Pramāṇa · Search · About · API

Devimdatthaa 5: Vaimānika adhikāra

Deviṃdatthaa 5

Language
Māhārāṣṭrī Prakrit

Vaimānika adhikāra

5.162

bhavanavai-vāṇamaṃtara-joisavāsīṭhiī mae kahiyā |
kappavaī vi ya vocchaṃ bārasa iṃde mahiḍḍhīe ||

5.163

paḍhamo sohammavaī 1 īsāṇavaī u bhannae bīo 2 |
tatto saṇaṃkumāro havai 3 cauttho u māhiṃdo 4 ||

5.164

paṃcamao puṇa baṃbho 5 chaṭṭho puṇa laṃtao'ttha deviṃdo 6 |
sattamao mahasukko 7 aṭṭhamao bhave sahassāro 8 ||

5.165

navamo ya āṇaiṃdo 9 dasamo puṇa pāṇao'ttha deviṃdo 10 |
āraṇa ekkārasamo 11 bārasamo accuo iṃdo 12 ||

5.166

ee bārasa iṃdā kappavaī kappasāmiyā bhaṇiyā |
āṇāīsariyaṃ vā teṇa paraṃ natthi devāṇaṃ ||

5.167

teṇa paraṃ devagaṇā sayaicchiyabhāvaṇāi uvavannā |
gevijjehiṃ na sakkā uvavāo annaliṃgeṇaṃ ||

5.168

je daṃsaṇavāvannā liṃgaggahaṇaṃ kareṃti sāmaṇṇe |
tesiṃ pi ya uvavāo ukkoso jāva gevejjā ||

5.169

ittha kira vimānāṇaṃ battīsaṃ vaṇṇiyā sayasahassā |
sohammakappavaiṇo sakkassa mahānubhāgassa 1 ||

5.170

īsānakappavaiṇo aṭṭhāvīsaṃ bhave sayasahassā 2 |
bārasa ya sayasahassā kappammi saṇaṃkumārammi 3 ||

5.171

aṭṭheva sayasahassā māhiṃdammi u bhavaṃti kappammi 4 |
cattāri sayasahassā kappammi u baṃbhalogammi 5 ||

5.172

ittha kira vimānāṇaṃ pannāsaṃ laṃtae sahassāiṃ 6 |
cattā ya mahāsukke 7 chacca sahassā sahassāre 8 ||

5.173

āṇaya-pāṇayakappe cattāri sayā''raṇa'ccue tinni 11-12 |
satta vimānasayāiṃ causu vi eesu kappesu ||

5.174

eyāiṃ vimānāiṃ kahiyāiṃ jāiṃ jattha kappammi |
kappavaīṇa vi suṃdari! ṭhiīvisese nisāmehi ||

5.175

do sāgarovamāiṃ sakkassa ṭhiī mahāṇubhāgassa 1 |
sāhīyā īsāṇe 2 satteva saṇaṃkumārammi 3 ||

5.176

māhiṃde sāhiyāiṃ satta ya 4 dasa ceva baṃbhalogammi 5 |
coddasa laṃtayakappe 6 sattarasa bhave mahāsukke 7 ||

5.177

kappammi sahassāre aṭṭhārasa sāgarovamāiṃ ṭhii 8 |
āṇaya eguṇavīsā 9 vīsā puṇa pāṇae kappe 10 ||

5.178

puṇṇā ya ekkavīsā udahisanāmāṇa āraṇe kappe 11 |
aha accuyammi kappe bāvīsaṃ sāgarāṇa ṭhiī 12 ||

5.179

esā kappavaīṇaṃ kappaṭhiī vaṇṇiyā samāseṇaṃ |
gevejja'nuttarāṇaṃ suṇa anubhāgaṃ vimānāṇaṃ ||

5.180

tinneva ya gevejjā hiṭṭhillā 1 majjhimā 2 ya uvarillā 3 |
ekkekkaṃ pi ya tivihaṃ, evaṃ nava hoṃti gevejjā ||

5.181

sudaṃsaṇā 1 amohā 2 ya suppabuddhā 3 jasodharā 4 |
vacchā 5 suvacchā 6 sumaṇā 7 somanasā 8 piyadaṃsaṇā 9 ||

5.182

ekkārasuttaraṃ heṭṭhimae, sattuttaraṃ ca majjhimae |
sayamegaṃ uvarimae, paṃceva anuttaravimānā ||

5.183

heṭṭhimagevejjāṇaṃ tevīsaṃ sāgarovamāiṃ ṭhiī |
ekkekkamāruhijjā aṭṭhahiṃ sesehiṃ namiyaṃgi! ||

5.184

vijayaṃ 1 ca vejayaṃtaṃ 2 jayaṃta 3 maparājiyaṃ 4 ca boddhavvaṃ |
savvaṭṭhasiddhanāmaṃ 5 hoi cauṇhaṃ tu majjhimayaṃ ||

5.185

puvveṇa hoi vijayaṃ, dāhiṇao hoi vejayaṃtaṃ tu |
avareṇaṃ tu jayaṃtaṃ, avarāiyamuttare pāse ||

5.186

eesu vimānesu u tettīsaṃ sāgarovamāiṃ ṭhiī |
savvaṭṭhasiddhanāme ajahannukkosa tettīsā ||

5.187

heṭṭhillā uvarillā do do juvala'ddhacaṃdasaṃṭhāṇā |
paḍipuṇṇacaṃdasaṃṭhāṇasaṃṭhiyā majjhimā cauro ||

5.188

gevejjāvalisarisā gevejjā tinni tinni āsannā |
hulluyasaṃṭhāṇāiṃ anuttarāiṃ vimānāiṃ ||

5.189

ghanaudahipaiṭṭhāṇā surabhavanā dosu hoṃti kappesuṃ |
tisu vāupaiṭṭhāṇā, tadubhayasupaiṭṭhiyā tinni ||

5.190

teṇa paraṃ uvarimayā āgāsaṃtarapaiṭṭhiyā savve |
esa paiṭṭhāṇavihī uḍḍhaṃ loe vimānāṇaṃ ||

5.191

kiṇhā-nīlā-kāū-teūlesā ya bhavana-vaṃtariyā |
joisa-sohammīsāne teulesā muṇeyavvā ||

5.192

kappe saṇaṃkumāre māhiṃde ceva baṃbhaloge ya |
eesu pamhalesā, teṇa paraṃ sukkalesā u ||

5.193

kanagattayarattābhā suravasabhā dosu hoṃti kappesu |
tisu hoṃti pamhagorā, teṇa paraṃ sukkilā devā ||

5.194

bhavanavai-vāṇamaṃtara-joisiyā hoṃti sattarayaṇīyā |
kappavaīṇa ya suṃdari! suṇa uccattaṃ suravarāṇaṃ ||

5.195

sohamme īsāne ya suravarā hoṃti sattarayaṇīyā |
do do kappā tullā dosu vi parihāyae rayaṇī ||

5.196

gevejjesu ya devā rayaṇīo donni hoṃti uccā u |
rayaṇī puṇa uccattaṃ anuttaravimānavāsīṇaṃ ||

5.197

kappāo kappammi u jassa ṭhiī sāgarovama'bbhahiyā |
usseho tassa bhave ikkārasabhāgaparihīno ||

5.198

jo ya vimānusseho puḍhavīṇa ya jaṃ ca hoi bāhallaṃ |
doṇhaṃ pi taṃ pamāṇaṃ battīsaṃ joyaṇasayāiṃ ||

5.199

bhavanavai-vāṇamaṃtara-joisiyā huṃti kāyapaviyārā |
kappavaīṇa vi suṃdari! vocchaṃ paviyāraṇavihī u ||

5.200

sohammīsānesuṃ ca suravarā hoṃti kāyapaviyārā |
saṇaṃkumāra-māhiṃdesu phāsapaviyārayā devā ||

5.201

baṃbhe laṃtayakappe ya suravarā hoṃti rūvapaviyārā |
mahasukka-sahassāresu saddapaviyārayā devā ||

5.202

āṇaya-pāṇayakappe āraṇa taha accuesu kappammi |
devā manapaviyārā parao paviyāraṇā natthi ||

5.203

gosīsā'guru-keyayapattā-punnāga-baulagaṃdhā ya |
caṃpaya-kuvalayagaṃdhā tagarelasugaṃdhagaṃdhā ya ||

5.204

esā ṇaṃ gaṃdhavihī uvamāe vaṇṇiyā samāseṇaṃ |
dīṭṭhīe vi ya tivihā thira sukumārā ya phāseṇaṃ ||

5.205

tevīsaṃ ca vimānā caurāsīiṃ ca sayasahassāiṃ |
sattāṇaui sahassā uḍḍhaṃloe vimānāṇaṃ 8497023 ||

5.206

auṇāṇaui sahassā caurāsīiṃ ca sayasahassāiṃ |
egūṇayaṃ divaḍḍhaṃ sayaṃ ca pupphāvakiṇṇāṇaṃ 8489149 ||

5.207

satteva sahassāiṃ sayāiṃ covattarāiṃ aṭṭha bhave 7874 |
āvaliyāi vimānā, sesā pupphāvakiṇṇā ṇaṃ ||

5.208

āvaliyavimānāṇaṃ tu aṃtaraṃ niyamaso asaṃkhejjaṃ |
saṃkhejjamasaṃkhejjaṃ bhaṇiyaṃ pupphāvakinnāṇaṃ ||

5.209

āvaliyāi vimānā vaṭṭā taṃsā taheva cauraṃsā |
pupphāvakiṇṇayā puṇa anegaviharūva-saṃṭhāṇā ||

5.210

vaṭṭaṃ tha valayagaṃ piva, taṃsā siṃghāḍayaṃ piva vimānā |
cauraṃsavimānā puṇa akkhāḍayasaṃṭhiyā bhaṇiyā ||

5.211

paḍhamaṃ vaṭṭavimāṇaṃ, bīyaṃ taṃsaṃ, taheva cauraṃsaṃ |
egaṃtaracauraṃsaṃ, puṇo vi vaṭṭaṃ, puṇo taṃsaṃ ||

5.212

vaṭṭaṃ vaṭṭassuvariṃ, taṃsaṃ taṃsassa uppariṃ hoi |
cauraṃse cauraṃsaṃ, uḍḍhaṃ tu vimānaseḍhīo ||

5.213

olaṃbayarajjūo savvavimānāṇa hoṃti samiyāo |
uvarima-carimaṃtāo heṭṭhillo jāva carimaṃto ||

5.214

pāgāraparikkhittā vaṭṭavimānā havaṃti savve vi |
cauraṃsavimānāṇaṃ cauddisiṃ veiyā bhaṇiyā ||

5.215

jatto vaṭṭavimāṇaṃ tatto taṃsassa veiyā hoi |
pāgāro bodhavvo avasesāṇaṃ tu pāsāṇaṃ ||

5.216

je puṇa vaṭṭavimānā egaduvārā havaṃti savve vi |
tinni ya taṃsavimāṇe, cattāri ya hoṃti cauraṃse ||

5.217

satteva ya koḍīo havaṃti bāvattariṃ sayasahassā |
eso bhavanasamāso bhomejjāṇaṃ suravarāṇaṃ ||

5.218

tiriovavāiyāṇaṃ rammā bhomanagarā asaṃkhejjā |
tatto saṃkhejjaguṇā joisiyāṇaṃ vimānā u ||

5.219

thovā vimānavāsī, bhomejjā vāṇamaṃtaramasaṃkhā |
tatto saṃkhejjaguṇā joisavāsī bhave devā ||

5.220

patteyavimānāṇaṃ devīṇaṃ chabbhave sayasahassā |
sohamma kappammi u, īsāne hoṃti cattāri ||

5.221

paṃceva'ṇuttarāiṃ aṇuttaragaīhiṃ jāiṃ diṭṭhāiṃ |
jattha anuttaradevā bhogasuhaṃ anuvamaṃ pattā ||

5.222

jattha aṇuttaragaṃdhā taheva rūvā anuttarā saddā |
accittapoggalāṇaṃ raso ya phāso ya gaṃdho ya ||

5.223

papphoḍiyakalikalusā papphoḍiyakamalareṇusaṃkāsā |
varakusumamahukarā iva suhamayaraṃdaṃ nighoṭṭaṃti ||

5.224

varapaumagabbhagorā savvete egagabbhavasahīo |
gabbhavasahīvimukkā suṃdari! sukkhaṃ anuhavaṃti ||

5.225

tettīsāe suṃdari! vāsasahassehiṃ hoi puṇṇehiṃ |
āhāro devāṇaṃ anuttaravimānavāsīṇaṃ ||

5.226

solasahi sahassehiṃ paṃcehiṃ saehiṃ hoi puṇṇehiṃ |
āhāro devāṇaṃ majjhimamāuṃ dhareṃtāṇaṃ ||

5.227

dasa vāsasahassāiṃ jahannamāuṃ dharaṃti je devā |
tesiṃ pi ya āhāro cautthabhatteṇa bodhavvo ||

5.228

saṃvaccharassa suṃdari! māsāṇaṃ addhapaṃcamāṇaṃ ca |
ussāso devāṇaṃ anuttaravimānavāsīṇaṃ ||

5.229

addhaṭṭhamehiṃ rāiṃdiehiṃ aṭṭhahi ya sutanuṃ! māsehiṃ |
ussāso devāṇaṃ majjhimamāuṃ dhareṃtāṇaṃ ||

5.230

sattaṇhaṃ thovāṇaṃ puṇṇāṇaṃ puṇṇayaṃdasarisamuhe! |
ūsāso devāṇaṃ jahannamāuṃ dhareṃtāṇaṃ ||

5.231

jaisāgarovamāiṃ jassa ṭhiī tattiehiṃ pakkhehiṃ |
ūsāso devāṇaṃ, vāsasahassehiṃ āhāro ||

5.232

āhāro ūsāso eso me vannio samāseṇaṃ |
suhumaṃtarā ya nāhisi suṃdari! acireṇa kāleṇa ||

5.233

eesiṃ devāṇaṃ visao ohissa hoi jo jassa |
taṃ suṃdari! vaṇṇe haṃ ahakkamaṃ ānupuvvīe ||

5.234

sakkīsānā paḍhamaṃ doccaṃ ca saṇaṃkumāra-māhiṃdā |
taccaṃ ca baṃbha-laṃtaga sukka-sahassāraya cautthiṃ ||

5.235

āṇaya-pāṇayakappe devā pāsaṃti paṃcamiṃ puḍhaviṃ |
taṃ ceva āraṇa-'ccuya ohinnāṇeṇa pāsaṃti ||

5.236

chaṭṭhiṃ hiṭṭhima-majjhimagevejjā sattamiṃ ca uvarillā |
saṃbhinnaloganāliṃ pāsaṃti anuttarā devā ||

5.237

saṃkhejjajoyaṇā khalu devāṇaṃ addhasāgare ūṇe |
teṇa paramasaṃkhejjā jahannayaṃ pannavīsaṃ tu ||

5.238

teṇa paramasaṃkhejjā tiriyaṃ dīvā ya sāgarā ceva |
bahuyayaraṃ uvarimayā, uḍḍhaṃ tu sakappathūbhāī ||

5.239

neraiya-deva-titthaṃkarā ya ohissa'bāhirā hoṃti |
pāsaṃti savvao khalu, sesā deseṇa pāsaṃti ||

5.240

ohinnāṇe visao eso me vaṇṇio samāseṇaṃ |
bāhallaṃ uccattaṃ vimānavannaṃ puṇo vocchaṃ ||

5.241

sattāvīsaṃ joyaṇasayāiṃ puḍhavīṇaṃ hoi bāhallaṃ |
sohammīsānesuṃ rayaṇavicittā ya sā puḍhavī ||

5.242

tattha vimāna bahuvihā pāsāyā ya maṇiveiyārammā |
veruliyathūbhiyāgā rayaṇāmayadāma'laṃkārā ||

5.243

keittha'siyavimānā aṃjanadhāūsamā sabhāveṇaṃ |
addayariṭṭhayavaṇṇā jatthā''vāsā suragaṇāṇaṃ ||

5.244

kei ya hariyavimānā meyagadhāusarisā sabhāveṇaṃ |
moraggīvasavaṇṇā jatthā''vāsā suragaṇāṇaṃ ||

5.245

dīvasihasarisavaṇṇittha kei jāsumaṇa-sūrasarivannā |
hiṃguluyadhāuvaṇṇā jatthā''vāsā suragaṇāṇaṃ ||

5.246

koriṃṭadhāuvaṇṇa'ttha kei phullakaṇiyārasarivaṇṇā |
hāliddabheyavaṇṇā jatthā''vāsā suragaṇāṇaṃ ||

5.247

aviuttamalladāmā nimmalagattā sugaṃdhanīsāsā |
savve avaṭṭhiyavayā sayaṃpabhā animisa'cchā ya ||

5.248

bāvattariṃkalāpaṃḍiyā u devā havaṃti savve vi |
bhavasaṃkamaṇe tesiṃ paḍivāo hoi nāyavvo ||

5.249

kallāṇaphalavivāgā sacchaṃdaviuvviyābharaṇadhārī |
ābharaṇa-vasanarahiyā havaṃti sābhāviyasarīrā ||

5.250

vattulasarisavarūvā devā ekkammi ṭhiivisesammi |
paccaggahīṇamahiyā ogāhaṇa-vaṇṇapariṇāmā ||

5.251

kiṇhā nīlā lohiya hāliddā sukkilā virāyaṃti |
paṃcasae uvviddhā pāsāyā tesu kappesu ||

5.252

tatthā''sanā bahuvihā, sayaṇijjā ya maṇibhatisayacittā |
viraiyavitthaḍadūsā rayaṇāmayadāma'laṃkārā ||

5.253

chavvīsa joyaṇasayā puḍhavīṇaṃ tāṇa hoi bāhallaṃ |
saṇaṃkumāra-māhiṃde rayaṇavicittā ya sā puḍhavī ||

5.254

tattha ya nīlā lohiya hāliddā sukkilā virāyaṃti |
cha cca sae uvviddhā pāsāyā tesu kappesu ||

5.255

tatthā''sanā bahuvihā, sayaṇijjā ya maṇibhattisayacittā |
viraiyavitthaḍadūsā, rayaṇāmayadāma'laṃkārā ||

5.256

pannāvīsaṃ joyaṇasayāiṃ puḍhavīṇa hoi bāhallaṃ |
baṃbhaya-laṃtayakappe rayaṇavicittā ya sā puḍhavī ||

5.257

tattha vimāna bahuvihā pāsāyā ya maṇiveiyārammā |
veruliyathūbhiyāgā rayaṇāmayadāma'laṃkārā ||

5.258

lohiya hāliddā puṇa sukkilavaṇṇā ya te virāyaṃti |
sattasae uvviddhā pāsāyā tesu kappesu ||

5.259

cauvīsa joyaṇasayāiṃ puḍhavīṇaṃ tāsi hoi bāhallaṃ |
sukke ya sahassāre rayaṇavicittā ya sā puḍhavī ||

5.260

tattha vimāna bahuvihā pāsāyā ya maṇiveiyārammā |
veruliyathūbhiyāgā, rayaṇāmayadāma'laṃkārā ||

5.261

hāliddabheyavaṇṇā sukkilavaṇṇā ya te virāyaṃti |
aṭṭhasate uvviddhā pāsāyā tesu kappesu ||

5.262

tatthā''sanā bahuvihā, sayaṇijjā ya maṇibhattisayacittā |
viraiyavitthaḍadūsā, rayaṇāmayadāma'laṃkārā ||

5.263

tevīsa joyaṇasayāiṃ puḍhavīṇaṃ tāsi hoi bāhallaṃ |
āṇaya-pāṇayakappe āraṇa-'ccue rayaṇavicittā u sā puḍhavī ||

5.264

tattha vimāna bahuvihā pāsāyā ya maṇiveiyārammā |
veruliyathūbhiyāgā, rayaṇāmayadāma'laṃkārā ||

5.265

saṃkhaṃkasannikāsā savve dagaraya-tusārasarivaṇṇā |
nava ya sate uvviddhā pāsāyā tesu kappesu ||

5.266

bāvīsa joyaṇasayāiṃ puḍhavīṇaṃ tāsi hoi bāhallaṃ |
gevejjavimāṇesuṃ, rayaṇavicittā u sā puḍhavī ||

5.267

tattha vimāna bahuvihā, pāsāyā ya maṇiveiyārammā |
veruliyathūbhiyāgā, rayaṇāmayadāma'laṃkārā ||

5.268

saṃkhaṃkasannikāsā savve dagaraya-tusārasarivaṇṇā |
dasa ya sae uvviddhā pāsāyā te virāyaṃti ||

5.269

igavīsa joyaṇasayāiṃ puḍhavīṇaṃ tāsi hoi bāhallaṃ |
paṃcasu anuttaresuṃ, rayaṇavicittā u sā puḍhavī ||

5.270

tattha vimāna bahuvihā, pāsāyā ya maṇiveiyārammā |
veruliyathūbhiyāgā, rayaṇāmayadāma'laṃkārā ||

5.271

saṃkhaṃkasannikāsā, savve dagaraya-tusārasarivaṇṇā |
ikkārasauvviddhā, pāsāyā te virāyaṃti ||

5.272

tatthā''sanā bahuvihā, sayaṇijjā ya maṇibhattisayacittā |
viraiyavitthaḍadūsā, rayaṇāmayadāma'laṃkārā ||

5.273

savvaṭṭhavimānassa u savvuvarillāo thūbhiyaṃtāo |
bārasahi joyaṇehiṃ isipabbhārā tao puḍhavī ||

Translations (2)

Commentaries (2)