Samaraiccakaha 2.4
Samarāiccakahā 2.4
- Language
- Māhārāṣṭrī Prakrit
2.4.1
tō jahāsa hēṇa dhammanirayāē parokkhārasaṁpāyaṇēṇaṁ suladdhajammāē aïkantā nava māsā addhahamarāindiyā.tō pasatthē tihikaraṇa-muhutta-jōē sukumālapāṇi-pāyaṁ sayalajaṇamaṇōrahēhiṁ dēvī sirikantā dārayaṁ pasaya tti.nivēiō ranō suhakariyābhihāṇāē dāsiyāē puttajammō.parituṭṭhō rāyā, dinnaṁ ca tīē pāriōsiyaṁ.kārāviyaṁ ca bandhaṇamōyaṇāiyaṁ karaṇijja, pavattō ya nayarē mahāṇandō, sōhāviyā nayarimaggā, pasamāviō rayō kuṅkumajalēṇaṁ, vippaïṇṇāī ruṇṭantamahuyarasaṇāhāī vicittakusumāī, kayāō haṭṭabhavaṇasōhāō, pahabhavaṇēsu samāhayāī maṅgalatūrāī saharisaṁ ca nacciyaṁ rāyajaṇanāgarēhi ti.ēvaṁ ca païdiṇaṁ mahāmahantamāṇandasokkhamaṇuhavantāṇaṁ aïkantō paḍhamamāsō.païṭāviyaṁ ca sē nāmaṁ bālassa suviṇayadasaṇanimittēṇaṁ sīhō tti.sō ya visihaṁ puṇṇaphalamaṇuhavantō abhagga (ja)māṇapasaraṁ paṇaīṇaṁ maṇōrahēhiṁ payāṇa puṇṇēṇanāma.api ca jovvaṇamaṇubamasōhaṁ kalākalādaparivaḍiyacchāyaṁ.jaṇamaṇanayaṇāṇandaṁ candō vva kamēṇa saṁpattō.
2.4.2
annayā ya saṁpattajovvaṇassa kusumacāvassa vi hiyayāṇukūlō taruṇajaṇahiyayāṇandayārī āgō vasantasamaō.jattha savisēsaṁ kusumamayakōdaṇḍamaṇḍalīsaṁdhiyasilīmuhō raī daṁsiūṇa jagahiyayāī vidhi payattō mayaṇō.agantaraṁ ca tassa cēva jayajayasadō vya kōilāhiṁ kō kōlāhalō, virahaggiḍajhantapahiyasaṁghāyadhūmapaḍalaṁ va viyambhiyaṁ sahayārēsu bhamarajālaṁ, gayāiyāmasāṇajalaṇēhi viva palittaṁ disāmaṇḍalaṁ kiṁsuyakusumēhiṁ ti.taō ēvaṁvihē vasantasamaē sō sīhakumārō aṇēyataruṇa jaṇa vēdiō mahāvibhūīē kēlinimittaṁ gaō pamuiyaparahuyāsahajaśiyatarūṇījaṇacittavinbhamullōlaṁ surahimalayapavaṇapaṇacāviyakusumabharabhajjamāṇalayāviḍa vijālaṁ mayamuiyamuhalamahuyarakulōvagīyamāgaggasōhaṁ bāsaharaṁ piva vasantalacchīē kīlāsudaraṁ nāma ujjāṇa, pavattō ya kīliuṁ vicittakīlāhiṁ ti.divā ya tēṇa tattha ujjāṇē nāidūradēsasaṁṭhiyā kusumaparimalamuyandhavēṇimahuyarāvalī vidyamalayāyambahatthapallavā uvvellantakōmalataṇubāhulayā rambhākhambhamagaharōrujuyalā lakamalārattakōmalacalaṇajuyalā ujāṇadēvaya va uulacchipariyariyā niyamāulagassa cēva mahāsāmantassa lacchikantābhihāṇasya dhr̥yā sahiyaṇasahiyā vasantakīlamaṇuhavantī kusumāvalī nāma kannagā.taōtaṁ daṭṭaṇamaṇantabhavanmattharāgadōsēṇa sāhilāsaṁ pulōiyā.diṭṭhō ya ēsō vi tīra taō vibhāgāō tassa bhamēṇa cēva turiyaturiyamōsarantī ē kusumāvalīē.cintiyamimī ē-kahaṁ kīlāsundarujāṇa hasa ramayāē bhayavaṁ mayaraddhaō vi etthēva kīlāsuhamaṇuhavaï ti.etthantarammi bhaṇiyā piyaṁkarābhihāṇāē cēḍīē.sāmiṇi!
2.4.3
alaṁ alamōlakōṇa, ēsō khu rāiṇō purisadattassa puttō tuha cēva piucchāgambhasaṁbhavō sīhō nāma kumārī tti.paḍhabhāgamaṇakayapariggaraṁ ca sāmiṇiṁ ēvamōsakamāgi pecchiya mā adakkhiṇṇaṁ ti saṁbhāvissaï.tā ciṭṭhiyaü ihaṁ, kīraü imassa mahāṇubhāvassa rāyakanōciō uvayārō taō harisavasapulaïyaṅgīē savinbhamaṁ sāhilāsaṁ ca avalōiūṇa kumāraṁ bhaṇiyaṁ imīē. halā! piyaṁkariē! tuma cēva'ttha kusalā, tā nivēēhi, ki maē ēyassa kāyabvaṁ ti.tīē bhaṇiyaṁ — sāmiṇi! paḍhamāgayāō amhē, tā alaṁkarāvīyaü āsaṇapariggahēṇaṁ imaṁ paēsaṁ ēsō, kīraü sē sajjaṇajaṇāṇa sambandhapāyavavīyabhūyaṁ sāgayaṁ, dijjaü sē sahatthēṇa kālōciyaṁ vasantakusumābharaṇasaṇāhaṁ tambōla ti.kusumāvalīē bhaṇiya-halā! na sakkuṇōmi aïsajjhasēṇa imaṁ ēyassa kāuṁ; tā tumaṁ cēva ettha kālōciyaṁ karēhi tti.etthantarammi ya pattō tamuddēsaṁ kumārō.taō sajjiūṇāsaṇaṁ bhaṇiō piyaṁkarīē — sāgathaṁ raïvirahiyassa kusumacāvassa, iha uvavisa u mahāṇubhāvō.taō sō sapariōsaṁ īsi vihasiūṇa āsi ya ahaṁ ettiyaṁ kālaṁ raïdirahiō, na uṇa saṁparya ti bhaṇiūṇamuvaviṭhṭhō.uvaṇīyaṁ ca piyaṁkariyāē māhavī kusumamālāsaṇāhaṁ kaladhōyamayataliyāē tambōlaṁ, gahiyaṁ ca tēṇa.etthantarammi ya āgaō kusumāvalījaṇaṇīē āhavaṇanimittaṁ pēsiō saṁbharāyaṇō nāma kannantēuramahalalagō.diṭṭhā ya tēṇa sāṇurāyaṁ apecchantamaddhacchipecchiēhiṁ kumāramavalōentī kusumāvalī.cintiyaṁ ca ṇēṇa.samāgaō mayaṇō raīē, jaï vihī aṇuvattissaï.taō pañcāsanamāgantūṇa kumāramahiṇandiya bhaṇiyaṁ saṁbharāyaṇēṇaṁ.vacchē! kusumāvali!
2.4.4
dēvī muttāvalī āṇavēi aïciraṁ kīliyaṁ, mā sarīrakhēdō tē bhavissaï, tā lahuṁ āgantavva ti.taō sā jaṁ ammā āṇavēi tti bhaṇiūṇa sasaṁbhamaṁ kumāramavalōentī niggayā ujjāṇāō, pattā ya kumāraṁ cēva cintayantī niyayagēhaṁ.taō dēviṁ paṇamiūṇamārūḍhā dantavalahiyaṁ. taō kumāraṁ cēva aṇusarantī vimukkadīhanīsāsā samuvaviṭhṭhā pallaṅkasayaṇijjē; visajjiō ya tīē saṁmāṇiuṁ sahīsatthō. aha sēviuṁ payattā sejja aṇavarayamukkanīsāsā.mayaṇasarasalliyamaṇā niyakajjaniyattavāvārā.