Nyayavinishcaya v1.p33
Nyāyaviniścayavivaraṇa v1.p33
- Language
- Sanskrit
v1.p33.1
prastāvanā usameṃ abheda eka kone meṃ par̤ā hogā aura abheda ke anantoṃ bhāī-bandhu usameṃ tādātmya ho rahe hoṃge| ataḥ ina jñānalavadhāriyoṃ ko udāradṛṣṭi denevāle tathā vastu kī jhām̐kī dikhānevāle anekāntadarśana ne vāstavika vicāra kī antima rekhā khīṃcī hai, aura yaha saba huā hai mānasa samatāmūlaka tatvajñāna kī khoja se| jaba isa prakāra vastusthiti hī anekāntamayī yā ananta dharmātmikā hai taba sahaja hī manuṣya yaha socane lagatā hai ki dūsarā vādī jo kaha rahā hai usakī sahānubhūti se samīkṣā honī cāhiye aura vastusthiti mūlaka samīkaraṇa honā cāhiye| isa svīyasvalpatā aura vastu anantadharmatā ke vātāvaraṇa se nirarthaka kalpanāoṃ kā jāla ṭūṭegā aura ahaṃkāra kā vināśa hokara mānasasamatā kī sṛṣṭi hogī| jo ki ahiṃsā kā saṃjīvana bīja hai| isa taraha mānasa samatā ke lie anekānta darśana hī ekamātra sthira ādhāra ho sakatā hai| jaba anekānta darśana se vicāraśuddhi ho jātī hai taba svabhāvataḥ vāṇī meṃ namratā aura parasamanvaya kī vṛtti utpanna ho jātī hai| vaha vastusthiti ko ullaṃghana karanevāle śabda kā prayoga hī nahīṃ kara sakatā| isīlie jainācāryoṃ ne vastu kī anekadharmātmakatā kā dyotana karane ke lie 'syāt' śabda ke prayoga kī āvaśyakatā batāī hai| śabdoṃ meṃ yaha sāmarthya nahīṃ jo ki vastu ke pūrṇarūpa ko yugapat kaha sake | vaha eka samaya meṃ eka hī dharma ko kaha sakatā hai| ataḥ usī samaya vastu meṃ vidyamāna śeṣa dharmoṃ kī sattā kā sūcana karane ke lie 'syāt' śabda kā prayoga kiyā jātā hai|
v1.p33.2
'syāt' kā 'suniścita dṛṣṭikoṇa' yā 'nirṇīta apekṣā' hī artha haiṃ 'śāyada, sambhava kadācit ādi nahīṃ| 'syādasti' kā vācyārtha hai-svarūpādi kī apekṣā se vastu hai hī' na ki 'śāyada hai', 'sambhava hai', 'kadācit hai| ādi| saṃkṣepataḥ jahām̐ anekānta darśana citta meṃ samatā, madhyasthabhāva, vītarāgatā, niṣpakṣatā kā udaya karatā hai vahām̐ syādvāda vāṇī meṃ nirdopatā āne kā pūrā avasara detā hai| isa prakāra ahiṃsā kī paripūrṇatā aura sthāyitva kī preraṇā ne mānasa śuddhi ke lie anekāntadarśana aura vacana śuddhi ke lie syādvāda jaisī nidhiyoṃ ko bhāratīya saṃskṛti ke kopāgāra meṃ diyā hai| bolate samaya vaktā ko sadā yaha dhyāna rahanā cāhie ki vaha jo bola rahā hai utanī hī vastu nahīṃ hai, kintu bahuta bar̤ī hai, usake pūrṇarūpa taka śabda nahīṃ pahuṃca sakate| isī bhāva ko jatāne ke lie vaktā 'syāt' śabda kā prayoga karatā hai | 'syāt' śabda vidhiliṅ meṃ niṣpanna hotā hai, jo apane vaktavya ko niścita rūpa meṃ upasthita karatā hai na ki saṃśaya rūpa meṃ| jaina tīrthakaroṃ ne isa taraha sarvāṅgīṇa ahiṃsā kī sādhanā kā
v1.p33.3
vaiyaktika aura sāmājika donoṃ prakāra kā pratyakṣānubhūta mārga batāyā hai| unane padārthoṃ ke svarūpa kā yathārtha nirūpaṇa to kiyā hī, sātha hī padārthoṃ ke dekhane kā, unake jñāna karane kā aura unake svarūpa ko vacana se kahane kā nayā vastusparśī mārga batāyā| isa ahiṃsaka dṛṣṭi se yadi bhāratīya darśanakāroṃ ne vastu kā nirīkṣaṇa kiyā hotā to bhāratīya jalpakathā kā itihāsa raktaraṃjita na huā hotā aura dharma tathā darśana ke nāma para mānavatā kā nirdalana nahīṃ hotā| para ahaṃkāra aura śāsana bhāvanā mānava ko dānava banā detī hai| usa para bhī dharma aura mata kā 'aham' to ati durnivāra hotā hai | parantu yuga yuga meṃ aise hī dānavoṃ ko mānava banāne ke lie ahiṃsaka santa isī samanvaya dṛṣṭi, isī samatā bhāva aura isī sarvāṅgīṇa ahiṃsā kā sandeśa dete āe haiṃ| yaha jaina darśana kī hī viśeṣatā hai jo vaha ahiṃsā kī taha taka pahum̐cane ke lie kevala dhārmika upadeśa taka hī sīmita nahīṃ rahā api tu vāstavika sthiti ke ādhāra se dārśanika yuktiyoṃ ko sulajhāne kī maulika dṛṣṭi bhī khoja sakā | na kevala dṛṣṭi hī kintu mana vacana aura kāya ina tīnoṃ dvāroṃ se honevālī hiṃsā ko rokane kā praśastatama mārga bhī upasthita kara sakā|
v1.p33.4
āja ḍaॉ. bhagavāndāsa jaise manīṣī samanvaya aura saba dharmoṃ kī maulika ekatā kī āvāja bulanda kara rahe haiṃ| ve varṣoṃ se kaha rahe haiṃ ki samanvaya dṛṣṭi prāpta hue binā svarājya sthāyī nahīṃ ho sakatā, mānava mānava nahīṃ raha sakatā| unhoṃne apane 'samanvaya' aura 'darśana kā prayojana' ādi granthoṃ meṃ isī samanvaya tattva kā bhūri bhūri pratipādana kiyā hai| jaina ṛṣiyoṃ ne isa samanvaya (syādvāda) siddhānta para hī saṃkhyābaddha grantha likhe haiṃ| inakā viśvāsa hai ki jaba taka dṛṣṭi meṃ samīcīnatā nahīṃ āyagī taba taka