Lilavatisara p181

p181

[132-145 atha dāsī bhojayitvā tāṃ jagāma yathāgatam | sulakṣaṇā punaḥ sāyaṃ palyakaṃ praguṇaṃ vyadhāt ||132 dīpaṃ prabodhya valabhīgṛhadvāraṃ pidhāya ca | gavākṣamudghāṭya tasthau kumārāgamakākṣiṇī ||133 yāme'tiyāte yāminyā vijane pathi so'sibhṛt | vidyadutkṣiptakaraṇāt taṃ gavākṣamagāt sukhāt ||134 dadarśa tāṃ tu paryakasyeṣāmāliṅgaya tasthuṣīm | śanairgatvā karābjābhyāṃ pidadhe taddṛśāvasau ||135 romāñcapuṣpitāṃ dṛṣṭvā tāṃ kadambalatāmiva | kumāraḥ smāha subhage'panidraḥ svāpa eṣa te ||136 raṅgāt tatastau remāte jajñe yāmadvayaṃ niśaḥ | kumāro'thāvadadyāmi mā sma śīyāvahi kvacit ||137 tataḥ sulakṣaṇā cakhyau dhik te puruṣa pauruṣam | bibheti sāhasaṃ kṛtvā yaḥ pāmarajanādapi ||138 janajñāte tu yat kārya tat kuryāḥ kṣatriyo'si yat | kārya ca niṣkāśyamānāṃ māṃ saṃrakṣeriti priya ||139 kumāro'vak kiyadetat sā''khyat tattiṣṭha nirbhayaḥ | tato rantvā turyayāme kumāro'gāt svamandiram ||140 vārdhānīdantapavanatāmbūlādikarā prage| sā dāsyāgād vadhūpārśve'nyathā tāṃ vīkṣya cāvalat ||141 dhanasyātha vadhūvṛttaṃ sā catuḥkarṇamabhyadhāt | tāta samyag na jāne'smi yathādṛṣṭaśrutaṃ bruve ||142 sulakṣaṇāyā . adyāṅgaṃ nakhadantavraṇolbaṇam || nidrālasaṃ parimlānakusumastabakopamam ||143 kalye punaḥ padmarathakumāraṃ prati satvaram | ākāśoktyā pralāpāśca bhṛśaṃ śuśruvire mayā ||144 na kathyametat kasyāpi śapathena nivārya tām | dhanaḥ sāgaradattasyaikānte tat sarvamabhyadhāt ||145