Yashastilaka 4.292

4.292

iti viśeṣavacanāt | ekameveti tat | kiṃ tu kavisamaye dānamadairaviśeṣeṇa prayogāddoṣaḥ | kathaṃbhūtaḥ san prabhinnakarikelīdarśam | iti paṭhatā gajopajīvilokena ānanditacetāḥ | itīti kim |
madamṛgamadalekhetyādi | he deva, ayaṃ karipati- gajendraḥ adya idānīṃ anyāmeva apūrvāmeva kācit anirvacanīyāṃ śriyaṃ śobhāṃ avati dhārayati | ka iva | tvamiva yathā tvaṃ raṇānte saṃgrāmānte apūrvā śriyamavasi| kathaṃbhūtastvam | jaitracāpaḥ jayanaśīladhanurdharaḥ | kathaṃbhūto'yaṃ karipatiḥ | madamṛgamadalekhollāsigaṇḍasthalaśrīḥ mada eva mṛgamadaḥ kastūrī tasya lekhā rājayaḥ tābhirullāsinī ullasanaśīlā gaṇḍasthalaśrīḥ kapolasthalaśobhā yasya sa tathoktaḥ | kathaṃbhūtastvam | madasadṛśakastūrikārekhollasanaśīlakapolasthalaśobhaḥ | kathaṃbhūto'yaṃ karipatiḥ | muhurvāraṃvāraṃ anibhṛtajṛmbhārambhaśumbhadvilāsaḥ anibhṛtamaniścalaṃ yathā bhavatyevaṃ jṛmbhārambheṇa mukhavikārakaraṇena śumbhantaḥ śobhamānā vilāsā locanacalanāni yasya sa tathā | tvaṃ kathaṃbhūtaḥ | sa evārthaḥ | upamālaṃkāraḥ ||
kariṇetyādi | kariṇā gajena vamathuḥ karaśīkaraḥ muktaḥ san puro'gre sthūlabindusaṃtānaḥ pīvaravindusamūhaḥ digaṅganānā muktāphalabhūṣaṇānīva racayati | kriyopamālaṃkāraḥ||
uttambhīkṛtetyādi | he rājan, ayaṃ karipatiriti pūrvoktameva grāhyam | ayaṃ karipatistiṣṭhati ūrdhva eva carati | kiṃ kṛtvā | pūrva pātumibhailāsya prārthanayā vidhṛtān ikṣūn kare śuṇḍādaṇḍe gṛhītvā | kathaṃbhūtānekṣūn | cirāya dīrghakālaṃ vidhṛtān | kathaṃbhūto'yaṃ karipatiḥ | uttambhīkṛtakarṇatālayugalaḥ niścalīkṛtakarṇatālayugalaḥ | punaḥ kathaṃbhūtaḥ | pratyastapāṃsukriyaḥ pratyastā nirākṛtā pāṃsukriyā dhūlanaṃ yena sa pratyastapāṃsukriyaḥ | punaḥ