Pramāṇa · Search · About · API

Devimdatthaa 6: Isiprabhāpṛthvi evaṃ siddhādhikāra

Deviṃdatthaa 6

Language
Māhārāṣṭrī Prakrit

Isiprabhāpṛthvi evaṃ siddhādhikāra

6.274

nimmaladagarayavaṇṇā tusāra-gokhīra-hārasarivaṇṇā |
bhaṇiyā u jinavarehiṃ uttānayachattasaṃṭhāṇā ||

6.275

paṇayālīsaṃ āyāma-vitthaḍā hoi sayasahassāiṃ |
taṃ tiguṇaṃ savisesaṃ parīrao hoi bodhavvo ||

6.276

egā joyaṇakoḍī bāyālīsaṃ ca sayasahassāiṃ |
tīsaṃ ceva sahassā do ya sayā auṇapannāsā 14230249 ||

6.277

khetaddhayavicchinnā aṭṭheva ya joyaṇāṇi bāhallaṃ |
parihāyamāṇī carimaṃte macchiyapattāo tanuyayarī ||

6.278

saṃkhaṃkasannikāsā nāmeṇa sudaṃsaṇā amohā ya |
ajjunasuvaṇṇayamaī uttāṇayachattasaṃṭhāṇā ||

6.279

īsīpabbhārāe uvariṃ khalu joyaṇammi logaṃto |
tassuvarimammi bhāe solasame siddhamogāḍhe ||

6.280

tatthete niccayaṇā aveyaṇā nimmamā asaṃgā ya |
asarīrā jīvaghanā paesanivvattasaṃṭhāṇā ||

6.281

kahiṃ paḍihayā siddhā? kahiṃ siddhā paiṭṭhiyā? |
kahiṃ boṃdiṃ caittāṇaṃ kattha gaṃtūṇa sijjhaī? ||

6.282

aloe paḍihayā siddhā, loya'gge ya paiṭṭhiyā |
ihaṃ boṃdiṃ caittāṇaṃ tattha gaṃtūṇa sijjhaī ||

6.283

jaṃ saṃṭhāṇaṃ tu ihaṃ bhavaṃ cayaṃtassa carimasamayammi |
āsī ya paesaghaṇaṃ taṃ saṃṭhāṇaṃ tahiṃ tassa ||

6.284

dīhaṃ vā hussaṃ vā jaṃ saṃṭhāṇaṃ havejja carimabhave |
tatto tibhāgahīṇā siddhāṇogāhaṇā bhaṇiyā ||

6.285

tinni sayā tettīsā dhanuttibhāgo ya hoi bodhavvo |
esā khalu siddhāṇaṃ ukkosogāhaṇā bhaṇiyā ||

6.286

cattāri ya rayaṇīo rayaṇitibhāgūṇiyā ya bodhavvā |
esā khalu siddhāṇaṃ majjhimaogāhaṇā bhaṇiyā ||

6.287

ekkā ya hoi rayaṇī aṭṭheva ya aṃgulāiṃ sāhīyā |
esā khalu siddhāṇaṃ jahanna ogāhaṇā bhaṇiyā ||

6.288

ogāhaṇāi siddhā bhavattibhāgeṇa huṃti parihīnā |
saṃṭhāṇamaṇitthaṃtthaṃ jarā-maraṇavippamukkāṇaṃ ||

6.289

jattha ya ego siddho tattha anaṃtā bhavakkhayavimukkā |
annonnasamogāḍhā puṭṭhā savve alogaṃte ||

6.290

asarīrā jīvaghaṇā uvauttā daṃsaṇe ya nāṇe ya |
sāgāramaṇāgāraṃ lakkhaṇameyaṃ tu siddhāṇaṃ ||

6.291

phusai anaṃte siddhe savvapaesehiṃ niyamaso siddho |
te vi asaṃkhejjaguṇā desa-paesehiṃ je puṭṭhā ||

6.292

kevalanāṇuvauttā jāṇaṃtī savvabhāvaguṇa-bhāve |
pāsaṃti savvao khalu kevaladiṭṭhīha'naṃtāhiṃ ||

6.293

nāṇammi daṃsaṇammi ya itto egayarayammi uvauttā |
savvassa kevalissā jugavaṃ do natthi uvaogā ||

6.294

suragaṇasuhaṃ samattaṃ savvaddhāpiṃḍiyaṃ anaṃtaguṇaṃ |
na vi pāvai muttisuhaṃ naṃtāhiṃ vaggavaggūhiṃ ||

6.295

na vi atthi mānusāṇaṃ taṃ sokkhaṃ na vi ya savvadevāṇaṃ |
jaṃ siddhāṇaṃ sokkhaṃ avvābāhaṃ uvagayāṇaṃ ||

6.296

siddhassa suho rāsī savvaddhāpiṃḍio jai havijjā |
naṃtaguṇavaggubhaio savvāgāse na māejjā ||

6.297

jaha nāma koi miccho nayaraguṇe bahuvihe viyāṇaṃto |
na caei parikaheuṃ uvamāe tahiṃ asaṃtīe ||

6.298

ia siddhāṇaṃ sokkhaṃ aṇovamaṃ, natthi tassa ovammaṃ |
kiṃci viseseṇitto sārikkhamiṇaṃ suṇaha vocchaṃ ||

6.299

jaha savvakāmaguṇiyaṃ puriso bhottūṇa bhoyaṇaṃ koī |
taṇhā-chuhāvimukko acchijja jahā amiyatitto ||

6.300

iya savvakālatittā aulaṃ nivvāṇamuvagayā siddhā |
sāsayamavvābāhaṃ ciṭṭhaṃti suhī suhaṃ pattā ||

6.301

siddha tti ya buddha tti ya pāragatta tti ya paraṃparagaya tti |
ummukkakammakavayā ajarā amarā asaṃgā ya ||

6.302

nicchinnasavvadukkhā jāi-jarā-maraṇa-baṃdhanavimukkā |
sāsayamavvābāhaṃ anuhuṃti suhaṃ sayākālaṃ ||

6.303

suragaṇaiḍḍhi samaggā savvaddhāpiṃḍiyā anaṃtaguṇā |
na vi pāve jinaiḍḍhiṃ naṃtehiṃ vi vaggavaggūhiṃ ||

6.304

bhavanavai vāṇamaṃtara joisavāsī vimānavāsī ya |
savviḍḍhīpariyāro arahaṃte vaṃdayā hoṃti ||

6.305

bhavanavai vāṇamaṃtara joisavāsī vimānavāsī ya |
isivāliyamaimahiyā kareṃti mahimaṃ jinavarāṇaṃ ||

6.306

isivāliyassa bhaddaṃ suravarathayakārayassa dhīrassa |
jehiṃ sayā thuvvaṃtā savve iṃdā ya pavarakittīyā ||

6.307

isivāliyassa bhaddaṃ suravarathayakārayassa vīrassa |
tesiṃ surā'suragurū siddhā siddhiṃ uvavihiṃtu ||

6.308

bhomejja-vanayarāṇaṃ joisiyāṇaṃ vimānavāsīṇaṃ |
devanikāyāṇa thao iha sammatto apariseso ||

Translations (2)

Commentaries (2)