Utpadasiddhi 5.80.1

5.80.1

na yāti na ca tatrāsīdasti paścānna cāṃśavat| jahāti pūrvaṃ nādhāramihā(tyā)vyasanasantatiḥ ||3||” iti, tādātmyapakṣo'pi sāmānyaviśeṣayorayukta iti yaddūṣaṇamuktaṃ sugatasutaistadapi na sāvakāśaṃ, viśeṣā eva kathañcitsamānasvabhāvāḥ sāmānyaṃ, samānā eva sāmānyamiti kṛtvā, nanvevaṃ sati viśeṣā evāvaśiṣyante, na sāmānyaṃ, yadyevaṃ tarhi kiṃ na yatkiñcid yena kenacitsaha tulyatayā pratibhāsate ?, atha svahetubhyaḥ kecideva viśeṣāḥ kaiścitsaha samānākārā upajāyante, tatrāpi yadi samānākārā eva te visadṛśarūpatayā kathamavabhāsante ?, atha visadṛśāste samānākāratayā kathamavabhāseran ?, atha tādṛśameva tatteṣāṃ svarūpaṃ yatkenacitsaha tulyamatulyaṃ cāvabhāsate, ata eva tarhi tatsāmānyaviśeṣātmakamiṣyatāṃ, yatpunaḥ yadvastutve satyatadrūpaṃ tasya tato'nyatvamevaṃ, yathā sukhād duḥkhasya, vastutve satyavyaktirūpaṃ ceṣyate sāmānyamityekāntasādhanaṃ, tanna sādhu, sakalāparasajātīyavijātīyavilakṣaṇātmanaḥ kasyacidvyaktirūpasya bhavanmatanirvikalpakapratyakṣe'pyapratibhāsanāt, tadapi hi tathā'vabhāsena vastu vastvantareṇa saha samānāsamānarūpaṃ pratipadyamānamasadabhyupagamameva sādhayati, na caikā kācidvyaktireva kevalā yato jātirbhidyeta, kintvevaṃbhūtameva jātyantararūpametadvastviti, ata eva–“sarvasomayarūpatve, tadviśeṣanirākṛteḥ| codito dadhi khādeti, kimuṣṭraṃ nābhidhāvati ? ||1||” ityādyapi dūṣaṇamanavakāśaṃ, sāmānyaviśeṣātmakavastusiddhau tadviśeṣasiddheḥ, paramate tvetaddūṣaṇamanivāryameva, tathāhi–ekasmādbho dadhyantaraṃ na samānarūpamekāntavilakṣaṇatvāt,