Yashastilaka 4.353

4.353

ghṛtavikārān ca adyāt tathā ghanībhūtaṃ ghṛtamadyāt | atra asmin śiśirakāle tailamapi pathyaṃ hitaṃ vartate | niśi ca rātrau puraṃdhyaḥ sevanīyāḥ | kathaṃbhūtāḥ | pīnavakṣojabhājaḥ pīvarastanyaḥ | punaḥ kathaṃbhūtāḥ puraṃdhyaḥ | vipulabahalakāyāḥ sthūlaśarīrāḥ | samuccayālaṃkāraḥ || yavagodhūmaprāyamityādi | madanavijṛmbhaṇakāle vasantartau yavagodhūmaprāyaṃ rūkṣaprāyaṃ alpaghṛtaprāyaṃ ca bhojanaṃ kuryāt kurvan guru māṣādikaṃ śītaṃ śarkarādikaṃ svādu ca madhuramannaṃ tyājyam | samuccayālaṃkāraḥ || kalametyādi | he kṣitiramaṇa, tapadivase niṣevyaṃ grīṣmakāladineṣu sevyaṃ sevanīyam | kim | kalamasadakabhaktaṃ sugandhaśālitaṇḍulakaṭo niṣevyaḥ | mudgasūpo mudgadālirniṣevyaḥ | kathaṃbhūtaḥ | sasarpighṛtaprāyam | bisakisalayakandāḥ bisaṃ ca padminīkandaḥ, kisalayāni ca madhurapallavāḥ, kandāḥ piṇḍakandāḥ, saktavaḥ bhraṣṭayavacūrṇavikārāḥ, pānakāni śarkarāguḍakṣuvarasādikaṃ pānakamucyate, rasālā makṣikā iti deśapatrikāyāṃ śikhariṇīti śarkarādikam, nālikerīphalāmbhaḥ lāṅgalinīphalajalaṃ ca, anyat śarkarāḍhyaṃ śarkarāsahitaṃ yathoktaṃ payaḥ dugdhaṃ jalaṃ vā | samuccayālaṃkāraḥ || pariśuṣkamityādi | prāvṛṣi bhojanaṃ samācaret kuryāt | kīdṛśam | pariśuṣkaṃ aṅgāramaṇḍūkaprāyakaraṃ phenikādikam, laghu pācakaṃ taṇḍulabhaktādikam, snigdhaṃ ghṛtādikam, uṣṇaṃ ......, purāṇaśāligodhūmayavaprāyaṃ pañcāgrasugandhaśālibhaktaṃ godhūmānāmapūpādikaṃ yavaprāyaṃ yavaudanaṃ samācaret | samuccayālaṃkāraḥ ||