittaṃ copavāsaṃ saṃnyāsaṃ yativandanam |
tīrthayātrābhigamanaṃ śaivaḥ pañca vivarjayet ||

33.182

iti śaivāgame tadvadupadeśācca sarvathā vaidikānā caturthāśramo na kartavya eveti
prāpte pracakṣmahe -

33.183

na vidyā karmāṅgam

33.184

ūrdhvaretassu āśrameṣu brahmavidyādarśanāt teṣvagnihotra##-
vaidika eva hi śabde te dṛśyante | trayo dharmaskandhāḥ | ye ceme'raṇye śraddhā tapa
ityupāsate evameva pravrājino lokamicchantaḥ pravrajanti vedānamuṃ lokaṃ amuṃ
lokamamuṃ parityajyātmānamanvicchet traya ete puṇyalokā bhavanti | brahma saṃstho
amṛtatvameti saṃnyasya śravaṇaṃ kuryāt ityādau yatyāśramasthānāṃ
agnihotrādikarmānuṣṭhānavidhyabhāvāt yāvajjīvamagnihotraṃ juhoti
ityādiśrutisiddhayāvajjīvāgnihotravidhistvaviraktaviṣaya eveti siddham | tathā
sūtasaṃhitāyāṃ -

Linked texts (1)

Brahmasūtra — Bādarāyaṇa, Sanskrit