Yashastilaka 4.288

4.288

jagatprasiddhā kāntā manoharā lakṣmīḥ śobhā yasya sa tathā | punaḥ kathaṃbhūtaḥ | śamitavalipadmaḥ śamitā naṣṭā valayastvaksaṃkocāstvaktaraṅgāḥ pādeṣu caraṇeṣu yasya balinaśca yena sa tathā | jātyalaṃkāraḥ || yo'cchidra ityādi | sa nṛpaḥ sa rājā sāndraparvā bahumahotsavaḥ syāt bhavet | sa kaḥ | yo nṛpaḥ tvayi viṣaye acchidramananveṣaṇaḥ | sa nṛpaḥ kathaṃbhūtaḥ | vītabhīḥ sūryenirbhayaḥ yuṣmatto bhayaṃ na karoti | paścāt te tava prasādāt avanato namrībhūtaḥ kiṃcinmanāk | punarivārye pādapūraṇārthe | punaḥ kathaṃbhūtaḥ | purataḥ agrataḥ samucchritaśirāḥ unnata mastakaḥ | punaḥ kathaṃbhūtaḥ | kāryeṣu bhārakṣamaḥ tava kāryavelāyāṃ kāryakārakaḥ | punaḥ kathaṃbhūtaḥ | atyalpaśrameṇaiva alpakaṣṭenaiva rājyabhoktā | punaḥ kathaṃbhūtaḥ | maṇḍalayutaḥ rāṣṭrasaṃyuktaḥ | punaḥ kathaṃbhūtaḥ | gambhīravedī tava gāmbhīryajñāpakaḥ | punaḥ kathaṃbhūtaḥ | pṛthuvistīrṇarājyaḥ | punaḥ kathaṃbhūtaḥ | balīritavapuḥ valavadbhiḥ preritaśarīraḥ | punaḥ kathaṃbhūtaḥ | mandebhānukṛtiḥ mandajātīyahastisadṛśaḥ | kathaṃbhūto mandajātīyo gajaḥ | acchidro nibiḍavandhaḥ | punaḥ kathaṃbhūtaḥ | tvayi viṣaye vītabhīḥ śatru bhayarahitaḥ | punaḥ kathaṃbhūtaḥ | paścāt avaragātre avanataḥ namrībhūtaḥ | te prasādāt prasannatayā | punaḥ kathaṃbhūtaḥ | punarapi kiṃcinmanāk purato'grataḥ samucchritaśirāḥ unnatamastakaḥ | punaḥ kathaṃbhūtaḥ | kāryeṣu saṃgrāmādivelāyāṃ bhārakṣamaḥ bhārodvahanasamarthaḥ | punaḥ kathaṃbhūtaḥ | atyalpaśrama eva bhāraṃ vahamāno'pi atyalpaśramaḥ | punaḥ kathaṃbhūtaḥ | maṇḍalayutaḥ hastisamūhānvitaḥ | punaḥ kathaṃbhūtaḥ | gambhīravedī tvagbhedādvāśoṇitasravaṇādvāgātra mathanādapi yaḥ saṃjñāṃ na labhate sa gambhīravedī kathyate | punaḥ kathaṃbhūtaḥ | pṛthuvistīrṇapṛṣṭhadeśaḥ | punaḥ kathaṃbhūtaḥ | balīritavapuḥ balibhiḥ tvaktaraṅgaiḥ īritaṃ anugataṃ vapuḥ śarīraṃ yasya sa tathā | punaḥ kathaṃbhūtaḥ | sāndraparvā sāndrāṇi parvāṇi saṃdhipradeśā yasya sa sāndraparvā | śleṣopamālaṃkāraḥ || ye vīretyādi | he vīra vikrānta, he nātha pṛthivīpate, ye śatravo 'mantrayaḥ tvayi viṣaye bahu alīkamanaso vartante | kuṭilahṛdayā vartanta ityarthaḥ | punaḥ kathaṃbhūtā vartante |